លោក ហ៊ុន សែនព្រមអនុគ្រោះឲ្យមុំ អាហ្សានី តែមិនលើកលែងឲ្យ លោក សម រង្ស៊ី
ប្រមុខគណបក្សកាន់អំណាច លោក ហ៊ុន សែន បានយល់ព្រមអនុគ្រោះដល់លោក អ៊ឹម សុផល ហៅ មុំ អាហ្សានី ដែលតែងតែវាយប្រហារត្រកូលហ៊ុនតាមរយៈសារព័ត៌មាន ឌឺ ខាមបូឌា ដេលីកន្លងមក។ ការយល់ព្រមអនុគ្រោះនេះធ្វើឡើង បន្ទាប់ពីលោក មុំ អាហ្សានី បានចេញមុខសុំទោស លោក ហ៊ុន សែន និងបានទម្លាក់កំហុសដាក់ក្រុម លោក សម រង្ស៊ី ថាជាអ្នករៀបចំឆាកឲ្យវាយប្រហារត្រកូលហ៊ុន។
ចុះផ្សាយនៅថ្ងៃ៖
ស្តាប់ - ០២:៣៦
តាមរយៈសារនៅក្នុងតេឡេក្រាមចេញថ្ងៃទី១៧ ខែមេសានេះ លោកហ៊ុន សែនបានថ្លែងថា លោកយល់ពីមូលហេតុដែលនៅពីក្រោយការវាយប្រហារលើក្រុមគ្រួសាររបស់លោកពីសំណាក់លោក មុំ អាហ្សានីនាពេលកន្លងមក។ អតីតនាយករដ្ឋមន្ត្រីកម្ពុជារូបនេះបានបញ្ជាក់ថា តាំងពីដើមមក លោក មុំ អាហ្សានីដែលជាអតីតមន្ត្រីយោធាលំហសមុទ្រមិនដែលមានទំនាស់អ្វីទាល់តែសោះជាមួយក្រុមគ្រួសាររបស់លោក និងថា លោក មុំ អាហ្សានីក៏គ្មានសាលដីកាដែលត្រូវអនុវត្តទោសដែរ។
តែលោក ហ៊ុន សែន ចោទថា រាល់ការ វាយប្រហាររបស់លោក មុំ អាហ្សានីលើត្រកូល ហ៊ុន គឺ រៀបចំដោយលោក សម រង្ស៊ីដែលលោកហ៊ុន សែនហៅជាជនក្បត់ជាតិ ៣ជំនាន់។ ចំណែកនៅក្នុងសារសុំទោសរបស់ លោក មុំ អាហ្សានីដែលថតចំនួន២ឃ្លីបក៏បាន ចោទលោក អេង ឆៃអ៊ាង និងលោកឡុង រីដែលជាមនុស្សស្និទនឹងលោក សម រង្ស៊ីថាជាអ្នករៀបចំឆាកឲ្យរូបលោកធ្វើជាវាគ្មិនប្រចាំនៅ ឌឺ ខាមបូឌា ដេលីដើម្បីវាយប្រហារលោក ហ៊ុន សែន។
ទោះជាយ៉ាងណា គេនៅមិនទាន់ឃើញមានប្រតិកម្មពីលោក សម រង្ស៊ី និងមន្ត្រីស្និទរបស់លោកមួយចំនួនដែលត្រូវបានលោក មុំ អាហ្សានីចោទប្រកាន់នៅឡើយទេ។
សូមរំឭកថា លោក មុំ អាហ្សានីបានធ្វើឲ្យគេចាប់ អារម្មណ៍កាលពីអំឡុងឆ្នាំ២០២៣ ខណៈលោកតែងតែចូលរួមជាវាគ្មិននៅក្នុងកម្មវិធី Idea Talk របស់សារព័ត៌មានឌឺ ខាមបូឌា ដេលីរបស់លោក តាំង សារដា ដែលមានមូលដ្ឋាននៅសហរដ្ឋអាមេរិក។
នៅពេលចូលរួមកម្មវិធី Idea Talk ដំបូងៗ អតីតមន្ត្រីយោធាលំហសមុទ្ររូបនេះបានអះអាងថា លោកជាជនរងគ្រោះម្នាក់ដែលបានគេចផុតពីប៉ុនប៉ងសម្លាប់បំបិទមាត់ពីសំណាក់អ្នកមានអំណាចនៅកម្ពុជា។ បន្ទាប់មកលោក និងក្រុមគ្រួសារទទួលបានសិទ្ធិជ្រកកោននៅប្រទេសញ៉ូវហ្សឺលែន។ ក៏ប៉ុន្តែ នៅពេលដែលលោក មុំ អាហ្សានី បង្កើនការវាយប្រហារមិនសំចៃមាត់ទៅលើក្រុមគ្រួសារត្រកូលហ៊ុន ស្រាប់តែសារព័ត៌មាន Fresh News បានផ្សាយវីដេអូមួយដែលថា មុំ អាហ្សានី គឺជាជនឆបោកប្រាក់ និងត្រូវបានសមត្ថកិច្ចចាប់ខ្លួនកន្លងមក។ចំណែកវីដេអូមួយទៀតរបស់ Fresh News ផ្សាយនៅថ្ងៃទី០៨ ខែមិថុនា ឆ្នាំ២០២៣ បានបង្ហាញលោក មុំ អស្សនីដែលបាននិយាយសុំការលើកលែងទោសពីលោកហ៊ុន ម៉ាណែត និង លោក ហ៊ុន សែន ហើយស្នើសុំធ្វើជាបណ្តាញរបស់លោក ហ៊ុន ម៉ាណែតដើម្បីបង្កប់ខ្លួននៅក្នុងគណបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ