យុវជនស្នើដោះលែង លោក កើត សារ៉ាយ ខណៈសមត្ថកិច្ចត្រៀមបញ្ជួនទៅតុលាការ
ក្រុមយុវជនចំនួន១១នាក់ នៅថ្ងៃសៅរ៍នេះ បាននាំគ្នាទៅឈរលើកបដានៅមុខស្នងការដ្ឋាននគរបាលរាជធានីភ្នំពេញ ដោយទាមទារឱ្យដោះលែង លោក កើត សារ៉ាយ ប្រធានសមាគមនិស្សិតបញ្ញវន្តខ្មែរ-KSILA ។ សកម្មជនសង្គមរូបនេះ ត្រូវបានសមត្ថកិច្ចចុះទៅចាប់ខ្លួនដល់ក្នុងទីស្នាក់ការសមាគមនៅទីក្រុងភ្នំពេញ កាលពីរសៀលថ្ងៃទី៥ ខែមេសា ឆ្នាំ២០២៤ ខណៈអាជ្ញាធរខេត្តព្រះវិហារបានបង្គាប់ឲ្យ លោក កើត សារ៉ាយ ចូលខ្លួនទៅបំភ្លឺជុំវិញជម្លោះដីធ្លីនៅស្រុកគូលែន។ នេះបើតាមសមាគមបណ្តាញយុវជនកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
តែអ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា បានប្រាប់វិទ្យុបារាំងអន្តរជាតិ RFI នៅថ្ងៃទី៦ខែមេសាថា ការចាប់ខ្លួន លោក កើត សារ៉ាយ ធ្វើឡើងទៅតាមការបញ្ជាឲ្យចូលខ្លួន របស់ លោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ។ តំណាងអយ្យការបានចោទប្រកាន់ ធានសមាគមនិស្សិតបញ្ញវន្តខ្មែររូបនេះពីបទ«ញុះញង់បង្កឲ្យមានភាពវឹកវដល់សង្គម និងមិនរាងចាល» ទាក់ទងនឹងជម្លោះដីធ្លីនៅស្រុកគូលែន។
ជម្លោះដីធ្លីនៅស្រុកគូលែន ដែលមានការបង្ក្រាប កាលពីថ្ងៃទី៦មីនា ឆ្នាំ២០២៤ ធ្វើឲ្យពលរដ្ឋមួយចំនួនរួមទាំងកុមារផង ត្រូវបានគេអះអាងថា បានរត់ចូលព្រៃគេចពីការចាប់ខ្លួន។
លោក កើត សារ៉ាយ បានទៅជួបសម្ភាសពលរដ្ឋទាំងនោះ និងបញ្ជួនរូបភាព និងវីដេអូទៅឲ្យប្រព័ន្ធផ្សព្វផ្សាយនៅក្រៅប្រទេសផ្សាយបន្ត ប៉ុន្តែសមត្ថកិច្ចចាត់ទុកថា នេះជាសកម្មភាពញុះញង់នាំឲ្យពលរដ្ឋខឹងសម្បារនឹងរដ្ឋាភិបាល។
បើតាម លោក សំ វិចិ្ឆកា សមត្ថកិច្ចកំពុងកសាងសំណុំរឿង និងបញ្ជួនខ្លួន លោក កើត សារ៉ាយ ទៅតុលាការ។
សូមរំឭកថា លោក កើត សារ៉ាយ ត្រូវបានចាប់ខ្លួនជាលើកទី២ហើយ។ ចាប់ខ្លួនលើកទី១កាលពីអំឡុងខែសីហា ឆ្នាំ២០២០ នៅក្នុងភេទជាសង្ឃនៅឡើយ ក្រោយពេលអតីតសង្ឃអង្គនេះនិងក្រុមយុវជនផ្សេងទៀតបានចូលរួមតវ៉ាដើម្បីឱ្យមានការដោះលែង លោក រ៉ុង ឈុន ដែលត្រូវបានចាប់ខ្លួនក្រោមបទចោទ «ញុះញង់ឱ្យមានភាពវឹកវរដល់សន្តិសុខសង្គម»។ កាលណោះ លោក កើត សារ៉ាយ ត្រូវបានតុលាការកាត់ទោសឱ្យជាប់ពន្ធនាគារ រយៈពេល២០ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ