រដ្ឋាភិបាលប្រកាសស្តារ និងជំរុញការវិនិយោគក្នុងខេត្តព្រះសីហនុឆ្នាំ២០២៤
«កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ត្រូវបានប្រកាសដាក់ឲ្យអនុវត្តដោយលោកនាយករដ្ឋមន្ត្រី ហ៊ុន ម៉ាណែត នៅថ្ងៃទី៣១ ខែមករា ឆ្នាំ២០២៤នេះ នៅខេត្តព្រះសីហនុ។ ជាមួយគ្នានេះ រដ្ឋាភិបាលក៏បានបង្កើតក្រុមការងារមួយ ដើម្បីជំរុញវិនិយោគនៅក្នុងខេត្តដែលមានសមាសភាពចម្រុះ៣០រូប ដឹកនាំដោយរដ្ឋលេខាធិការមួយរូបមកពីក្រសួងហិរញ្ញវត្ថុ។
ចុះផ្សាយនៅថ្ងៃ៖
ស្តាប់ - ០២:៣៦
នៅចំពោះមុខមន្ត្រី និងប្រជាពលរដ្ឋជាច្រើននាក់នៅខេត្តព្រះសីហនុ លោកនាយករដ្ឋមន្ត្រី ហ៊ុន ម៉ាណែត បានថ្លែងថា ការប្រកាសដាក់ឲ្យអនុវត្ត «កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤» អាចចាត់ទុកជាជំហានជាក់ស្តែងថ្មីមួយទៀតនៅក្នុងទិសដៅស្តារឡើងវិញនៅក្នុងខេត្តនេះ។
ទន្ទឹមគ្នានេះ រដ្ឋាភិបាលកម្ពុជាក៏បានបង្កើតក្រុមការងារជំរុញការវិនិយោគក្នុងខេត្តព្រះសីហនុ ដែលមានសមាសភាពមកពីស្ថាប័នចម្រុះរបស់រដ្ឋចំនួន៣០រូប ដឹកនាំដោយលោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
យោងតាមឯកសារលម្អិត កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ នឹងត្រូវអនុវត្តចំពោះគម្រោងវិនិយោគ ឬសកម្មភាពធុរកិច្ចក្នុងឆ្នាំ២០២៤ ចំនួន៣ប្រភេទ រួមមាន ទី១ គម្រោងវិនិយោគ ឬសកម្មភាពធុរកិច្ចជាប់ពាក់ព័ន្ធនឹងអគារកំពុងជាប់គាំង និងការចាប់ផ្តើមអនុវត្តន៍នៅក្នុងឆ្នាំ២០២៤ ទី២ គឺគម្រោងវិនិយោគ ឬសកម្មភាពធុរកិច្ចមិនជាប់ពាក់ព័ន្ធនឹងអគារជាប់គាំង តែចាប់ផ្តើមដំណើរការបានភា្លមនៅឆ្នាំ២០២៤ និងទី៣ គឺគម្រោងវិនិយោគ ឬសកម្មភាពធុរកិច្ចមានស្រាប់ ស្របតាមលក្ខណៈវិនិច្ឆ័យជាក់លាក់ ដែលត្រូវផ្តើមដំណើរការនៅក្នុងឆ្នាំ២០២៤។
តាមរយៈគម្រោងស្តារឡើងវិញទាំងបីខាងលើ រដ្ឋក៏បង្ហាញនូវភាពអនុគ្រោះជាច្រើន ដូចជាការអនុគ្រោះពន្ធ អាករបន្ថែម មិនយកថ្លៃសេវាសាធារណៈ សម្រួលដល់បែបបទធុរៈកិច្ច និងមានជំនួយផ្លូវច្បាប់ក្នុងការដោះស្រាយវិវាទក្រៅប្រព័ន្ធតុលាការជាដើម។
សូមរំលឹកថាចាប់តាំងពីឆ្នាំ ២០១៦មក ការវិនិយោគក្នុងខេត្តព្រះសីហនុ មានសន្ទុះកើនឡើងយ៉ាងគំហុក ជាពិសេសមានការរីកដុះដាលយ៉ាងលឿនក្នុងចំនួនដ៏ច្រើននូវសំណង់អគារ ជាសណ្ឋាគារ ភោជនីយដ្ឋាន ហាងលក់ទំនិញ និងកន្លែងស្នាក់នៅ។ល។តែចាប់តាំងពីឆ្នាំ ២០១៩មក ការផ្លាស់ប្តូរតាមរយៈការវិវត្តន៍នៃស្ថានភាពសង្គម សេដ្ឋកិច្ច គួបផ្សំនឹងការមកដល់នៃវិបត្តិកូវីដ-១៩ និងបញ្ហាប្រឈមជាសកលផ្សេងៗទៀតបានធ្វើឲ្យសំណង់អគារជាច្រើនត្រូវបានផ្អាក ឬបញ្ឈប់ដំណើរការសាងសង់។ នេះបើតាមការលើកឡើងរបស់រដ្ឋមន្ត្រីក្រសួងហិរញ្ញវត្ថុ លោក អូនព័ន្ធ មុន្នីរ័ត្ន។
បច្ចុប្បន្ន អគារដែលត្រូវបានផ្អាកដំណើរការសាងសង់នៅខេត្តព្រះសីហនុមានចំនួន ៣៦២អគារ ដែលត្រូវការទុនវិនិយោគបន្ថែម ប្រមាណជាង ១ ១០០លានដុល្លារ ដើម្បីបញ្ចប់ការសាងសង់។ ចំណែកអគារដែលបានសាងសង់រួច តែពុំទាន់បានប្រើប្រាស់មានចំនួន ១៧៦អគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ