ការសិក្សា៖ តាកែវនិងព្រះសីហនុមានអត្រាឆ្លងមេរោគអេដស៍ខ្ពស់ជាងគេក្នុងឆ្នាំ២០២៣
លទ្ធផលបឋមនៃការសិក្សាប៉ាន់ប្រមាណបែបវិទ្យាសាស្ត្រឆ្នាំ២០២៣របស់អាជ្ញាធរជាតិប្រយុទ្ធនឹងជំងឺអេដស៍ បង្ហាញថា ខេត្តតាកែវនិងខេត្តព្រះសីហនុ ស្ថិតនៅក្នុងចំណោមខេត្ត៤ផ្សេងទៀត ដែលមានអត្រានៃការឆ្លងមេរោគអេដស៍ថ្មីខ្ពស់ជាងគេនៅកម្ពុជា។ អាជ្ញាធរជាតិប្រយុទ្ធនឹងជំងឺអេដស៍ឱ្យដឹងទៀតថា បច្ចុប្បន្ននេះមានអ្នកផ្ទុកមេរោគអេដស៍ប្រមាណ១ម៉ឺន២ពាន់នាក់ បានរត់គេចពីការទទួលសេវាព្យាបាលដែលអាចធ្វើឱ្យចំនួនអ្នកឆ្លងអេដស៍នៅកម្ពុជាកើនឡើង ខណៈរដ្ឋាភិបាលបានដាក់គោលដៅបញ្ចប់អេដស៍ឆ្នាំ២០២៥។
ចុះផ្សាយនៅថ្ងៃ៖
ស្តាប់ - ០២:៥២
នៅក្នុងសន្និបាតប្រចាំឆ្នាំ២០២៣របស់អាជ្ញាធរជាតិប្រយុទ្ធនឹងជំងឺអេដស៍នៅថ្ងៃទី៤ធ្នូ លោក អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បញ្ជាក់ថា លទ្ធផលបឋមនៃការសិក្សាប៉ាន់ប្រមាណបែបវិទ្យាសាស្ត្រនៅឆ្នាំ២០២៣ទាក់ទងនឹងចំនួនអ្នកផ្ទុកមេរោគអេដស៍ថ្មីក្នុងចំណោមក្រុមប្រឈម គឺមាន៦រាជធានីខេត្តដូចជា រាជធានីភ្នំពេញ ខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តតាកែវ និងខេត្តព្រះសីហនុ មានអត្រាឆ្លងរហូតដល់៧២% នៃការឆ្លងថ្មីនៅទូទាំងប្រទេស។ ក្នុងនោះ ខេត្តតាកែវនិងខេត្តព្រះសីហនុ គឺជាខេត្ត២ ក្នុងចំណោមខេត្ត៤ផ្សេងទៀតនោះ ត្រូវបានរកឃើញថា មានអត្រានៃការឆ្លងមេរោគអេដស៍ថ្មីខ្ពស់ជាងគេ ក្នុងចំណោមប្រជាជនគន្លឹះនៅកម្ពុជា។
តាមការវិភាគក្នុងការសិក្សាប៉ាន់ប្រមាណដដែលក៏មានបង្ហាញទៀតថា កំណើននៃការឆ្លងមេរោគអេដស៍ថ្មី គឺស្ថិតនៅក្នុងចំណោមបុរសនិងក្មេងប្រុសមានចំនួន៧៩%។ ក្នុងនោះ៨៣%នៃអ្នកឆ្លងថ្មី គឺជាក្រុមប្រឈម ឬ ជាក្រុមប្រជាជនគន្លឹះ។ ជាមួយគ្នានោះ ក្រុមបុរសរួមភេទជាមួយបុរសដែលជាយុវវ័យចំនួន៥០% ត្រូវបានរកឃើញថាមិនទទួលស្គាល់ថាខ្លួនជាអ្នកប្រឈមនឹងការឆ្លងមេរោគអេដស៍ឡើយ។
ប្រធានអាជ្ញាធរជាតិប្រយុទ្ធនឹងជំងឺអេដស៍ លោក អៀង មូលី ធ្លាប់បានគូសបញ្ជាក់ក្នុងសន្និសិទកាសែតមួយកាលពីថ្ងៃទី២៤វិច្ឆិកាថា អ្នកផ្ទុកមេរោគអេដស៍ប្រមាណ១ម៉ឺន២ពាន់នាក់នៅកម្ពុជា បានរត់គេចពីការទទួលសេវាព្យាបាល ដោយសារតែពួកគេមានការខ្មាសអៀន ក្នុងនោះមានអ្នកមានទ្រព្យនិងអ្នកល្បីផងដែរ។ ដោយពួកគេអាចទៅរកសេវាព្យាបាលឯកជន ដើម្បីលាក់បាំង កុំឲ្យគេដឹង។ ចំពោះលោក អៀង មូលី ការណ៍នេះគឺជាចំណុចព្រួយបារម្ភដែលអាចធ្វើឱ្យចំនួនអ្នកឆ្លងអេដស៍នៅកម្ពុជាកើនឡើង ខណៈរដ្ឋាភិបាលបានដាក់គោលដៅបញ្ចប់អេដស៍ឆ្នាំ២០២៥។ ដើម្បីសម្រេចគោលដៅបញ្ចប់អេដស៍ឆ្នាំ២០២៥ កម្ពុជាចង់ឱ្យអត្រាអ្នកឆ្លងជំងឺអេដស៍ម្នាក់ក្នុង១ថ្ងៃ ឬ៣៦៥នាក់ក្នុង១ឆ្នាំ ឬទាបជាងនេះ។
គួរដឹងថា តាមរបាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ឆ្នាំ២០២២ កម្ពុជាមានអ្នកឆ្លងមេរោគអេដស៍ថ្មីចំនួន១,៤០០នាក់ក្នុងមួយឆ្នាំ ដែលមានន័យថា មនុស្ស៤នាក់បានឆ្លងមេរោគអេដស៍ជារៀងរាល់ថ្ងៃ។ដើម្បីឈានទៅបញ្ចប់ការឆ្លងរាលដាលមេរោគអេដស៍និងជំងឺអេដស៍ ក្នុងដំណាក់កាលដែលស្ថានភាពជំនួយពីបរទេសធ្លាក់ចុះ រដ្ឋាភិបាលអះអាងថា ក្នុងរយៈពេល៣ឆ្នាំមកនេះ រដ្ឋបានចំណាយថវិកាទិញថ្នាំសម្រាប់ទប់ស្កាត់ការឆ្លងជំងឺអេដស៍ ក្នុងមួយឆ្នាំៗ ៥លានដុល្លារអាមេរិក ដើម្បីជួយព្យាបាលអ្នកដែលបានឆ្លងជំងឺអេដស៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ