ព្រះមហាក្សត្រ និងប្រមុខការទូតកម្ពុជាបន្តគាំទ្រនយោបាយ«ចិនតែមួយ»
ព្រះមហាក្សត្រកម្ពុជាព្រះបាទនរោត្តម សីហមុនី និងប្រមុខការទូតកម្ពុជាបានមានបន្ទូល និងបញ្ជាក់ជំហរថា កម្ពុជាបន្តគាំទ្រនូវគោលនយោបាយចិនតែមួយ។ នេះបើតាមទីភ្នាក់ងារសារព័ត៌មានចិនស៊ីនហួរ។ បន្ទូលរបស់ព្រះមហាក្សត្រកម្ពុជាដូច្នេះធ្វើឡើង បន្ទាប់ពីព្រះអង្គបានទទួលជួបសវនាការមួយជាមួយលោក វ៉ាង យី រដ្ឋមន្ត្រីការបរទេសចិននាព្រឹកថ្ងៃចន្ទ ទី២២ ខែមេសានេះក្នុងឱកាសដែលលោកវ៉ាង យីកំពុងបំពេញទស្សនកិច្ចនៅកម្ពុជាពីថ្ងៃទី២១ ដល់ថ្ងៃទី២៣ ខែមេសានេះ។
ចុះផ្សាយនៅថ្ងៃ៖
ស្តាប់ - ០១:៥៤
យោងតាមទីភ្នាក់ងារសារព័ត៌មានចិន ស៊ីនហួរក៏ដូចជាកាសែតក្រុមប្រឹក្សារដ្ឋចិន ព្រះមហាក្សត្រកម្ពុជាព្រះបាទនរោត្តម សីហមុនី បានមានព្រះបន្ទូលថា ប្រទេសកម្ពុជានៅតែប្រកាន់យ៉ាងខ្ជាប់ខ្ជួននូវគោលនយោបាយចិនតែមួយ និងគាំទ្រយ៉ាងសកម្មនូវចក្ខុវិស័យក្នុងការកសាងសហគមន៍មួយ ដែលមានអនាគតរួមគ្នា និងគំនិតផ្តួចផ្តើមជាសកលធំៗចំនួន៣ ដែលស្នើឡើងដោយប្រទេសចិន។ ព្រះអង្គមានជំនឿយ៉ាងមុតមាំថា ចំណងមិត្តភាពកម្ពុជា និងចិននឹងត្រូវបានបន្សល់ទុកពីមួយជំនាន់ទៅមួយជំនាន់ទៀត និងកាន់តែរឹងមាំតរៀងទៅ។
ក្រៅពីមានជំនួបជាមួយព្រះមហាក្សត្រកម្ពុជា លោក វ៉ាង យី ក៏មានជំនួបជាមួយរដ្ឋមន្ត្រីការបរទេសកម្ពុជាលោក សុខ ចិន្តាសោភា ក្នុងថ្ងៃចន្ទ ទី២២ មេសានេះដែរ។ លោក សុខ ចិន្តាសោភា ក៏បានបញ្ជាក់ប្រាប់លោក វ៉ាង យី ថា កម្ពុជាប្រកាន់យ៉ាងខ្ជាប់ខ្ជួននូវគោលនយោបាយចិនតែមួយ និងប្តេជ្ញាជំរុញកិច្ចសហប្រតិបត្តិការមិត្តភាពជាមួយប្រទេសចិន។
ចំណែក លោក វ៉ាង យី បានឆ្លើយតបវិញថា ក្រោមការដឹកនាំរបស់ប្រមុខរដ្ឋាភិបាលនៃប្រទេសទាំងពីរ ការកសាងអនាគតរួមគ្នាមួយរវាងសហគមន៍ចិន និងកម្ពុជា បានឈានចូលដំណាក់កាលថ្មីមួយ ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់។ នេះបើតាមកាសែតស៊ីនហួរ។
តាមកាសែតចិនមួយនេះដដែល លោក វ៉ាង យី បានបញ្ជាក់បន្ថែមពីឆន្ទៈរបស់ចិនក្នុងការធ្វើការជាមួយកម្ពុជា ដើម្បីអនុវត្តនូវការឯកភាពគ្នាជាយុទ្ធសាស្ត្រ ដែលសម្រេចបានដោយមេដឹកនាំ នៃប្រទេសទាំងពីរ។ លោក ប្រមុខការទូតចិន ថ្លែងថាប្រឈមមុខនឹងបរិយាកាសអន្តរជាតិដ៏ស្មុគស្មាញ ចិន និងកម្ពុជាគួរតែពង្រឹងការដឹកនាំជាយុទ្ធសាស្ត្រកម្រិតខ្ពស់ និងដឹកនាំការកសាងសហគមន៍ ចិន-កម្ពុជា ជាមួយនឹងអនាគតរួមគ្នាក្នុងទិសដៅដ៏ត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ