ក្រសួងរ៉ែ៖គ្មានកិច្ចព្រមព្រៀងលក់ខ្សាច់ទៅឲ្យវៀតណាមដូចការចុះផ្សាយរបស់ VN Express
អ្នកនាំពាក្យក្រសួងរ៉ែ និងថាមពលបានអះអាងនៅថ្ងៃទី១៦ ខែកុម្ភៈនេះថា គ្មានឡើយកិច្ចព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលវៀតណាមក្នុងការលក់ខ្សាច់ទៅឲ្យវៀតណាមដូចការចុះផ្សាយរបស់កាសែតវៀតណាម VN Expres កាលពីថ្ងៃទី៧កុម្ភៈទេ។ គួររម្លឹកថា VN Express បានចុះផ្សាយពីសំណើរបស់ក្រុមហ៊ុនTNT Group សុំសិទ្ធិនាំចូលខ្សាច់ពីកម្ពុជាដែលត្រូវបានភាគីកម្ពុជាអនុម័តឱ្យបូមខ្សាច់នៅផ្នែកមួយនៃទន្លេមេគង្គក្នុងបរិមាណរាប់រយលានម៉ែត្រគូប។
ចុះផ្សាយនៅថ្ងៃ៖
ស្តាប់ - ០២:១១
ថ្លែងប្រាប់វិទ្យុបារាំងអន្តរជាតិ RFI លោកអ៊ឹង ឌីប៉ូឡា អ្នកនាំពាក្យក្រសួងរ៉ែនិងថាមពលបានច្រានចោលយ៉ាងដាច់អហង្ការលើការចុះផ្សាយរបស់ VNExpres ដែលថា កម្ពុជាអនុម័តយល់ព្រមឲ្យក្រុមហ៊ុនវៀតណាមបូមខ្សាច់នៅផ្នែកមួយនៃទន្លេមេគង្គក្នុងបរិមាណរាប់រយលានម៉ែត្រគូប។ តាមលោកអ៊ឹង ឌីប៉ូឡា នីតិវិធីនៃការលក់ខ្សាច់ទៅឲ្យបរទេសត្រូវធ្វើឡើងតាមរយៈក្រុមហ៊ុននិងក្រុមហ៊ុន។
លោកអ៊ឹង ឌីប៉ូឡា បានលើកជាឧទាហរណ៍ថា បើមានក្រុមហ៊ុនមួយទទួលបានសិទ្ធិធ្វើអាជីវកម្មខ្សាច់នៅកម្ពុជា ក្រុមហ៊ុននោះមានសិទ្ធិលក់ខ្សាច់ដែលខ្លួនប្រមូលបានទៅឲ្យក្រុមហ៊ុនណា ឬប្រទេសណាជាសិទ្ធិរបស់គេ។ តាមអ្នកនាំពាក្យក្រសួងរ៉ែ និងថាមពលរូបនេះដដែល ការលក់ខ្សាច់ទៅបរទេសតាមរយៈក្រុមហ៊ុន និងក្រុមហ៊ុនធ្វើឡើងដោយមិនមានការរើសអើង ហើយអាជ្ញាធរស្វាគមន៍ប្រទេសនានាដែលចាប់អារម្មណ៍ចង់ទិញខ្សាច់ពីកម្ពុជា។ បច្ចុប្បន្ន មានក្រុមហ៊ុនចំនួន៣ទទួលបានអាជ្ញាបណ្ណពីក្រសួងរ៉ែនិងថាមពលពលដើម្បីធ្វើអាជីវកម្មខ្សាច់នៅកម្ពុជា។
គួរជម្រាបថា តាមការចុះផ្សាយរបស់សារព័ត៌មាន VN Express កាលពីថ្ងៃទី៧ កុម្ភៈ វៀតណាមសម្លឹងឃើញខ្សាច់ និងគ្រួសរបស់កម្ពុជាដើម្បីបំពេញកង្វះខាតនៅក្នុងគម្រោងអភិវឌ្ឍផ្លូវល្បឿនលឿនរបស់ខ្លួន។ តាម VN Express ដដែល ព័ត៌មានស្តីពីគម្រោងទិញខ្សាច់ និងគ្រួសពីកម្ពុជាធ្លាក់មក បន្ទាប់ពីក្រុមហ៊ុន TNT Group បានស្នើទៅនាយករដ្ឋមន្ត្រីវៀតណាមកាលពីខែតុលាឆ្នាំ២០២៣។
នៅចំពោះមុខចំណាប់អារម្មណ៍ចង់ទិញខ្សាច់ពីកម្ពុជា លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជាបានចោទជាសំណួរថា ហេតុអ្វីវៀតណាមមិនបូមខ្សាច់ខ្លួនឯងដើម្បីបំពេញតម្រូវការខ្វះខាតរបស់ខ្លួន? ទោះជាយ៉ាងណា អ្នកធ្វើការផ្នែកបរិស្ថានរូបនេះបន្តឲ្យជាយោបល់ថា មុនផ្ដល់អាជ្ញាបណ្ណទៅក្រុមហ៊ុនបរទេសបូមខ្សាច់ ក្រសួងរ៉ែ និងថាមពលត្រូវពិចារណាឲ្យបានល្អិតល្អន់ និងត្រូវធានាថា ដំណើរការបូមខ្សាច់មានកំណត់បរិមាណ មិនបង្កផលប៉ះពាល់ដល់ប្រជាពលរដ្ឋ និងមានស្តង់ដារនាំចេញច្បាស់លាស់។
គួររម្លឹកថាក្នុងឆ្នាំ២០២៣ កម្ពុជាទទួលបានពន្ធសួយសារលើកអាជីវកម្មខ្សាច់ និងពន្ធនាំចេញក្នុងទំហំទឹកប្រាក់ជាង ៤០លានដុល្លារសម្រាប់បរិមាណខ្សាច់ជាង១០លានតោន(១០,៩៦០,៧៨៩.៩៦)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ