លោកហ៊ុន ម៉ាណែតស្វាគមន៍ការស្នើសុំវិលចូលស្រុកវិញរបស់លោកគង់ សភា
នៅល្ងាចថ្ងៃទី១៨មេសា ឆ្នាំ២០២៤នេះ លោកហ៊ុន ម៉ាណែតនាយករដ្ឋមន្ត្រីកម្ពុជា បានប្រកាសស្វាគមន៍ការវិលចូលស្រុកវិញរបស់លោកគង់ សភា ដែលជាអតីតតំណាងរាស្ត្រនៃអតីតគណបក្សសង្គ្រោះជាតិ។ ការស្វាគមន៍នេះធ្វើឡើង បន្ទាប់ពីលោក គង់ សភា ចេញលិខិតស្នើឱ្យលោកហ៊ុន ម៉ាណែតជួយអន្តរាគមន៍ទៅព្រះមហាក្សត្រប្រោសប្រទានការលើកលែងទោសលោក ដើម្បីវិលមកមើលថែគ្រួសារដែលចាស់ជរា។
ចុះផ្សាយនៅថ្ងៃ៖
ស្តាប់ - ០១:២០
ក្នុងទំព័រហ្វេសប៊ុកនៅថ្ងៃទី១៨មេសា ឆ្នាំ២០២៤ លោកហ៊ុន ម៉ាណែតបានប្រកាសស្វាគមន៍ការស្នើសុំវិលចូលប្រទេសកម្ពុជាវិញរបស់លោក គង់ សភា អតីតតំណាងរាស្ត្រខេត្តស្វាយរៀងនៃអតីតគណបក្សសង្គ្រោះជាតិ។ តាមលោកហ៊ុន ម៉ាណែត និតិវិធីច្បាប់ដើម្បីអនុញ្ញាតឱ្យលោកគង់ សភា វិលត្រលប់មកកម្ពុជានឹងចាត់ចែងធ្វើឡើង ហើយការជួបសន្ទនាគ្នារវាងលោក គង់ សភា និងលោក ហ៊ុន ម៉ាណែតក៏ត្រូវធ្វើឡើងផងដែរ។ នេះបើតាមការបញ្ជាក់បន្ថែមរបស់លោកហ៊ុន ម៉ាណែត។
គួរជ្រាបថា លោកគង់ សភាបានផ្ញើលិខិតមួយចុះថ្ងៃទី៩ ខែកុម្ភៈ ឆ្នាំ២០២៤ ទៅកាន់លោកហ៊ុន ម៉ាណែត ឱ្យជួយអន្តរាគមន៍ថ្វាយព្រះមហាក្សត្រប្រោសប្រទានការលើកលែងទោសទណ្ឌទាំងឡាយដើម្បីឲ្យលោកអាចនឹងវិលចូលប្រទេសជាតិវិញមើលថែឪពុកម្ដាយដែលចាស់ជរា។ តាមរយៈលិខិតដដែល លោក គង់ សភា ដែលកំពុងភៀសខ្លួនរស់នៅក្នុងប្រទេសកាណាដាបានបង្ហាញការសោកស្ដាយដោយបញ្ជាក់ថា រាល់ទង្វើ និងសកម្មភាពមួយចំនួនកន្លងមកបានធ្វើឱ្យប៉ះពាល់ដល់ការអភិវឌ្ឍ សន្ដិភាព ស្ថិរភាព និងគោលនយោបាយនានារបស់រដ្ឋាភិបាល។
សូមជម្រាបថា លោកគង់ សភា ជាកូនប្រុសមួយរូបរបស់លោកគង់ គាំ ដែលធ្លាប់រងការវាយដំឲ្យរបួសធ្ងន់ពីសំណាក់ក្រុមបាតុករដែលមាននិន្នាការទៅរកបក្សកាន់អំណាច កាលពីឆ្នាំ២០១៥ ដោយនៅពេលនោះលោក គង់ សភា នៅជាតំណាងរាស្ត្រ។ លោកគង់ សភា ត្រូវបានគណៈកម្មការរៀបចំការបោះឆ្នោតរាជធានីភ្នំពេញលុបឈ្មោះចេញពីបញ្ជីបោះឆ្នោត និងដកសិទ្ធិលោកមិនឱ្យឈរឈ្មោះឲ្យគេបោះឆ្នោតចំនួន ២០ឆ្នាំកាលពីខែកក្កដា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ