តើកងកម្ម៉ង់ដូអ៊ីស្រាអែលជាអ្នកសម្លាប់មេទី២ របស់អង្គការអាល់កៃដានៅក្នុងទឹកដីអ៊ីរ៉ង់?
ចុះផ្សាយនៅថ្ងៃ៖
ស្តាប់ - ០៤:៤៧
កាលពីថ្ងៃសុក្រ ទី១៣ វិច្ឆិកា កាសែត « New York Times » បានផ្សព្វផ្សាយនូវព័ត៌មានមួយដែលបញ្ជាក់ថា មេទី២ របស់អង្គការភេរវនិយមអាល់កៃដាឈ្មោះអាប៊ូ ម៉ូហាម៉េដ អាល់ ម៉ាស៊្រីត្រូវបានកងកម្ម៉ង់អ៊ីស្រាអែលសម្លាប់នៅក្នុងទឹកដីអ៊ីរ៉ង់ក្នុងខែសីហាកន្លងទៅ។ តាម « New York Times » ដដែល គឺរដ្ឋបាលអាមេរិករបស់លោកដូណាល់ ត្រាំជាអ្នកបញ្ជាឲ្យកងកម្ម៉ង់ដូអ៊ីស្រាអែលសម្លាប់អាប់ឌូឡា អាម៉េដ អាប់ឌូឡា។ ក៏ប៉ុន្តែ អ៊ីស្រាអែល និងសហរដ្ឋអាមេរិកមិនបានបញ្ជាក់លើព័ត៌មានចុះផ្សាយដោយ « New York Times » ទេ។ ចំណែកអ៊ីរ៉ង់បានបរិហារលើព័ត៌មានរបស់ « New York Times » ដោយចាត់ទុកជាព័ត៌មានប្រឌិត។ តើអាប់ឌូឡា អាម៉េដ អាប់ឌូឡាជានរណា និងថា អ្វីទៅជាការពិតជុំវិញព័ត៌មានចុះផ្សាយដោយកាសែត « New York Times »?។
កើតក្នុងឆ្នាំ ១៩៦៣ អាប៊ូ ម៉ូហាម៉េដ អាល់ ម៉ាស៊្រីមានឈ្មោះពិតអាប់ឌូឡា អាម៉េដ អាប់ឌូឡា។ មុននឹងក្លាយជាមេកើយទី២ របស់អាល់កៃដា អាប់ឌូឡា អាម៉េដ អាប់ឌូឡាជាមនុស្សជំនិតរបស់មេកើយអាល់កៃដាអ៊ូសាម៉ា បិនឡាដិន។ បន្ទាប់មក អាប់ឌូឡា អាម៉េដ អាប់ឌូឡាបានក្លាយជាដន្លងរបស់បិនឡាដិនដោយបានរៀបការកូនស្រីឈ្មោះមៀរីយ៉ាមជាមួយកូនប្រុសសំណប់ចិត្តរបស់បិនឡាដិនឈ្មោះហាំហ្សា បិនឡាដិន។ ក្រោយមហាភេរវកម្មថ្ងៃ១១ កញ្ញា ២០០១ នៅសហរដ្ឋអាមេរិក បិនឡាដិនរួមទាំងថ្នាក់ដឹកនាំអាល់កៃដាគ្រាក់ៗមួយចំនួនបានស្ថិតក្នុងបញ្ជីឈ្មោះនៃការតាមចាប់ខ្លួនរបស់រដ្ឋបាលអាមេរិក។ ក្នុងឆ្នាំ ១៩៩៨ ស្ថានទូតអាមេរិកក្នុងប្រទេសកេនយ៉ា និងប្រទេសតង់ហ្សានីបានរងការវាយប្រហារភេរវកម្មដែលបណ្តាលឲ្យមានមនុស្សស្លាប់ចំនួន ២២៤នាក់ និងរបួសជាង ៥ ០០០នាក់។
កាលណោះ សហរដ្ឋអាមេរិកបានទម្លាក់ការទទួលខុសត្រូវលើអង្គការភេរវនិយមអាល់កៃដា និងបានចោទអាប់ឌូឡា អាម៉េដ អាប់ឌូឡាជាអ្នកនៅពីក្រោយការវាយប្រហារនោះ។ ក្រសួងស៊ើបការណ៍សម្ងាត់អាមេរិក FBI បានប្រកាសផ្តល់ប្រាក់រង្វាន់ចំនួន ១០លានដុល្លារដល់ជនណាដែលអាចផ្តល់ព័ត៌មានឈានទៅសម្លាប់ ឬទៅចាប់អាប់ឌូឡា អាម៉េដ អាប់ឌូឡាបានទាំងរស់។ បន្ទាប់ពីបានបាត់ដំណឹងសូន្យឈឹងមួយរយៈពេលធំមក ដំណឹងមរណៈភាពអាប់ឌូឡា អាម៉េដ អាប់ឌូឡា និងកូនស្រីមៀរីយ៉ាមត្រូវបានប្រកាសដោយកាសែតអាមេរិក « New York Times » ក្នុងថ្ងៃសុក្រ ទី១៣ វិច្ឆិកា។ កាសែត « New York Times » ដែលដកស្រង់ប្រភពពីក្រសួងស៊ើបការណ៍សម្ងាត់អាមេរិកបានឲ្យដឹងទៀតថា អាប់ឌូឡា អាម៉េដ អាប់ឌូឡា និងមៀរីយ៉ាមត្រូវបានបុរសកម្ម៉ង់ដូជិះម៉ូតូចំនួន ២នាក់បាញ់សម្លាប់កាលពីថ្ងៃទី៧ សីហាកន្លងទៅនៅតាមផ្លូវក្នុងទីក្រុងតេហេរ៉ង់ ប្រទេសអ៊ីរ៉ង់។
តាមកាសែតអាមេរិក « New York Times » ទីភ្នាក់ងារស៊ើបការណ៍សម្ងាត់អ៊ីស្រាអែលបានសហការណ៍យ៉ាងជិតស្និតជាមួយក្រសួងស៊ើបការណ៍សម្ងាត់អាមេរិក FBI ហើយកងកម្ម៉ង់ដូទាំង ២នាក់ប្រហែលជាភ្នាក់ងាររបស់អ៊ីស្រាអែលដែលទទួលបញ្ជាពី FBI។ គួរបញ្ជាក់ថា ការសម្លាប់អាប់ឌូឡា អាម៉េដ អាប់ឌូឡាបានធ្វើឡើងក្នុងថ្ងៃខួបកំណើតនៃការវាយប្រហារលើស្ថានទូតអាមេរិកនៅកេនយ៉ា និងតង់ហ្សានីកាលពី ២២ឆ្នាំមុន។ តែភាគីពាក់ព័ន្ធផ្ទាល់ ពិសេសអ៊ីស្រាអែល សហរដ្ឋអាមេរិក និងអង្គការអាល់កៃដាមិនបានបញ្ចេញប្រតិកម្មអ្វីទាំងអស់លើព័ត៌មានដែលចុះផ្សាយដោយកាសែត New York Times ពេលនេះ។ ចំណែកអ៊ីរ៉ង់តាមរយៈក្រសួងការបរទេសបានចេញមុខបរិហារដោយចាត់ទុកព័ត៌មានចុះផ្សាយដោយ New York Times ជាព័ត៌មានប្រឌិត និងបញ្ជាក់ថា គ្មានវត្តមានថ្នាក់ដឹកនាំអាល់កៃដាណាម្នាក់នៅលើទឹកដីអ៊ីរ៉ង់ទេ។ ទោះជាយ៉ាងនេះក្តី ព័ត៌មានចុះផ្សាយដោយកាសែតអាមេរិក New York Times បានបំផុសឲ្យមានសំណួរមួយចំនួន។
អ្វីទៅជាទំនាក់ទំនងរវាងអ៊ីរ៉ង់និកាយឈីអ៊ីត និងអង្គការអាល់កៃដានិកាយស៊ុយនីត តើអ៊ីស្រាអែលពិតជាអ្នកសម្លាប់អាប់ឌូឡា អាម៉េដ អាប់ឌូឡាមែន ឬ ឬមួយក៏ថា ហេតុអ្វីបានជារដ្ឋបាលអាមេរិករបស់លោកដូណាល់ ត្រាំមិនបញ្ចេញប្រតិកម្មអ្វីទាំងអស់មកទល់ពេលនេះ។ តាមពិតទៅ វត្តមានអាប់ឌូឡា អាម៉េដ អាប់ឌូឡា រួមទាំងថ្នាក់ដឹកនាំអាល់កៃដាផ្សេងទៀតនៅអ៊ីរ៉ង់មិនមានអ្វីគួរឲ្យភ្ញាក់ផ្អើលទេ។ ខណៈដែលអាមេរិកតាមប្រម៉ាញ់ពួកអាល់កៃដានៅអាហ្វហ្កានីស្ថានចាប់ពីខែធ្នូ ឆ្នាំ ២០០១ ពួកអាល់កៃដាបានរំដោះក្រុមគ្រួសារទៅកាន់អ៊ីរ៉ង់ និងមានសមាជិកខ្លះរបស់អាល់កៃដា ដូចរូបអាប់ឌូឡា អាម៉េដ អាប់ឌូឡាក៏បានរត់ទៅអ៊ីរ៉ង់ដែរ នេះបើយោងតាមឯកសារដែលទ័ពអាមេរិករឹបអូសបាននាឱកាសប្រតិបត្តិការសម្លាប់បិនឡាដិនក្នុងទឹកដីប៉ាគីស្ថានកាលពីថ្ងៃទី២ ឧសភា ឆ្នាំ ២០១១។
ចំណែករឿងអ៊ីស្រាអែលប្រើភ្នាក់ងារសម្ងាត់របស់ខ្លួនទៅធ្វើប្រតិបត្តិការ ឬទៅសម្លាប់ជនណាម្នាក់នៅក្នុងទឹកដីសត្រូវ ពិសេសនៅអ៊ីរ៉ង់ក៏មិនមែនជារឿងថ្មីដែរ។ រីឯវិធីសាស្រ្តជិះម៉ូតូបាញ់សម្លាប់ក៏អ៊ីស្រាអែលធ្លាប់បានប្រើសម្លាប់អ្នកវិទ្យាសាស្រ្តអ៊ីរ៉ង់ ៤នាក់ដែលស្រាវជ្រាវផ្នែកនុយក្លេអ៊ែរនៅចន្លោះឆ្នាំ ២០១០ និង ២០១២។ គ្រាន់តែថាជាផ្លូវការ រដ្ឋាភិបាលអ៊ីស្រាអែលកម្រនឹងបញ្ជាក់លើព័ត៌មានបែកធ្លាយរបៀបហ្នឹង ហើយក៏មិនបញ្ជាក់ពីវត្តមានកម្លាំងពិសេសដែលចូលទៅប្រតិបត្តិការនៅលើទឹកដីសត្រូវ។ រឿងអ៊ីស្រាអែលមិននិយាយអាចជារឿងមួយធម្មតា។ អ្វីដែលហាក់មិនធម្មតា គឺការគ្មានប្រតិកម្មពីរដ្ឋបាលអាមេរិករបស់លោកដូណាល់ ត្រាំដែលកំពុងប្រឈមមុខខ្លាំងនឹងអ៊ីរ៉ង់។ មានការយល់ស្របដូចគ្នាថា គួរណាស់តែដំណឹងសម្លាប់បានមេទី២ អាល់កៃដានៅអ៊ីរ៉ង់ក្នុងថ្ងៃទី៧ សីហាជាប្រធានរឿងដែលលោកត្រាំប្រើនៅក្នុងសម័យឃោសនាបោះឆ្នោតប្រធានាធិបតីផង និងជាភស្តុតាងបន្ថែមដើម្បីចោទអ៊ីរ៉ង់ពីបទឃុបឃិតជាមួយអង្គការភេរវនិយមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ