សិទ្ធិស្រ្តី៖សង្គមស៊ីវិលអំពាវនាវ៦ចំណុចទៅរដ្ឋាភិបាលកម្ពុជា
នៅថ្ងៃទី២៧ខែធ្នូ សង្គមស៊ីវិលចំនួន៨ បានចេញសេចក្ដីថ្លែងការណ៍រួមមួយដោយអំពាវនាវ៦ចំណុចទៅកាន់រដ្ឋាភិបាលកម្ពុជាក្នុងការបង្កើនសិទ្ធិស្រ្តី។ ការអំពាវនាវទាំងនេះធ្វើឡើង ខណៈសង្គមស៊ីវិលរកឃើញស្ថានភាពសិទ្ធិស្រ្តីនៅកម្ពុជាបន្តជួបបញ្ហាប្រឈមជាច្រើន។
ចុះផ្សាយនៅថ្ងៃ៖
ស្តាប់ - ០២:០០
នៅក្នុងសេចក្ដីថ្លែងការណ៍រួម ការអំពាវនាវចំនួន ៦ចំណុចរបស់សង្គមស៊ីវិលទាំង៨រួមមាន ការកាត់ទោសករណីអំពើហិង្សាលើស្រ្តីឲ្យមានប្រសិទ្ធិភាព ការកែប្រែគ្រប់ទម្រង់នៃអំពើហិង្សាក្នុងគ្រួសារឲ្យក្លាយជាបទល្មើសព្រហ្មទណ្ឌ និងការធានាពីភាពស្មើគ្នារបស់ស្រ្តី(៥០%) នៅគ្រប់តំណែងថ្នាក់ដឹកនាំរដ្ឋាភិបាល។
ចំណែកសំណូមពរផ្សេងទៀត ដូចជាការដាក់ចេញនូវសកម្មភាពការពារ លុបបំបាត់ការបំពាន និងការប្រើអំពើហិង្សាលើស្រ្តី ព្រមទាំងទម្រង់ផ្សេងៗនៃការរើសអើងផ្នែកយេនឌ័រនៅកន្លែងធ្វើការ។ ក្រៅពីនេះ សង្គមស៊ីវិលទាំង៨ ក៏បានសំណូមពរឲ្យមានការពង្រីកសេវាថែទាំសុខភាពបន្តពូជដែលមានគុណភាព និងការអប់រំផ្លូវភេទយ៉ាងទូលំទូលាយថែមទៀតក្នុងកម្មវិធីសិក្សារ។
គួរបញ្ជាក់ថា អង្គការកម្ពុជាដើម្បីជួយស្រ្តីមានវិបត្តិ(CWCC) ធ្លាប់បានអះអាងពីការកើនឡើងនូវករណីហិង្សាលើស្រ្តីជារៀងរាល់ថ្ងៃ គិតត្រឹមខែឧសភាឆ្នាំ២០២២។ អង្គការ CWCC បានអះអាងថា ខ្លួនបានទទួលសេចក្តីរាយការណ៍ស្ដីពីករណីហិង្សាលើស្រ្តីចំនួន៤៤២ករណីក្នុងឆ្នាំ២០២២ ពោលកើនឡើងចំនួន ៣២ករណីបើធៀបនឹងឆ្នាំ២០២១។
ទន្ទឹមគ្នានេះ មន្រ្តីជាន់ខ្ពស់នៃក្រសួងកិច្ចការនារីដែលដកស្រង់សម្ដីដោយគណៈកម្មាធិការអង្គការស៊ី-ដកម្ពុជាក៏បានបញ្ជាក់ពីការគ្មានការថយចុះនៃ ករណីប្រើអំពើហិង្សាលើស្រ្តីក្នុងឆ្នាំ២០២២ដែរ។ ដោយឡែក គណៈកម្មាធិការអង្គការស៊ី-ដកម្ពុជាបានបញ្ជាក់បន្ថែមថា ករណីប្រើហិង្សាលើរាងកាយស្រ្តីដែលមានអាយុចាប់ពី១៥ឆ្នាំទៅវិញ មានការថយចុះពី២០%ក្នុងឆ្នាំ២០១៤ មកនៅត្រឹម១០%ក្នុងឆ្នាំ២០២២កន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ