លោក យ៉េង វីរៈ ដកខ្លួនចេញពីប្រធានគណបក្សប្រជាធិបតេយ្យមូលដ្ឋាន
ក្បាលម៉ាស៊ីនដឹកនាំគណបក្សប្រជាធិបតេយ្យមូលដ្ឋានត្រូវបានរុះរើ ចេញជាផ្លូវការនៅថ្ងៃអាទិត្យនេះ តាមរយៈការធ្វើសមាជដើម្បីបោះឆ្នោតជ្រើសរើសប្រធានគណៈកម្មាធិការទាំង៣របស់គណបក្សនេះ។ លោក យ៉េង វីរៈ បានដកខ្លួនចេញពីប្រធានប្រតិបត្តិគណបក្សនេះ ខណៈ លោកស្រី ប្រុក វ៉ាន្នី ដកខ្លួនចេញពីប្រធានគណៈកម្មាធិការដោះស្រាយវិវាទ និងវិន័យ។
ចុះផ្សាយនៅថ្ងៃ៖
ស្តាប់ - ០១:៤៧
លទ្ធផលនៃការធ្វើសមាជនៅថ្ងៃទី៧ខែមេសានេះ គឺ លោក សេក សុខា ត្រូវបានអង្គសមាជគាំទ្រដោយសំឡេងគាំទ្រ១៤៨ លើ១៥៩ជាប់ជាប្រធានគណៈកម្មាធិការប្របតិបត្តិគណបក្សប្រជាធិបតេយ្យមូលដ្ឋានជំនួសលោក យ៉េង វីរៈ ដែលមិនឈរឈ្មោះបន្ត។
ចំណែក ប្រធានគណកម្មាធិការនាយក ត្រូវបានជំនួស ដោយ លោក មាន អ៊ាង ទទួលបានសំឡេងគាំទ្រ១៥៤លើ១៥៩ ខណៈ លោក ធួក បូណា ជាប់ជាប្រធានគណៈកម្មាធិការដោះស្រាយវិវាទ និងវិន័យ ជំនួស លោកស្រី ប្រុក វ៉ាន្នី ដែលដកខ្លួនចេញ។
លោក ធួក បូណា ប្រាប់វិទ្យុបារាំងអន្តរជាតិRFI ថា មូលហេតុដែល លោក យ៉េង វីរៈ និងលោកស្រី ប្រុក វ៉ាន្នី ដកខ្លួនចេញមិនឈរឈ្មោះតទៅទៀត គឺដោយគោលការណ៍ផ្ទៃក្នុងគណបក្សបានកំណត់អាណត្តិត្រឹម១០ឆ្នាំ។
បើតាម លោក ធួក បូណា អតីតស្ថាបនិក លោក យ៉េង វីរៈ និងលោកស្រី ប្រុក វ៉ាន្នីនៅតែបន្តជួយពីក្រោយគណបក្សប្រជាធិបតេយ្យមូលដ្ឋាន តាមរយៈ ជាគំនិត និងការគាំទ្រ។
សូមបញ្ជាក់ថា គណបក្សប្រជាធិបតេយ្យមូលដ្ឋាន ទទួលបាន៦អាសនៈ ក្នុងការបោះឆ្នោតក្រុមប្រឹក្សាឃុំសង្កាត់កាលពីខែមិថុនាឆ្នាំ២០២២ ខណៈការបោះឆ្នោតតំណាងរាស្ត្រកាលពីខែកក្កដាឆ្នាំ២០២៣ គណបក្សនេះ មិនទទួលបានអាសនៈនោះឡើយ។
អតីតក្បាលម៉ាស៊ីនដឹកនាំ គណបក្សប្រជាធិបតេយ្យមូលដ្ឋាន ដូចជា លោក បណ្ឌិត យ៉ង សាំងកុមារ និងលោក បណ្ឌិត សាម អ៊ីន បានទៅចុះចូលជាមួយគណបក្សប្រជាជនកម្ពុជា តាំងពីក្រោយការបោះឆ្នោតឃុំ សង្កាត់ ឆ្នាំ២០២២ មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ