អ្នកវិភាគ៖ ជំនួបរវាងលោក ហ៊ុន ម៉ាណែតនិងក្រុមហ៊ុនបារាំង១០ នឹងមានលទ្ធផលវិជ្ជមាន
នៅថ្ងៃទី១៥ មករា ពោលប៉ុន្មានថ្ងៃមុនទស្សនកិច្ចផ្លូវការនៅប្រទេសបារាំង ប្រមុខរដ្ឋាភិបាលកម្ពុជាលោក ហ៊ុន ម៉ាណែត បានទទួលជួបក្រុមហ៊ុនធំៗ និងអង្គការអន្តរជាតិរបស់បារាំងជាង១០។ ជំនួបតែក្នុងមួយថ្ងៃត្រូវបានអ្នកវិភាគនយោបាយ និងសង្គមយល់ឃើញថា នឹងមានលទ្ធផលជាវិជ្ជមានសម្រាប់វិស័យវិនិយោគនៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:៥៣
ថ្នាក់ដឹកនាំក្រុមហ៊ុនធំៗរបស់បារាំង ដែលមានជំនួបជាមួយលោកនាយករដ្ឋមន្ត្រី ហ៊ុន ម៉ាណែត ក្នុងថ្ងៃចន្ទ ទី១៥ មករា រួមមានលោក Nicolas Notebaert ប្រធានក្រុមហ៊ុន VINCI Airports លោក Patrick POUYANNÉ ប្រធានក្រុមហ៊ុន Total Energies លោក Olivier Duguet ប្រធានក្រុមហ៊ុន Blue Circle លោក Geoffrey LADET នាយកប្រតិបត្តិក្រុមហ៊ុន Puy Du Fou Asia លោក Philippe DELLEUR អនុប្រធានជាន់ខ្ពស់ក្រុមហ៊ុន Alstom លោក Emmanuel Rochas នាយកប្រតិបត្តិក្រុមហ៊ុន Wholesale International Group លោកស្រី Maud BAILLY នាយិការប្រតិបត្តិ Sofitel, MGallery និង Emblems តំណាងឲ្យ ACCOR Group លោកស្រី Louise MUSHIKIWABO អគ្គលេខាធិការអង្គការអន្តរជាតិហ្វ្រង់កូហ្វូនី លោក Geoffroy Roux De Bezieux ប្រធានសម្ព័ន្ធនិយោជកហ្រ្វង់កូហ្វូន(APF)ជាដើម។
នៅក្នុងជំនួបជាមួយក្រុមហ៊ុនធំៗរបស់បារាំង លោក ហ៊ុន ម៉ាណែត តែងលើកឡើងពីសក្តានុពលសេដ្ឋកិច្ច និងបរិយាកាសវិនិយោគនៅកម្ពុជា ចង្អុលបង្ហាញពីច្បាប់វិនិយោគប្រកបដោយភាពអនុគ្រោះ និងលើកទឹកចិត្តដល់សកម្មភាពវិនិយោគ អនុវត្តនូវអភិក្រមដែលមានលក្ខណៈប្រាកដនិយមក្នុងការគាំទ្រដល់ការធ្វើវិនិយោគ។ល។និង។ល។
ជាការឆ្លើយតបវិញ តំណាងក្រុមហ៊ុនបារាំងនានាបានសម្តែងការចាប់អារម្មណ៍ក្នុងការវិនិយោគលើវិស័យផ្សេងៗគ្នានៅក្នុងប្រទេសកម្ពុជាដូចជាផ្នែកថាមពល អគ្គិសនី ការអភិវឌ្ឍន៍ទីក្រុង ការដឹកជញ្ជូន ទេសចរណ៍ និងព្រលានយន្តហោះជាដើម។
ដោយឡែកនៅក្នុងជំនួបរវាងលោកស្រី ល្វីស មូស៊ីគីវ៉ាបូ(Louise MUSHIKIWABO) អគ្គលេខាធិការអង្គការអន្តរជាតិហ្វ្រង់កូហ្វូនី និងប្រមុខរដ្ឋាភិបាលកម្ពុជា លោកស្រី MUSHIKIWABO បានបង្ហាញការគាំទ្របេក្ខភាពរបស់កម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីនៅឆ្នាំ២០២៦ និងបានស្នើដល់កម្ពុជាឲ្យបន្តចូលរួមចែករំលែកបទពិសោធន៍របស់កម្ពុជាក្នុងការថែរក្សាស្ថិរភាព សន្ដិភាពដល់បណ្ដាប្រទេសនិយាយភាសាបារាំងនៅក្នុងទ្វីបអាហ្វ្រិក និងបណ្ដាទ្វីបដទៃទៀត ក៏ដូចជាប្រទេសដែលមិនប្រើប្រាស់ភាសាបារាំង។
លោកបណ្ឌិត គិន ភា នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាមើលឃើញថា ជំនួបរវាងលោកនាយករដ្ឋមន្ត្រី ហ៊ុន ម៉ាណែត និងក្រុមហ៊ុនបារាំងធំៗពេលនេះ នឹងមានលទ្ធផលជាវិជ្ជមាន។ នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជារូបនេះសង្ឃឹមថា ក្រុមហ៊ុនបារាំងកាន់តែច្រើននឹងមានវត្តមាននៅកម្ពុជា ហើយការផ្លាស់ប្តូរពាណិជ្ជកម្មរវាងបារាំង និងកម្ពុជា កាន់តែមានទំហំធំឡើងទាំងនៅក្នុងក្របខ័ណ្ឌទ្វេភាគី ក៏ដូចជាពហុភាគី គឺរវាងកម្ពុជា និងសហភាពអឺរ៉ុប។
សូមរំលឹកថា បារាំងជាប្រទេសទី១ក្នុងតំបន់អឺរ៉ុប ដែលបានវិនិយោគច្រើនជាងគេនៅកម្ពុជា ដោយមានក្រុមហ៊ុនបារាំងប្រមាណជា៥០០ កំពុងធ្វើអាជីវកម្មជាប្រភេទអាជីវកម្មខ្នាតតូច មធ្យម និងខ្នាតធំ។
វិស័យដែលមានសក្តានុពល សម្រាប់ធុរកិច្ចបារាំងនៅកម្ពុជារួមមាន វិស័យកាត់ដេរសម្លៀកបំពាក់ ផលិតស្បែកជើង ទេសចរណ៍ និងសេវាកម្ម កសិកម្ម និងវិស័យថាមពលបៃតងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ