អ្នកប្រឆាំង រិះគន់លោក ហ៊ុន សែន រឿងបន្តកាត់ដីឲ្យឯកជន
លោក អ៊ុំ សំអាន អតីតតំណាងរាស្រ្តនៃអតីតគណបក្សសង្រ្គោះជាតិ បានរិះគន់ លោក ហ៊ុន សែន អតីតនាយករដ្ឋមន្រ្តីកម្ពុជាថា ជាមេដឹកនាំបំផ្លិចបំផ្លាញព្រៃឈើច្រើនជាងគេក្នុងចំណោមមេដឹកនាំខ្មែរក្នុងប្រវត្តិសាស្រ្តកម្ពុជា។ ការរិះគន់នេះ ធ្វើឡើងបន្ទាប់ពីឃើញអនុក្រឹត្យរដ្ឋាភិបាលចាស់ដឹកនាំដោយលោក ហ៊ុន សែន បានកាត់ផ្ទៃដីព្រៃឈើទំហំ ២៩១ហិកតាទៅឲ្យក្រុមហ៊ុនឯកជន ដើម្បីធ្វើការអភិវឌ្ឍន៍។ ប៉ុន្តែការរិះគន់នេះ ត្រូវបានលោក សុខ ឥសាន អ្នកនាំគណបក្សប្រជាជនឆ្លើយតបថា ក្រុមប្រឆាំងមិនដែលធ្វើការស្របនឹងរដ្ឋាភិបាលឡើយ។
ចុះផ្សាយនៅថ្ងៃ៖
ស្តាប់ - ០៣:១៤
តាមរយៈបណ្ដាញសង្គមហ្វេសប៊ុក លោក អ៊ុំ សំអាន បានលើកឡើងអមជាមួយអនុក្រឹត្យរបស់រដ្ឋាភិបាលចាស់យ៉ាងដូច្នេះថា លោក ហ៊ុន សែន កាលនៅធ្វើជានាយករដ្ឋមន្រ្តី បានកាត់ផ្ទៃដីព្រៃឈើទំហំ ២៩១ហិកតា ស្ថិតក្នុងឧទ្យានជាតិព្រះមុនីវង្ស «បូកគោ» ដើម្បីជួលឲ្យក្រុមហ៊ុន សុគន្ធ ខេភី គ្លូប៊ល អ៊ិនវេសម៉ិន ខូអិលធីឌី សម្រាប់វិនិយោគលើគម្រោងបង្កើតតំបន់សេដ្ឋកិច្ចពិសេស និងអភិវឌ្ឍន៍ទេសចរណ៍។
អតីតតំណាងរាស្រ្តនៃអតីតគណបក្សសង្រ្គោះជាតិរូបនេះ បានរិះគន់ចំៗទៅលោក ហ៊ុន សែន អតីតនាយករដ្ឋមន្រ្តីកម្ពុជាថា ជាមេដឹកនាំបំផ្លិចបំផ្លាញព្រៃឈើច្រើនជាងគេក្នុងចំណោមមេដឹកនាំខ្មែរក្នុងប្រវត្តិសាស្រ្តកម្ពុជា។
ប៉ុន្តែការរិះគន់នេះ ត្រូវលោក សុខ ឥសាន អ្នកនាំពាក្យគណបក្សប្រជាជនកម្ពុជា បានប្រតិកម្មតបវិញថា ក្រុមគណបក្សប្រឆាំងមិនដែលធ្វើការស្របជាមួយនឹងរដ្ឋាភិបាលឡើយ តែងតែធ្វើការរិះគន់ជានិច្ច ជាពិសេសលោក អ៊ុំ សំអាន។ តាមលោក សុខ ឥសាន ការរិះគន់នេះ ជារឿងធម្មតាទៅហើយសម្រាប់ក្រុមប្រឆាំង។
លោកបញ្ជាក់ថា រាល់ការកាត់ដីរបស់រដ្ឋាភិបាលជួលទៅឲ្យក្រុមហ៊ុនឯកជនធ្វើការអភិវឌ្ឍន៍ ក្រសួងដែលពាក់ព័ន្ធសុទ្ធតែបានវាយតម្លៃផលប៉ះពាល់ និងផលចំណេញ។ ត្រង់ចំណុចនេះ លោក សុខ ឥសាន ថាបើគ្មានផលចំណេញដល់សេដ្ឋកិច្ចជាតិ និងប្រជាជនទេ ក្រសួងដែលពាក់ព័ន្ធមិនសម្រេចដាក់សំណើរមករដ្ឋាភិបាលដើម្បីសម្រេចកាត់ផ្ទៃដីជួលឲ្យក្រុមហ៊ុនឯកជនឡើយ។
សូមបញ្ជាក់ថា បើយោងតាមអនុក្រឹត្យរបស់រដ្ឋាភិបាលចុះថ្ងៃទី១៥សីហា ឆ្នាំ២០២៣ ចុះហត្ថលេខាដោយលោក ហ៊ុន សែន បានសម្រេចកាត់ផ្ទៃដីទំហំ ២៩១ហិកតា ស្ថិតក្នុងឧទ្យានជាតិព្រះមុនីវង្ស «បូកគោ» ដើម្បីជួលឲ្យក្រុមហ៊ុន សុគន្ធ ខេភី គ្លូប៊ល អ៊ិនវេសម៉ិន ខូអិលធីឌី សម្រាប់វិនិយោគលើគម្រោងបង្កើតតំបន់សេដ្ឋកិច្ចពិសេស និងអភិវឌ្ឍន៍ទេសចរណ៍។
ជាការកត់សម្គាល់ អនុក្រឹត្យរបស់រដ្ឋាភិបាលចាស់កាត់ផ្ទៃដីនៅតំបន់បូកគោជួលទៅឲ្យក្រុមហ៊ុន សុគន្ធ ខេភី គ្លូប៊ល អ៊ិនវេសម៉ិន ខូអិលធីឌីខាងលើនេះ ខុសគ្នាទៅនឹងអនុក្រឹត្យរបស់រដ្ឋាភិបាលដែលកាត់ឲ្យទៅឈ្មោះបុគ្គល ហេង សួរ តែប៉ុន្មានថ្ងៃប៉ុណ្ណោះ។ ពោលគឺអតីតរដ្ឋាភិបាលលោក ហ៊ុន សែន បានសម្រេចកាត់ឆ្វៀលផ្ទៃដីទំហំជាង ៩១ហិកតា នៅក្នុងភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត ចេញពីដែនគម្របសត្វព្រៃឈើឆ្នាំ២០០២ ដើម្បីធ្វើអនុបយោគជាដីឯកជនរបស់រដ្ឋ និងធ្វើប្រទានកម្មជាកម្មសិទ្ធិបុគ្គលឈ្មោះ ហេង សួរ។ នេះផ្អែកតាមអនុក្រឹត្យមួយចុះថ្ងៃទី៩ សីហា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ