សកម្មជនអះអាងថា ព្រៃឡង់ចន្លោះពី៤០ទៅ៥០ហិកតាត្រូវបានកាប់បំផ្លាញ
សកម្មជនការពារបរិស្ថាន បានអះអាងថា ព្រៃឡង់ តាមការប៉ាន់ស្មានទំហំពី៤០ទៅ៥០ហិកតា ត្រូវបានកាប់បំផ្លាញដើម្បីយកដិធ្វើចំការស្ថិតនៅតំបន់ អូរតាលោក ទឹកដីឃុំមានរិទ្ធ ស្រុកសណ្តាន់ ខេត្តកំពង់ធំ។ ការអះអាងយ៉ាងដូច្នេះ គឺដោយសារតែសកម្មជនទាំងនោះ បានចុះល្បាតពីថ្ងៃទី២៨ ដល់ ៣០ ខែវិច្ឆិកា ឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:២៣
បើតាមសំណេរនៅលើហ្វេសប៊ុកឈ្មោះថា Prey Lang ការកាប់បំផ្លាញព្រៃអភិរក្សនេះ គឺនៅមិនឆ្ងាយប៉ុន្មានពីទីស្នាក់ការបរិស្ថាន (ច្រកព្រះអាទិត្យ) នោះឡើយ។
ក្រៅពីកាប់បំផ្លាញព្រៃឡង់នៅទឹកដីខេត្តកំពង់ធំនោះ បណ្តាញសហគមន៍ព្រៃឡង់ ខេត្តក្រចេះ កាលពីថ្ងៃទី២៤ ដល់ ២៧ ខែវិច្ចិកា ពួកគេចំនួន៣៥នាក់ បានចុះល្បាតដោយ ជួបគល់ឈើជាច្រើនគល់ត្រូវបានកាប់រួច ខណៈ មានរោងអ្នកអារឈើ ៤កន្លែង រទេះក្របីចំនួន ៨គ្រឿង។
ជាមួយគ្នានោះដែរ បណ្តាញសហគមន៍ព្រៃឡង់ ខេត្តព្រះវិហារ ចំនួន ៣០នាក់ទៀតបានចុះស្រាវជ្រាវ និងតាមដានបទល្មើសព្រៃឈើ ចាប់ពីថ្ងៃទី២៥ ដល់ ២៨ ខែវិច្ឆិកា ឆ្នាំ២០២៣ បាន ជួបជនល្មើស ១៦នាក់។ រោងអារឈើចំនួន ២កន្លែង គោយន្តចំនួន ៣គ្រឿង ម៉ូតូចំនួន ១គ្រឿង រណាយន្តចំនួន៣គ្រឿង គល់ឈើទើបកាត់រួចថ្មីចំនួន ៣០គល់ ឈើឃ្លុំចំនួន៨ដុំ ក្តារបន្ទះ ចំនួន ១០សន្លឹក និងទីតាំងកាប់រានដីធ្វើចម្ការចំនួន ១កន្លែងទំហំ៤ហិកតាស្ថិតនៅក្បាលអូគោល។
កាលពីថ្ងៃទី៥តុលា២០២៣ តាមការស៊ើបអង្កេតរបស់កាសែតបរទេស ម៉ុងហ្គាបេ បានរាយការណ៍ថា នៅតំបន់ព្រៃឡង់ មានជនមិនស្គាល់មុខបានឈូសឆាយព្រៃធ្វើផ្លូវថ្មីមួយខ្សែ ទៅកាន់តំបន់បេះដូងនៃដែនជម្រកសត្វព្រៃព្រៃឡង់ចេញពីតំបន់ដីសម្បទានដាំដើមឈើឡើងវិញរបស់ក្រុមហ៊ុន Think Biotech (Cambodia) ដែលមានប្រមាណ៣ម៉ឺន៤ពាន់ហិកតា លាតសន្ធឹងតាមព្រំដែននៃព្រៃការពារ ក្នុងខេត្តស្ទឹងត្រែងនិងក្រចេះ។
យោងតាមម៉ុងហ្គាបេ ផ្លូវដែលទើបលួចឈូសឆាយនោះកំពុងតែជួយសម្រួលដល់ការកាប់ឈើខុសច្បាប់ និងការជួញដូរឈើមានតម្លៃយ៉ាងអនាធិបតេយ្យ ដោយចោទថា ជាស្នាដៃរបស់ក្រុមហ៊ុន Think Biotech (Cambodia)។ ប៉ុន្តែនៅក្នុងបទសម្ភាសជាមួយកាសែតបរទេសមួយនេះកាលពីខែមិថុនាកន្លងទៅ នាយកក្រុមហ៊ុន Think Biotech លោក លី ឈូឆាង បានបដិសេធមិនមានជាប់ពាក់ព័ន្ធទៅនឹងការឈូសឆាយព្រៃធ្វើផ្លូវថ្មី ចេញពីដីសម្បទានក្រុមហ៊ុនលោក ក៏ដូចជាការការជួញដូរឈើខុសច្បាប់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ