តំណាងកម្ពុជានៅUN ខកចិត្តនឹងការលើកឡើងរបស់អ្នកជំនាញពីការយាយីសិទ្ធិមនុស្ស
តំណាងកម្ពុជាប្រចាំអង្គការសហប្រជាជាតិនៅទីក្រុងហ្សឺណែវ បានសំដែងការខកចិត្តយ៉ាងខ្លាំងចំពោះសេចក្តីថ្លែងការណ៍រួមរបស់អ្នកជំនាញអង្គការសហប្រជាតិ នៅថ្ងៃទី១៨ ខែមេសា ឆ្នាំ២០២៤ ដែលបានគូសបញ្ជាក់ថា កម្ពុជាមានការយាយី និងធ្វើទុក្ខបុកម្នេញអ្នកការពារសិទ្ធិមនុស្ស។ អ្នកជំនាញអង្គការសហប្រជាជាតិ ដែលបានអំពាវនាវឱ្យកម្ពុជាបញ្ចប់រាល់ទង្វើនៃការយាយី និងការកាត់ទោសលើអ្នកការពារសិទ្ធិមនុស្ស និងសកម្មជនសង្គម ហើយអនុញ្ញាតឱ្យពួកគេអនុវត្តសិទ្ធិស៊ីវិល និងសិទ្ធិនយោបាយដោយសេរី។
ចុះផ្សាយនៅថ្ងៃ៖
ស្តាប់ - ០៣:០៩
នៅក្នុងសេចក្តីថ្លែងការណ៍ពីទីក្រុងហ្សឺណែវ អ្នកជំនាញបាននិយាយថា «ពួកគេកំពុងមើលឃើញការអនុវត្តដែលរំលោភសិទ្ធិសេរីភាពក្នុងការបញ្ចេញមតិ ការបង្កើតសមាគម និងការជួបប្រជុំដោយសន្តិវិធី ដូចដែលបានធានាក្នុងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ (ICCPR)»។
បើតាមអ្នកជំនាញ«នេះប្រាកដជានឹងបន្តជះឥទ្ធិពលយ៉ាងខ្លាំងដល់ការងារសិទ្ធិមនុស្សក្នុងប្រទេសកម្ពុជា ហើយអាចរារាំងមនុស្សជាច្រើនពីការចូលរួមក្នុងបញ្ហាសិទ្ធិមនុស្ស»។
ត្រង់ចំណុចនេះតំណាងកម្ពុជាប្រចាំអង្គការសហប្រជាជាតិ បានបកស្រាយថា ការលើកឡើងរបស់អ្នកជំនាញសិទ្ធិមនុស្សគឺជាការភាន់ច្រឡំ និងមិនឆ្លុះបញ្ចាំងពីតថភាពនៅកម្ពុជាឡើយ។
បើតាមតំណាងកម្ពុជា ការអនុវត្តសិទ្ធិ និងសេរីភាពតាមបែបប្រជាធិបតេយ្យមិនអាចកាត់ផ្តាច់ពីនីតិរដ្ឋទេ ហើយថា នៅកម្ពុជាក៏ដូចនៅប្រទេសដទៃដែរ ជនល្មើសគឺត្រូវចោទប្រកាន់ និងកាត់ទោស ដោយផ្អែកលើបទល្មើសដែលបានប្រព្រឹត្តិ។
ទោះជាយ៉ាងណា អ្នកជំនាញអង្គការសហប្រជាជាតិបានគូសរំលេចពីការចាប់ខ្លួន លោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវន្តខ្មែរ (KSILA)នៅថ្ងៃទី៥ខែមេសា ថ្មីៗនេះ ។
ការចាប់ខ្លួនដែលត្រូវបានគេរាយការណ៍ថាបានអនុវត្តតាមដីការបស់តុលាការពីបទ "ញុះញង់ឱ្យបង្កភាពវឹកវរធ្ងន់ធ្ងរដល់សន្តិសុខសង្គមនិងមិនរាងចាល" នោះត្រូវបានអ្នកជំនាញជឿថាមានទំនាក់ទំនងជាមួយនឹងការអនុវត្តសិទ្ធិសេរីភាពក្នុងការបញ្ចេញមតិ។ ប៉ុន្តែករណីនេះត្រូវបានតំណាងកម្ពុជាឆ្លើយតបថា ការចាប់ខ្លួននេះគឺជាបទល្មើសដែលមានចែងក្នុងច្បាប់ ហើយថាគេមិនអាចប្រើប្រាស់សកម្មភាពខុសច្បាប់ សម្រាប់បុព្វហេតុណាមួយផ្សេងឡើយ។
ក៏ប៉ុន្តែ អ្នកជំនាញសិទ្ធិមនុស្ស បាននិយាយថា «រដ្ឋាភិបាលថ្មីគួរតែដើរលើមាគ៌ាផ្សេងពីរដ្ឋាភិបាលចាស់ ហើយគោរពតាមការប្តេជ្ញាចិត្តរបស់ខ្លួនចំពោះសិទ្ធិមនុស្ស និងចាត់វិធានការប្រកបដោយប្រសិទ្ធភាពដើម្បីការពារសិទ្ធិសេរីភាពក្នុងការបញ្ចេញមតិ និងការជួបប្រជុំដោយសន្តិវិធី ដែលមានសារៈសំខាន់នៅក្នុង សង្គមប្រជាធិបតេយ្យ»។ ពួកគេបានអំពាវនាវឱ្យ «លុបចោលច្បាប់ក្រមនីតិវិធីព្រហ្មទណ្ឌ ជាពិសេចំណុច ដែលមិនស្របតាមស្តង់ដារអន្តរជាតិ។ ពួកគេក៏ជំរុញឲ្យចូលរួមសន្ទនាជាមួយគណបក្សប្រឆាំង និងតួអង្គសង្គមស៊ីវិល គោរពភាពចម្រុះនៃមតិ និងធានាថាច្បាប់របស់កម្ពុជា ស្របតាមស្តង់ដាសិទ្ធិមនុស្សអន្តរជាតិ និងសេចក្តីប្រកាសស្តីពីសិទ្ធិមនុស្ស»។
ទោះជាយ៉ាងណា តំណាងកម្ពុជា បានចាត់ទុកការអំពាវនាវនេះថាជាការវាយតម្លៃមិនត្រឹមត្រូវ និងអយុត្តិធម៌ចំពោះស្ថានភាពសិទ្ធិមនុស្សនៅកម្ពុជា ដោយគូសបញ្ជាក់ថាមានអង្គការ សមាគម ជាង៦០០០ត្រូវបានចុះបញ្ជី និងមានបណ្តាញផ្សព្វផ្សាយឌីជីថល និងប្រពៃណីជាង២០០០ ស្ថាប័នកំពុងប្រតិបត្តិការដោយគ្មានការត្រួតពិនិត្យតាមដាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ