របាយការណ៍៖ ជនជាតិអ៊ុយហ្គួរជាង៥៧ម៉ឺននាក់ត្រូវបានបង្ខំឲ្យធ្វើការក្នុងផលិតកម្មកប្បាសនៅស៊ីនជាំង
ចុះផ្សាយនៅថ្ងៃ៖
ស្តាប់ - ០៤:៣៧
រឿងអាស្រូវជុំវិញករណីដែលចិនចាប់បង្ខំប្រើប្រាស់កម្លាំងពលកម្មរបស់ជនជាតិអ៊ុយហ្គួរ កំពុងចាប់កម្រើកខ្លាំងនៅប៉ុន្មានថ្ងៃចុងក្រោយនេះ។ យោងតាមរបាយការណ៍ថ្មីមួយ ប្រជាជនអ៊ុយហ្គួរ និងជនជាតិភាគតិចរាប់ម៉ឺននាក់ផ្សេងទៀត កំពុងធ្វើការដោយបង្ខំនៅឯវាលចម្ការកប្បាសដ៏ធំល្វឹងល្វើយក្នុងតំបន់ស្វយ័តស៊ីនជាំងភាគខាងលិចប្រទេសចិន។ តើចិន ពិតជាបានប្រើប្រាស់ពលកម្មរបស់ជនជាតិអ៊ុយហ្គួរដោយបង្ខំមែនឬយ៉ាងណា? តើសហគមន៍អន្តរជាតិ មានប្រតិកម្មយ៉ាងណាខ្លះចំពោះទង្វើរំលោភសិទ្ធិមនុស្សបែបនេះ?
បើតាមឯកសារថ្មីៗដែលទើករកឃើញតាមអ៊ីនធ័រនែត គេបានមើលឃើញភស្តុតាងច្បាស់ជាងមុនដែលបង្ហាញថា អាជ្ញាធរក្រុងប៉េកាំងពិតជាបានបង្ខំជនជាតិអ៊ុយហ្គួរឲ្យប្រមូលផលដំណាំកប្បាសដែលចិនជាប្រទេសអ្នកផ្គត់ផ្គង់ធំទី៥ នៅក្នុងពិភពលោកមែន។
ជាយូរណាស់មកហើយ ក្រុមសកម្មជនសិទ្ធិមនុស្សនិងក្រុមអ្នកជំនាញអ.ស.ប បាននិយាយថា អាជ្ញាធរចិនបានឃុំខ្លួនជនជាតិអ៊ុយហ្គួរនិងជនជាតិភាគិតិចដទៃទៀតជាង១ លាននាក់នៅតាមជំរំលត់ដំដ៏ធំជាច្រើនកន្លែងស្ថិតក្នុងតំបន់ស៊ីនជាំង។ រដ្ឋាភិបាលចិន តែងតែបានច្រានចោលនូវការអះអាងខាងលើ និងថាជំរំនៅស៊ីនជាំងគឺជាមជ្ឈមណ្ឌលអប់រំបង្កើតឡើងក្នុងគោលបំណងទប់ស្កាត់កុំឲ្យមានជនជ្រុលនិយមតែប៉ុណ្ណោះ។
ក៏ប៉ុន្តែ ភស្តុតាងថ្មីដែលទើបចេញផ្សាយកាលពីថ្ងៃចន្ទ ទី១៤ ធ្នូ ដោយក្រុមអ្នកជំនាញមជ្ឈមណ្ឌលសម្រាប់គោលនយោបាយសកលដែលមានមូលដ្ឋាននៅទីក្រុងវ៉ាស៊ីនតោន ឲ្យដឹងថា ក្នុងមួយឆ្នាំមានជនជាតិភាគតិចអ៊ុយហ្គួរយ៉ាងតិច ៥៧ ម៉ឺននាក់ ត្រូវបានគេបញ្ជូនឲ្យទៅប្រមូលសំឡីកប្បាស។ ព័ត៌មាននេះ បង្ហាញពីការកើនឡើងនូវហានិភ័យខ្ពស់នៃការប្រើប្រាស់កម្លាំងពលកម្មដោយបង្ខំពីសំណាក់អាជ្ញាធរចិន ទៅលើប្រជាជនអ៊ុយហ្គួរដែលជាអ្នកកាន់សាសនាអ៊ីស្លាម។
បន្ថែមលើនេះ ក្រុមអ្នកស្រាវជ្រាវប៉ាន់ស្មានថាចំនួនជនជាតិភាគតិចសរុបដែលត្រូវបានគេបង្ខំឲ្យប្រមូលកប្បាស (ការងារត្រូវធ្វើដោយដៃជាចាំបាច់) ទំនងជាមានច្រើនជាងចំនួនដែលរកឃើញជាច្រើនម៉ឺននាក់។
គួរគូសបញ្ជាក់ជូនថា តំបន់ស៊ីនជាំង គឺជាមជ្ឈមណ្ឌលផលិតកម្មកប្បាសដ៏សំខាន់របស់ប្រទេសចិន។ ផលិតផលកប្បាសរបស់ចិនតំណាងឲ្យប្រមាណ ២២% នៃការផ្គត់ផ្គង់កប្បាសទាំងអស់ទូទាំងពិភពលោក។ នេះ បើយោងតាមរបាយការណ៍របស់មជ្ឈមណ្ឌលយុទ្ធសាស្ត្រនិងការសិក្សាអន្តរជាតិ (CSIS) ។
ទីក្រុងប៉េកាំង បាននិយាយថា អ្នកជាប់ឃុំឃាំងទាំងអស់បានបញ្ចប់ការសិក្សាពីមជ្ឈមណ្ឌលអប់រំវិជ្ជាជីរៈ ប៉ុន្តែយោងតាមរបាយការណ៍ក្រុមអ្នកជំនាញមជ្ឈមណ្ឌលសម្រាប់គោលនយោបាយសកលវិញ អតីតអ្នកទោសជាច្រើនត្រូវបានបញ្ជូនឲ្យទៅធ្វើការងារនៅតាមរោងចក្រ។
នៅពេលកំពុងធ្វើការ ក្រុមជនជាតិភាគតិចទាំងនោះត្រូវបានតាមឃ្លាំមើលយ៉ាងយកចិត្តទុកដាក់បំផុតពីមន្ត្រីប៉ូលិស នៅពេលពួកគេធ្វើសកម្មភាពអ្វីមួយមិនថាសូម្បីតែពេលពួកគេផ្លាស់ទីពីចំណុចមួយទៅចំណុចមួយទៀត។
លោក Adrian Zenz ដែលជាអ្នកបានលាតត្រដាងឯកសាររកឃើញបានសរសេរនៅក្នុងរបាយការណ៍ថា “ វាច្បាស់ណាស់ថាការបញ្ជូនក្រុមជនជាតិភាគតិច ទៅប្រមូលកប្បាស មានភាគរយច្រើនដែលថារដ្ឋាភិបាលចិន ប្រើកម្លាំងចាប់បង្ខំទៅលើប្រជាជនអ៊ុយហ្គួរ។
ជនជាតិភាគតិចមួយចំនួន ទំនងអាចយល់ព្រមធ្វើការដើម្បីទទួលបានប្រាក់ម្រៃខ្លះ។ ក៏ប៉ុន្តែ វាគឺជារឿងដែលពិបាកកំណត់ណាស់ថានឹងគ្មានការបង្ខិតបង្ខំប្រើកម្លាំងពលកម្ម ហើយការគោរពសិទ្ធិមនុស្សនឹងចាប់ផ្តើមអនុវត្តនៅតំបន់ស្វយ័តស៊ីនជាំង។ លោក Adrian Zenz បន្ថែម។
ជាមួយគ្នានេះ របាយការណ៍ខាងលើដដែល ក៏បានឲ្យដឹងទៀតថាមានការលើកទឹកចិត្តខាងមនោគមវិជ្ជាយ៉ាងខ្លាំង ក្នុងការអនុវត្តផែនការការងារនៅស៊ីនជាំង ពីព្រោះថាការលើកកម្ពស់កម្រិតប្រាក់ចំណូលនៅតាមជនបទ អនុញ្ញាតឲ្យមន្រ្តីចិនអាចសម្រេចបាននូវគោលដៅកាត់បន្ថយភាពក្រីក្រដែលកំណត់ដោយរដ្ឋ។
ទាក់ទងនឹងការរកឃើញខាងលើ ប្រទេសចិនបានបដិសេធយ៉ាងដាច់អហង្ការចំពោះពាក្យចោទប្រកាន់ដែលថាខ្លួនរំលោភសិទ្ធិមនុស្សដោយការប្រើប្រាស់កម្លាំងពលកម្មដោយបង្ខំទៅលើពួកជនជាតិភាគតិចអ៊ុយហ្គួរ។ ក្រៅពីនេះ ប៉េកាំងថែមបានចោទប្រកាន់សហរដ្ឋអាមេរិកវិញទៀតផងពីបទចង់ធ្វើបាបក្រុមហ៊ុនចិននៅស៊ីនជាំង។
ទីក្រុងប៉េកាំងនៅឆ្លៀតអះអាងដូចសព្វមួយដងទៀតថា ជំរំនៅស៊ីនជាំងគឺជាមជ្ឈមណ្ឌលអប់រំវិជ្ជាជីវៈ ដើម្បីប្រយុទ្ធប្រឆាំងនឹងចលនាផ្តាច់ខ្លួនបែបអ៊ីស្លាមនិយម ក្រោយពីចិនបានរងភេរវកម្មពីសំណាក់សកម្មជនអ៊ុយហ្គួរ។
គួររំឭកជូនថា កាលពីដើមធ្នូខែនេះ សហរដ្ឋអាមេរិកបានសម្រេចហាមប្រាមការនាំចូលផលិតផលកប្បាសរបស់ក្រុមហ៊ុនចិន ដើម្បីដាក់សម្ពាធឲ្យអាជ្ញាធរចិនបិទបញ្ចប់សកម្មភាពបង្ខំទៅលើប្រជាជនអ៊ុយហ្គួរ។ សេចក្តីស្នើច្បាប់មួយទៀត ដែលហាមប្រាមរាល់ការនាំចូលទំនិញពីស៊ីនជាំង នៅមិនទាន់បានបញ្ជូនទៅដល់ដៃព្រឹទ្ធសភាអាមេរិកនៅឡើយទេ។
ក្រុមហ៊ុនធំៗ លំដាប់អន្តរជាតិជាច្រើនផ្សេងទៀតរួមមានក្រុមហ៊ុន Adidas, Gap និងក្រុមហ៊ុន Nike ជាដើម ក៏បានចោទប្រកាន់ប្រទេសចិនផងដែរ ពីបទប្រើកម្លាំងពលកម្មជនជាតិអ៊ុយហ្គួរ ដោយបង្ខំនៅក្នុងខ្សែសង្វាក់ផ្គត់ផ្គង់វាយនភ័ណ្ឌរបស់ពួកគេ។ នេះបើយោងតាមរបាយការណ៍កាលពីខែមីនារបស់វិទ្យាស្ថានគោលនយោបាយយុទ្ធសាស្ត្រអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ