អ៊ីរ៉ង់បដិសេធការចុះផ្សាយដែលថា មេដឹកនាំធំទី២របស់អាល់កៃដា ត្រូវបាញ់សម្លាប់នៅ ទឹកដីអ៊ីរ៉ង់
អាមេរិក និងអ៊ីស្រាអែល ដែលជាសត្រូវរបស់អ៊ីរ៉ង់ បានភូតកុហក ប្រឌិតគ្រប់យ៉ាងដើម្បីចងភ្ជាប់អ៊ីរ៉ង់ទៅជាមួយក្រុមអាល់កៃដា។ នេះបើតាមប្រសាសន៍របស់អ្នកនាំពាក្យក្រសួងការបរទេសអ៊ីរ៉ង់ នៅក្រោយ កាសែត New York Times ចុះផ្សាយកាលពីថ្ងៃសុក្រម្សិលមិញថា ចារកិច្ចអ៊ីស្រាអែល បានលួចធ្វើឃាត មេដឹកនាំធំទី២របស់បណ្តាញអាល់កៃដា នៅទីក្រុងតេហេរ៉ង់។
ចុះផ្សាយនៅថ្ងៃ៖
ស្តាប់ - ០២:២៦
ក្រសួងការបរទេសអ៊ីរ៉ង់ បានបដិសេធ ទាត់ចោល ព័ត៌មានដែលថា មេដឹកនាំធំទី ២ របស់បណ្តាញអាល់កៃដា ត្រូវឃាតករ បាញ់សម្លាប់នៅក្នុងទឹកដី អ៊ីរ៉ង់។ សម្រាប់អ្នកនាំពាក្យរបស់ក្រសួងការបរទេស ការចុះផ្សាយ របស់ New York Times ដែលថា មេដឹកនាំធំទី២របស់អាល់កៃដា ត្រូវចារកិច្ចអ៊ីស្រាអែល បាញ់សម្លាប់ នៅតាមផ្លូវក្នុងទីក្រុងតេហេរ៉ង់ កើតចេញមកពីការប្រឌិត បង្កើតរឿងសុទ្ធសាធរបស់ អាមេរិក និងអ៊ីស្រាអែល សត្រូវសួពូជរបស់អ៊ីរ៉ង់។
តាមការចុះផ្សាយរបស់កាសែត អាមេរិកាំង New York Times កាលពីថ្ងៃ សុក្រ មេដឹកនាំធំទី២របស់អាល់កៃដា Abdullah Ahmed Abdullah ដែលមានងារសង្រ្គាមថា Abou Mohammed Al-Masri ត្រូវបានឃាតករមិនស្គាល់មុខ ២នាក់ បាញ់សម្លាប់ នៅក្នុងរថយន្ត នៅតាមផ្លូវក្នងទីក្រុងតេហេរ៉ង់ កាលពីខែសីហាកន្លងទៅ។ តាម កាសែត New York Times ដែលបានដកស្រង់ប្រភពពីមន្រ្តីស៊ើបការណ៍សម្ងាត់អាមេរិក ឃាតកម្ម នៅ ទីក្រុងតេហេរ៉ង់ អាចជាស្នាដៃ របស់ក្រុមចារកិច្ចអ៊ីស្រាអែល ដែលធ្វើការឲ្យអាមេរិក។
Abdullah Ahmed Abdullah ដើមកំណើតអេហ្ស៊ីប ជាមេដឹកនាំធំទី២របស់អាល់កៃដា ដែលប៉ូលិសFBI កំពុងតាមស្វែងរក ចាប់ខ្លួន ក្នុងបទចោទប្រកាន់ ជួយរៀបចំ ផែនការភេរវកម្ម វាយប្រហារស្ថានទូតអាមេរិក នៅប្រទេសកេនយ៉ា និងតង់ហ្សានី ដែលបានសម្លាប់មនុស្ស ២២៤នាក់ និងរបួសជាង ៥ពាន់នាក់ កាលពីឆ្នាំ ១៩៩៨។
ប៉ូលិសសហព័ន្ធFBI ធ្លាប់បានប្រកាសផ្តល់រង្វាន់ ១០លានដុល្លារ សម្រាប់អ្នកដែលជួយផ្តល់ព័ត៌មានពីកន្លែងលាក់ខ្លួនរបស់ Abdullah Ahmed Abdullah។ នៅថ្ងៃទី ៧សីហា ថ្ងៃខួប ២២ឆ្នាំ នៃការវាយប្រហារស្ថានទូតអាមេរិក នៅកេនយ៉ា Abdullah Ahmed Abdullah ត្រូវបានចារកិច្ច អ៊ីស្រាអែល លួច បាញ់សម្លាប់នៅ តាមផ្លូវទីក្រុងតេហេរ៉ង់។
របាយការណ៍ ឆ្នាំ ២០០៨ របស់មជ្ឈមណ្ឌលអាមេរិក ប្រយុទ្ធប្រឆាំងក្រុមភេរវនិយម មេដឹកនាំធំទី២របស់អាល់កៃដា មានជំនាញ ពូកែខាងរៀបចំប្រតិបត្តិការយុទ្ធសាស្រ្ត ដើម្បីវាយប្រហារភេរវកម្ម។ គេវាយតម្លៃថា ភេរវកម្មសំដៅ សណ្ឋាគារ អ៊ីស្រាអែល នៅប្រទេសកេនយ៉ា នៅឆ្នាំ ២០០២ ដែលបានសម្លាប់មនុស្ស ១៣នាក់ ដោយរួមទាំង ភេរវជនអត្តឃាត ៣នាក់ ក៏អាចជាស្នាដៃ របស់ Abdullah Ahmed Abdullahនោះដែរ។
នៅមុនត្រូវបាញ់សម្លាប់ នៅទឹកដីអ៊ីរ៉ង់ Abdullah Ahmed Abdullahត្រូវគេចាត់ទុកជាបេក្ខជន ស្នងតំណែងបន្តពីមេអាល់កៃដាបច្ចុប្បន្ន ឈ្មោះ Ayman al Zawahiri។
នៅក្រោយការចុះផ្សាយរបស់កាសែត New York Times មន្រ្តីជាន់ខ្ពស់អាមេរិកបានបដិសេធមិនបញ្ជាក់ព័ត៌មាននេះជាមួយទីភ្នាក់ងារព័ត៌មានផ្សេងទៀត ដូចជា Reuters ហើយក៏មិនបញ្ជាក់ ទេថា អាមេរិកពិតជាបានចូលរួមក្នុងប្រតិបត្តិការបាញ់សម្លាប់មេដឹកនាំ ធំទី២របស់អាល់កៃដា នៅទឹកដីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ