នៅមុខលោក វ៉ាង យី កម្ពុជាប្រកាសប្រឆាំងគ្រប់ទម្រង់ឯករាជ្យភាពរបស់តៃវ៉ាន់
មេដឹកនាំកម្ពុជាបានប្រកាសនៅចំពោះមុខលោក វ៉ាង យី រដ្ឋមន្ត្រីការបរទេសចិនថាប្រទេសកម្ពុជាប្រឆាំងគ្រប់ទម្រង់នៃឯករាជ្យភាពរបស់តៃវ៉ាន់ និងធានាមិនបង្កើតទំនាក់ទំនងផ្លូវការណាមួយជាមួយតៃវ៉ាន់។ ការបញ្ជាក់របស់កម្ពុជាដូច្នេះ ត្រូវបានរៀបរាប់នៅក្នុងសេចក្តីប្រកាសព័ត៌មានរួមស្តីពីដំណើរទស្សនកិច្ចរបស់លោក វ៉ាង យី រយៈពេល៣ថ្ងៃនៅកម្ពុជា ដែលត្រូវបានបញ្ចប់នៅថ្ងៃអង្គារ ទី២៣ ខែមេសានេះ។
ចុះផ្សាយនៅថ្ងៃ៖
ស្តាប់ - ០២:២៣
សេចក្តីប្រកាសរួមរវាងភាគីចិន និងកម្ពុជាសុទ្ធតែបានប្តេជ្ញាឡើងវិញនូវជំហរគាំទ្រគ្នាទៅវិញទៅមក។ ចំណុចសំខាន់ៗ ដែលកម្ពុជា និងចិន គាំទ្រគ្នាអំឡុងទស្សនកិច្ចលោក វ៉ាង យី នៅកម្ពុជា គឺការដែលកម្ពុជាបង្ហាញនូវការប្តេជ្ញាចិត្តគាំទ្រគោលនយោបាយចិនតែមួយ និងទទួលស្គាល់រដ្ឋាភិបាលចិនជារដ្ឋាភិបាលស្របច្បាប់តែមួយគត់តំណាងឲ្យប្រទេសចិនទាំងមូល។ រីឯតៃវ៉ាន់ត្រូវបានកម្ពុជាចាត់ទុកថាជាផ្នែកមួយដែលមិនអាចកាត់ផ្តាច់បានពីទឹកដីរបស់ចិន។
លើសពីនេះ ប្រទេសកម្ពុជាប្រឆាំងរាល់ការប៉ុនប៉ងប្រើប្រាស់បញ្ហានានារបស់តៃវ៉ាន់ ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសចិន ប្រឆាំងគ្រប់ទម្រង់នៃឯករាជ្យភាពរបស់តៃវ៉ាន់ គាំទ្រយ៉ាងមុតមាំការប្រឹងប្រែងបង្រួបបង្រួមជាតិរបស់ចិន និងកម្ពុជាមិនបង្កើតទំនាក់ទំនងផ្លូវការណាមួយជាមួយតៃវ៉ាន់ឡើយ។
លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយយល់ឃើញថា បញ្ហាយុទ្ធភូមិសាស្ត្រនយោបាយមានការប្រែប្រួលរយៈពេលចុងក្រោយនេះ ដោយសារកំណើននៃការគាំទ្រកោះតៃវ៉ាន់មានការកើនឡើង។ ជាមួយគ្នានេះ បណ្តាប្រទេសអាស៊ានហាក់មានជំហរនៅកណ្តាល និងមានការពង្រីកពាណិជ្ជកម្មមួយចំនួនជាមួយកោះតៃវ៉ាន់។ ដូច្នេះគោលនយោបាយការបរទេសរបស់ចិន គឺចង់ពង្រីកឲ្យមានការគាំទ្រជំហរចិនតែមួយ ប្រកបដោយភាពរឹងមាំដូចពីអតីតកាល ខណៈបស្ចិមលោកមានការចាប់អារម្មណ៍ច្រើននឹងតំបន់ឥណ្ឌូប៉ាស៊ីហ្វិក និងសមុទ្រចិនខាងត្បូង។ នេះបើតាមលោក ឯម សុវណ្ណារ៉ា។
ទោះយ៉ាងណា តាមសេចក្តីប្រកាសរួម ភាគីចិនក៏បានគូសបញ្ជាក់សារជាថ្មីនូវការគាំទ្រចំពោះជម្រើសរបស់កម្ពុជាលើមាគ៌ាអភិវឌ្ឍន៍ដែលស្របនឹងលក្ខខណ្ឌជាតិ គាំទ្រដល់ការប្រឹងប្រែងរបស់កម្ពុជាដើម្បីការពារអធិបតេយ្យភាពជាតិ សន្តិសុខ និងផលប្រយោជន៍ ព្រមទាំងប្រឆាំងដាច់ខាតចំពោះការជ្រៀតជ្រែកពីខាងក្រៅចូលក្នុងកិច្ចការផ្ទៃក្នុងរបស់កម្ពុជា។
សូមរំលឹកថា នៅក្នុងដំណើរទស្សនកិច្ច រយៈពេល៣ថ្ងៃនៅកម្ពុជា លោក វ៉ាង យី បានចូលគាល់ព្រះមហាក្សត្រខ្មែរ មានជំនួបជាមួយប្រធានព្រឹទ្ធសភាលោក ហ៊ុន សែន ជួបជាមួយនាយករដ្ឋមន្ត្រី លោក ហ៊ុន ម៉ាណែត ជួបជាមួយសមភាគីលោក សុខ ចិន្តាសោភា និងមានកិច្ចប្រជុំគណៈកម្មការសម្របសម្រួលអន្តររដ្ឋាភិបាលកម្ពុជា-ចិន លើកទី៧ ជាមួយលោកឧបនាយករដ្ឋមន្ត្រី ស៊ុន ចាន់ថុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ