សម្ព័ន្ធភាពបក្សកាន់អំណាចថ្កោលទោសលោក សម រង្ស៊ី រឿងលើកឡើងពីការអុំទូកក្លែងក្លាយ
ក្រុមអង្គការសង្គមស៊ីវិលដែលគាំទ្ររដ្ឋាភិបាល និងគណបក្សនយោបាយដែលមានសម្ព័ន្ធភាពជាមួយគណបក្សប្រជាជន ចាប់តាំងពីថ្ងៃទី៣០ ខែវិច្ឆិកាមក បានចេញញត្តិថ្កោលទោសលោក សម រង្ស៊ី ប្រធានស្តីទីអតីតគណបក្សសង្គ្រោះជាតិ ដែលបានសរសេរនៅលើទំព័រហ្វេសប៊ុករបស់លោកកាលពីដើមសប្តាហ៍នេះ ថារដ្ឋាភិបាលឪពុក និងកូន លោក ហ៊ុន សែន ពូកែផលិតរូបភាពក្លែងក្លាយជុំវិញពិធីបុណ្យអុំទូកនៅឆ្នាំនេះ។ ញត្តិថ្កោលទោស ក៏បានច្រានចោលការលើកឡើងរបស់លោក សម រង្ស៊ី ដាច់អហង្ការ និងប្រកាសគាំទ្រការដឹកនាំរបស់រដ្ឋាភិបាលលោក ហ៊ុន ម៉ាណែត និងលោក ហ៊ុន សែន។
ចុះផ្សាយនៅថ្ងៃ៖
ស្តាប់ - ០២:៣៦
ធ្លាក់មកជាបន្តបន្ទាប់ ខ្លះផ្សព្វផ្សាយតាមបណ្តាញសង្គមដោយខ្លួនឯង ខ្លះបោះឲ្យសារព័ត៌មាន ហ្រេសញូ ចុះផ្សាយ ញត្តិថ្កោលទោសលោក សម រង្ស៊ី ត្រូវគេពិនិត្យឃើញថាខ្លះមានខ្លឹមសារប្រហាក់ប្រហែលគ្នា ខ្លះដូចគ្នា និងខ្លះទៀតតាក់តែងរៀងៗស្ថាប័ន មានខ្លី មានវែង និងមានចុះហត្ថលេខា និងវាយត្រាជាក្រុមក៏មាន។
ខ្លឹមសារនៃញត្តិ ដែលសរសេរដោយក្រុមអង្គការសង្គមស៊ីវិល និងគណបក្សនយោបាយ ដែលមានសម្ព័ន្ធភាពជាមួយគណបក្សកាន់អំណាចទាំងអស់នោះ បានចាប់ផ្តើមឡើងដោយធ្វើការថ្កោលទោសយ៉ាងដាច់អហង្កការចំពោះលោក សម រង្ស៊ី ដែលបានបន្តផ្សព្វផ្សាយបំភ្លៃ និងញុះញង់តាមបណ្តាញសង្គមចំពោះការបង្ហោះសារភ្ជាប់ទៅនឹងរូបភាពកាលពីថ្ងៃទី២៧ ខែវិច្ឆិកា ឆ្នាំ២០២៣ ថាការរៀបចំពិធីបុណ្យអុំទូក ជាការរៀបចំផលិតរូបភាពក្លែងក្លាយ ដែលមានចេតនាប៉ះពាល់ដល់មុខមាត់រាជរដ្ឋាភិបាល និងប៉ះពាល់ដល់ប្រជាជាតិខ្មែរទាំងមូល។
សូមរំលឹកថា កាលពីថ្ងៃទី២៧ ខែវិច្ឆិកា កន្លងទៅ នៅលើទំព័រហ្វេសប៊ុករបស់លោក លោក សម រង្ស៊ី បានដាក់រូបភាពទូកនៅក្នុងពិធី ២ប្លង់ផ្សេងគ្នា ដែលរូបភាពមួយបង្កើតឡើងដោយបញ្ញាសិប្បនិម្មិត ឬហៅកាត់ថា (AI) ដោយលោកសរសេរថាជារូបភាពក្លែងក្លាយ និងរូបភាពមួយប្លង់ទៀត ជារូបភាពពិតស្តីពីការអុំទូកនៅខាងមុខព្រះបរមរាជវាំង។
រីឯសំណេរផ្សេងទៀត លោក សម រង្ស៊ី បានសរសរទាក់ទងទៅនឹងរដ្ឋាភិបាលលោក ហ៊ុន សែន និងលោក ហ៊ុន ម៉ាណែត ថាពូកែផលិតរូបថតក្លែងក្លាយ ដើម្បីបោកបញ្ឆោតរាស្ត្រ ដោយលោកក្តោបអត្ថន័យជារួមថាលោក ហ៊ុន សែន បានបង្កើតវប្បធម៌ក្លែងក្លាយ រួមមានសន្តិភាព ប្រជាធិបតេយ្យ ការបោះឆ្នោត ការអភិវឌ្ឍន៍ សុទ្ធសឹងជារឿងក្លែងក្លាយ។
ក៏ប៉ុន្តែញត្តិថ្កោលទោសរបស់បក្សសម្ព័ន្ធ និងអង្គការសង្គមស៊ីវិលគាំទ្ររដ្ឋាភិបាល បានស្នើឲ្យអាជ្ញាធរចាត់វិធានការឲ្យបានតឹងរឹងបន្ថែមទៀតប្រឆាំងនឹងលោក សម រង្ស៊ី ព្រមទាំងគាំទ្ររដ្ឋាភិបាលលោក ហ៊ុន ម៉ាណែត និងលោក ហ៊ុន សែន ដែលជាប្រធានគណបក្សប្រជាជនកម្ពុជា ក្នុងការកំចាត់ចោលនយោបាយជ្រុលនិយម ដើម្បីភាពសុខសាន្តរបស់ប្រទេសជាតិ។
ក្រៅពីក្រុមអង្គការសង្គមស៊ីវិលដែលគាំទ្ររដ្ឋាភិបាល និងគណបក្សសម្ព័ន្ធភាពជាមួយគណបក្សកាន់អំណាច លោក ហ៊ុន សែន ក៏ដូចជាគណបក្សប្រជាជនមិនឃើញមានប្រតិកម្ម ឬចេញញត្តិថ្កោលទោសលោក សម រង្ស៊ី ទេ។ ក៏ប៉ុន្តែលោកនាយករដ្ឋមន្ត្រី ហ៊ុន ម៉ាណែត តាមរយៈសារសម្លេងខ្លីនៅថ្ងៃនេះ បានហៅការរៀបចំពិធីបុណ្យអុំទូកនៅឆ្នាំនេះថា ជាជោគជ័យប្រកបដោយមោទនភាពរបស់រដ្ឋាភិបាលលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ