ទំហំពាណិជ្ជកម្មអន្តរជាតិកម្ពុជាឆ្នាំ ២០២៣ធ្លាក់ចុះជិត២%ធៀបនឹងឆ្នាំ ២០២២
នៅឆ្នាំ២០២៣ កម្ពុជាសម្រេចបានទំហំពាណិជ្ជកម្មអន្តរជាតិ ៤៦,៨ ពាន់លានដុល្លារ ពោលគឺធ្លាក់ចុះ ១,៩% ធៀបនឹងឆ្នាំ ២០២២ ដែលមាន ៤៧,៧ ពាន់លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋករ។ ចំណែកការនាំចេញរបស់កម្ពុជាកើនឡើង ១,៨% ហើយការនាំចូលថយចុះ ៥%។ ដោយឡែក ផលិតផលឧស្សាហកម្មកាត់ដេរនៅតែជាទំនិញនាំមុខគេក្នុងការនាំចេញ ខណៈដែលចិន អាមេរិក វៀតណាម ថៃ និងជប៉ុន ជាដៃគូពាណិជ្ជកម្មដ៏ធំរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:០៧
យោងតាមរបាយការណ៍គយ និងរដ្ឋករ ចិនគឺជាដៃគូពាណិជ្ជកម្មដ៏សំខាន់របស់កម្ពុជានៅឆ្នាំ២០២៣ ដោយទំហំពាណិជ្ជកម្មកម្ពុជា-ចិន មានជាង ១២ពាន់លានដុល្លារ ពោលកើនឡើង៥% ធៀបនឹងឆ្នាំ២០២២។ អាមេរិក ជាដៃគូសំខាន់ទី២ ដែលមានទំហំពាណិជ្ជកម្មជាង ៩ពាន់លានដុល្លារ ពោលធ្លាក់ចុះ ១,៤% ធៀបនឹងឆ្នាំ២០២២។
ក្រៅពីនេះ មានវៀតណាម ថៃ ជប៉ុន ឥណ្ឌូនេស៊ី អាល្លឺម៉ង់ កាណាដា និងប្រទេសមួយចំនួនទៀតសរុប២០ប្រទេស ដែលជាដៃគូពាណិជ្ជកម្មដ៏សំខាន់របស់កម្ពុជា ក្នុងនោះ មានការធ្លាក់ចុះខ្លាំងជាមួយប្រទេសជិតខាងថៃដល់ទៅ១៧% តែកើនជាមួយវៀតណាមជាង៧% ធៀបនឹងឆ្នាំ ២០២២។
ជាមួយគ្នានេះ មុខទំនិញចំនួន២០ ត្រូវបានលើកយកមកបង្ហាញនៅក្នុងរបាយការណ៍របស់គយដោយវិស័យវាយនភណ្ឌនៅតែជាវិស័យនាំមុខគេក្នុងការនាំចេញដែលមានចំណូលខ្ពស់នៅឆ្នាំ ២០២៣។ ក្រៅពីនេះ មានគ្រាប់ធញ្ញជាតិ ម៉ាស៊ីន និងឧបករណ៍អគ្គិសនី វត្ថុធ្វើអំពីស្បែក បរិកា្ខរធ្វើពីរោមសត្វ ស្បែកជើង កៅស៊ូ និងផលិតផលធ្វើពីកៅស៊ូ សុទ្ធសឹងជាទំនិញដែលកម្ពុជានាំចេញមានចំណូលខ្ពស់។
ទាក់ទងទៅនឹងទំហំពាណិជ្ជកម្មអន្តរជាតិកម្ពុជាឆ្នាំ២០២៣នេះ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចមួយរូបនៃរាជបណ្ឌិតសភាកម្ពុជាមើលឃើញថាការនាំចូលមានការថមថយ ៥% ក្នុងរយៈពេលខ្លី បញ្ជាក់ថាវិស័យលក់រាយនៅក្នុងស្រុកហាក់មានការជាប់គាំង ដោយសារតែវិបត្តិអចលនទ្រព្យក្នុងប្រទេសកម្ពុជា។
ដោយឡែក ការនាំចេញដែលមានកំណើន១,៨% ជាសក្ខីកម្មបញ្ជាក់ថា សេដ្ឋកិច្ចកម្ពុជានៅតែមានសកម្មភាពជំរុញឲ្យមានការនាំចេញ ខណៈដែលឧស្សាហកម្មធំៗ ផលិតនាំចេញមានការកើនឡើង។ទីផ្សារដែលជំរុញឲ្យមានកំណើននាំចេញគឺទីផ្សារអាមេរិក និងទីផ្សារនាំចេញទៅកាន់ប្រទេសសមាជិកRCEP ក៏មានសន្ទុះឡើងវិញដែរ ខណៈទីផ្សារចិន និងសហភាពអឺរ៉ុបមានការថមថយបន្តិច។ នេះបើតាមលោកបណ្ឌិត គី សេរីវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ