អ្នកនាំពាក្យក្រសួងមហាផ្ទៃ៖គ្មានគោលការណ៍ឲ្យយកលុយពីពលករមកពីថៃនោះទេ
អ្នកនាំពាក្យក្រសួងមហាផ្ទៃ បានអះអាងនៅថ្ងៃអាទិត្យនេះថា គ្មានគោលការណ៍ណាមួយអនុញ្ញាតឲ្យមានការយកលុយពីពលរដ្ឋខ្មែរដែលវិលត្រឡប់ពីប្រទេសថៃដើម្បីមកចូលឆ្នាំនៅកម្ពុជានោះឡើយ។ ការអះអាងយ៉ាងដូច្នេះ គឺជាការឆ្លើយតបទៅនឹងការបង្ហោះវីដេអូនៅតាមបណ្តាញសង្គមប៉ុន្មានថ្ងៃមកនេះ ដែលពលករមួយចំនួនរអ៊ូរទាំពីការរងចាំយូរទម្រាំបានបោះត្រាចូលមកកម្ពុជា ហើយថា បើចង់បានសេវាកម្មលឿនគឺត្រូវបង់លុយទៅឲ្យមន្ត្រី៤០០បាត ឬប្រមាណ១១ដុល្លារ។
ចុះផ្សាយនៅថ្ងៃ៖
ស្តាប់ - ០២:៣៧
ប្រាប់វិទ្យុបារាំងអន្តរជាតិ RFI នៅថ្ងៃទី៧ខែមេសា លោក ទូច សុខៈ អ្នកនាំពាក្យរងក្រសួងមហាផ្ទៃ បានបញ្ជាក់ថា មន្ត្រីជំនាញបានដោះស្រាយជាប្រចាំក្រោយពីមានការបង្ហោះព័ត៌មានទាក់ទងនឹងការយឺតយ៉ាវក្នុងការផ្តល់សេវារបស់មន្ត្រីច្រកទ្វារព្រំដែនមួយចំនួន។
បើតាមអ្នកនាំពាក្យរូបនេះ ការកកស្ទះនោះគឺដោយសារតែចំនួនពលករសម្រុកចូលច្រើនក្នុងពេលតែមួយ ខណៈចំនួនមន្ត្រីប្រចាំការនៅច្រកទ្វារព្រំដែនមានចំនួនកំណត់។ ទន្ទឹមគ្នានោះ លោក ទូច សុខៈ បានអះអាងថា គ្មានគោលការណ៍ណាមួយអនុញ្ញាតឲ្យមានការយកលុយពីពលរដ្ឋខ្មែរដែលវិលពីប្រទេសថៃដើម្បីមកចូលឆ្នាំនៅកម្ពុជានោះឡើយ។
ចំណែក លោក កឹម ចំរើន មន្ត្រីនៅក្រសួងការងារទទួលបន្ទុកពលករខ្មែរនៅថៃ បានអះអាងថា មានពលករប្រមាណ២០០នាក់បានសម្រុកមកនៅពេលព្រឹក ហើយជាធម្មតា ពួកគេត្រូវរងចាំ២០ទៅ៣០នាទីឬយ៉ាងយូរ១ម៉ោងដើម្បីវាយត្រាចេញ។
បើតាមមន្ត្រីដដែល គឺមន្ត្រីច្រកទ្វារព្រំដែនត្រូវធ្វើការតាំងពីម៉ោង៦ព្រឹករហូតដល់ម៉ោង១០យប់ ប៉ុន្តែអត់ល្បីដូចព័ត៌មានដែលត្រូវបានបង្ហោះនិយាយពីការយឺតយ៉ាវខ្លះក្នុងការផ្តល់សេវាកម្មរបស់មន្ត្រីនោះឡើយ។
ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃ ទី១ មេសា លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានបញ្ជាក់ថា នៅថ្ងៃដំបូងនោះ មានពលករខ្ទង់២ពាន់នាក់បានឆ្លងកាត់ច្រកអន្តរជាតិប៉ោយប៉ែតដោយមិនមានការកកស្ទះនោះឡើយ។ បើតាមអភិបាលរងខេត្តរូបនេះ ទោះជាពលករសម្រុកមកច្រើនជាងនេះ នៅពេលខាងមុខ ក៏អាជ្ញាធរធានាមិនឲ្យមានការកកស្ទះ និងមិនឲ្យមានការយកកម្រៃក្រៅផ្លូវការជាដាច់ខាត។
សូមបញ្ជាក់ថា ភាគីថៃបានយល់ព្រមមិនយកថ្លៃសេវាចេញ-ចូល (Re-entry) ចាប់ពីថ្ងៃទី០១ មេសា ដល់ថ្ងៃទី១៥ ឧសភា ឆ្នាំ ២០២៤ តាមសំណើររបស់នាយករដ្ឋមន្ត្រីកម្ពុជា។ បើតាមមន្ត្រីការងារថ្លៃសេវាចេញ-ចូល នោះពលករម្នាក់ត្រូវចំណាយ១០០០បាតឬស្មើជាង២៧ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ