បោះឆ្នោតព្រឹទ្ធសភា៖ អង្គបោះឆ្នោតបក្សប្រឆាំងជាង៥០០នាក់ បានបោះឲ្យបក្សកាន់អំណាច
លទ្ធផលបណ្តោះអាសន្ននៃការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ កាលពីថ្ងៃអាទិត្យ ទី២៥ កុម្ភៈ ឆ្នាំ២០២៤ ឲ្យដឹងថា គណបក្សប្រជាជនទទួលបានអាសនៈចំនួន៥៥ និងគណបក្សឆន្ទៈខ្មែរទទួលបាន ៣អាសនៈ។ តាមរយៈលទ្ធផលបឋមនេះ អង្គបោះឆ្នោតបក្សប្រឆាំងជាង៥០០នាក់បានបោះឲ្យបក្សកាន់អំណាច។ តែលោក សម រង្ស៊ី បានសរសើរដល់អង្គបោះឆ្នោតបក្សប្រឆាំង និងយល់ថា ជាបរិយាកាសនយោបាយដ៏លំបាកបំផុត។
ចុះផ្សាយនៅថ្ងៃ៖
ស្តាប់ - ០៣:២០
លទ្ធផលបណ្ណោះអាសន្ន ដែលចេញផ្សាយដោយគណៈកម្មាធិការជាតិរៀបចំការបោះឆ្នោត(គ.ជ.ប) បង្ហាញថា គណបក្សប្រជាជនកម្ពុជាទទួលបានអាសនៈព្រឹទ្ធសភាចំនួន៥៥ ជាមួយនឹង សំឡេងគាំទ្រ ១០ ០៥២ សម្លេង។ រីឯគណបក្សឆន្ទៈខ្មែរ ដែលជាបក្សប្រឆាំងទទួលបានត្រឹមតែ ៣អាសនៈ ជាមួយនឹងសម្លេងគាំទ្រ ១ ៣៩៤ សម្លេង។ ដោយឡែក គណបក្សកម្លាំងជាតិ ដែលមានការគាំទ្រ ២៣៤សម្លេង និងគណបក្សហ្វុនស៊ិនប៉ិចដែលមានការគាំទ្រ ១៩សម្លេងមិនទទួលបានអាសនៈអ្វីទាំងអស់។
លទ្ធផលបណ្តោះអាសន្ននេះ បង្ហាញថា អង្គបោះឆ្នោតរបស់គណបក្សភ្លើងទៀនសរុប ២ ១៩៨នាក់ ដែលមានគណបក្សឆន្ទៈខ្មែរជាតំណាង ត្រូវបានបែងចែកជាបីចំរៀក។ ក្រៅពីបោះឲ្យបក្សឆន្ទៈខ្មែរ សម្លេងនេះក៏បានច្រៀកទៅឲ្យបក្សកម្លាំងជាតិ និងបក្សកាន់អំណាចផងដែរ។ ដូច្នេះ ការសង្ឃឹមរបស់បក្សប្រឆាំងថានឹងអាចឈ្នះអាសនៈព្រឹទ្ធសភាពី៨ ទៅ ៩អាសនៈនោះបានធ្លាក់មកនៅត្រឹមតែ ៣អាសនៈប៉ុណ្ណោះ។
ទោះយ៉ាងណា លោក សម រង្ស៊ី ប្រធានស្តីទីអតីតគណបក្សសង្គ្រោះជាតិបានបញ្ចេញប្រតិកម្មតាមហ្វេសប៊ុកដោយសរសើរ និងបានហៅការទទួលបាន ៣អាសនៈព្រឹទ្ធសភារបស់គណបក្សឆន្ទៈខ្មែរថាជាជោគជ័យមួយសម្រាប់កម្លាំងប្រជាធិបតេយ្យខ្មែរយោងទៅតាមស្ថានភាពនយោបាយដ៏លំបាកជាទីបំផុតនៅពេលនេះ។ ស្ថានភាពលំបាកដែលលោក សម រង្ស៊ី លើកឡើង គឺជាការបោះឆ្នោតមួយដែលប្រព្រឹត្តទៅក្នុងបរិយាកាសគំរាមកំហែង និងទិញដូរសន្លឹកឆ្នោតដ៏អាប់អួរជាទីបំផុត។
បន្ថែមពីនេះ លោក លី សុធារ៉ាយុត្តិ អគ្គលេខាធិការគណបក្សភ្លើងទៀនបានប្រាប់វិទ្យុបារាំង RFI នៅថ្ងៃចន្ទ ទី២៦ កុម្ភៈ នេះដែរថា ទោះលទ្ធផលនៃការបោះឆ្នោតនេះខុសពីអ្វីដែលជាការរំពឹងទុកក៏ដោយ ក៏វាជាមោទនភាពមួយសម្រាប់គណបក្សភ្លើងទៀន ក៏ដូចជាគណបក្សឆន្ទៈខ្មែរដែរ។ តាមលោក លី សុធារ៉ាយុត្តិ លទ្ធផលនេះបានឆ្លុះបញ្ចាំងពីភាពស្មោះត្រង់របស់អង្គបោះឆ្នោតគណបក្សភ្លើងទៀន។ ដោយលើកឡើងពីការគំរាមកំហែង និងការទិញទឹកចិត្តពីអ្នកមានឥទ្ធិពលនៅមុនបោះឆ្នោត លោក លី សុធារ៉ាយុត្តិបានបន្តថា លោកគាំទ្រសិទ្ធិអង្គបោះឆ្នោតដែលបោះឲ្យគណបក្សកម្លាំងជាតិ និងថាលោកមិនគាំទ្រអង្គបោះឆ្នោតណាដែលលក់សន្លឹកឆ្នោតខ្លួនដើម្បីលាបសក្ការៈទេ។
ក៏ប៉ុន្តែ អ្នកនាំពាក្យគណបក្សប្រជាជនកម្ពុជាលោក សុខ ឥសាន ក៏ដូចជា គ.ជ.ប បានហៅបរិយាកាសនៃការបោះឆ្នោតព្រឹទ្ធសភាប្រព្រឹត្តទៅដោយរលូន ពោលគ្មានឧបសគ្គ ឬអំពើហិង្សាអ្វីកើតឡើងឡើយ។ លោក សុខ ឥសាន ទទួលស្គាល់ថា ពិតជាមានបរិយាកាសនយោបាយអាប់អួរនៃការបោះឆ្នោតព្រឹទ្ធសភាមែន តែកើតឡើងដោយសារតែជម្លោះរវាងបក្សប្រឆាំង និងបក្សប្រឆាំង ពោលមិនទាក់ទងនឹងគណបក្សប្រជាជនទេ។
រីឯការទិញលក់សន្លឹកឆ្នោតវិញត្រូវបានអ្នកនាំពាក្យបក្សកាន់អំណាចរូបនេះបញ្ជាក់ថា ជារឿងមិនពិតព្រោះការដែលមានអង្គបោះឆ្នោតបក្សប្រឆាំងមួយចំនួនបានបោះឲ្យគណបក្សប្រជាជនដោយសារតែពួកគេធុញទ្រាន់នឹងជម្លោះផ្ទៃក្នុងបក្សប្រឆាំង។
សូមបញ្ជាក់ថា សមាជិកព្រឹទ្ធសភានីតិកាលទី៥នេះមានចំនួនដូចនឹង អាណត្តិមុនៗដែរ ពោលមាន សរុបចំនួន ៦២រូប ក្នុងនោះ មានមកពីគណបក្សដែលជាប់ឆ្នោតចំនួន៥៨រូប ២រូបជ្រើសតាំងដោយរដ្ឋសភា និង២រូបទៀតជ្រើសតាំងដោយព្រះហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ