លោក ហ៊ុន សែន រំឭកខួប២ធ្នូ តែមិនរំលេចឈ្មោះ លោក ប៉ែន សុវណ្ណ
អតីតនាយករដ្ឋមន្ត្រីកម្ពុជា លោក ហ៊ុន សែន បានរំឭកឡើងវិញពីប្រវត្តិ នៃថ្ងៃកំណើតរណសិរ្សសាមគ្គីសង្រ្គោះជាតិកម្ពុជា ឬហៅថា រណសិរ្ស២ធ្នូ ដែលបង្កើតឡើងនៅថ្ងៃ០២ ធ្នូ ១៩៧៨ ដែលគិតដល់០២ ធ្នូ ២០២៣នេះគឺមានរយៈពេល៤៥ឆ្នាំ។ លោក ហ៊ុន សែន បានអះអាងថា រណសិរ្សសាមគ្គីសង្រ្គោះជាតិកម្ពុជា ត្រូវបានកើតឡើងដោយកម្លាំងមហាសាមគ្គីប្រជាជន ទាំងក្នុង និងក្រៅប្រទេស ដែលមានលោក ហេង សំរិន លោក ជា ស៊ីម និងលោក ហ៊ុន សែន ជាដើមជាអ្នករៀបចំកម្លាំងផ្ដួលរំលំរបប ប៉ុល ពត និងទទួលបានជ័យជម្នះ នៅថ្ងៃទី៧ មករា ឆ្នាំ ១៩៧៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
បើតាម លោក ហ៊ុន សែន «រណសិរ្សសាមគ្គីសង្គ្រោះជាតិកម្ពុជា» ដែលបច្ចុប្បន្នត្រូវបានដូរឈ្មោះជា «រណសិរ្សសាមគ្គី អភិវឌ្ឍន៍មាតុភូមិកម្ពុជា» គឺជាអង្គការចាត់តាំងមហាជនមួយឈានមុខ របស់គណបក្សប្រជាជនកម្ពុជា បានបង្កើតឡើងនៅក្នុងតំបន់រំដោះ នាភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ។
លោក ហ៊ុន សែន អះអាងថា តាមរយៈរណសិរ្ស២ធ្នូនេះហើយ ទើបខ្មែរក្រោកឈររួបរួមគ្នា ដោយបាន ការជួយឧបត្ថម្ភយ៉ាងធំធេង ពីកងទ័ពស្ម័គ្រចិត្ដវៀតណាម និងការគាំទ្រពីមិត្ដភក្ដិជិតឆ្ងាយលើសកលលោក ទើបអាចផ្ដួលរំលំរបបកម្ពុជាប្រជាធិបតេយ្យ នៅថ្ងៃ៧ មករា ឆ្នាំ១៩៧៩។
ប៉ុន្តែកាលនៅមានជីវិត លោក ប៉ែន សុវណ្ណ អតីតនាយករដ្ឋមន្ត្រីខ្មែរក្រោយខ្មែរក្រហមដួលរលំបានអះអាងថា រូបលោកគឺជាបិតាស្ថាបនិករណសិរ្ស២ធ្នូនេះ ពីព្រោះលោកគឺជាមនុស្សទី១ ដែលវៀតណាមលើកបន្តុបឲ្យដឹកនាំកម្ពុជានាពេលនោះ។ តែលោកអះអាងថា ដោយសារតែលោកមិនស្តាប់តាមផែនការរបស់វៀតណាមទើបលោកត្រូវបានវៀតណាមចាប់ទៅដាក់គុកងងឹតនៅហាណូយ១០ឆ្នាំ។
ទោះជាយ៉ាងណា ក្រោយការស្លាប់របស់លោក ប៉ែន សុវណ្ណ លោក ហ៊ុន សែន បានចេញបកស្រាយខុសពីនេះចំពោះការចាប់ខ្លួនលោក ប៉ែន សុវណ្ណ នាពេលនោះ។លោក ហ៊ុន សែន អះអាងថា ការលោកទៅចាប់ខ្លួន លោក ប៉ែន សុវណ្ណ ដែលជាមេកើយនោះ គឺដោយសារតែលោក ប៉ែន សុវណ្ណ បង្កើតឲ្យមានការមិនទុកចិត្តផ្ទៃក្នុង និងបែបបាក់សាមគ្គីភាពអាចនាំឲ្យខ្មែរក្រហមវិលមកវិញ។ ប៉ុន្តែលោក ប៉ែន សុវណ្ណ បានអះអាងថា ថ្ងៃ៧ មករា ឆ្នាំ១៩៧៩ គឺជាថ្ងៃដែលកងទ័ពវៀតណាមចូលឈ្លានពានដីទឹកកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ