សមាជិកសភាអឺរ៉ុបបើកវេទិកាសម្តែងសាមគ្គីភាពជួយជនជាតិភាគតិចអ៊ុយហ្គួរនៅស៊ីនជាំង
ក្រោមគំនិតផ្តួចផ្តើមរបស់សមាជិកសភាអឺរ៉ុប បញ្ញាជន សិល្បករ អ្នកនយោបាយ ជាច្រើនរូប បានចេញសេចក្តីអំពាវនាវមួយ នៅថ្ងៃពុធទី ៣០កញ្ញា ២០២០ ដាស់សហគមន៍អន្តរជាតិ ឱ្យបញ្ចេញសកម្មភាពជួយជនជាតិភាគតិចអ៊ុយហ្គួនៅស៊ីងជាំង។ ជាសកម្មភាពដ៏ឆាប់រហ័ស និងដែលមានអំណាច ដើម្បីបិទបញ្ចប់ឧក្រិដ្ឋកម្មប្រឆាំងនឹងមនុស្សជាតិនៅប្រទេសចិន។ ចំណែកលោកស្រីប្រមុខរដ្ឋាភិបាលអាល្លឺម៉ង់វិញ ក៏បានសម្តែងការព្រួយបារម្ភនិងចាត់ទុកទង្វើរបស់អាជ្ញាធរប៉េកាំងចំពោះជនជាតិភាគតិចកាន់សាសនាអ៊ីស្លាមនៅស៊ីនជាំង ថាឃោរឃៅ។
ចុះផ្សាយនៅថ្ងៃ៖ កែប្រែថ្ងៃទី៖
តាំងពីជាច្រើនឆ្នាំមក របបកុម្មុយនិសចិនបានឃុំឃាំងមនុស្សរាប់លាននាក់ក្នុងជំរំលត់ដំ ព្រោះតែជនទាំងនោះកើតមកជាជនជាតិអ៊ុយហ្គួ។ ពួកគេត្រូវបានអាជ្ញាធរបង្ខំឱ្យរម្លូតកូន បញ្ចប់សមត្ថភាពបន្តពូជ ជម្លៀសកូនឱ្យនៅឯកាឆ្ងាយពីឪពុកម្តាយ រួមដំណេកជាមួយសមាជិកបក្សកុម្មុយនិសចិនបើជាស្រី ចាប់រំលោភទាំងហ្វូងៗ... ពោលគឺតាំងពីឆ្នាំ២០១៦មក តំបន់ស្វយ័តស៊ីងជាំង បានក្លាយជាកន្លែងដែលគ្មានមនុស្សធម៌សម្រាប់មនុស្ស។ នេះបើតាមសំណេរនៅក្នុងសេចក្តីអំពាវនាវ ដែលផ្តួចផ្តើមឡើងដោយសមាជិកសភាអឺរ៉ុបលោក Raphaël Glucksmann និងដែលចុះហត្ថលេខាដោយរបស់ក្រុមបញ្ញាជនជាង៥០នាក់ មានជាអាទិ៍ អ្នកនិពន្ធអង់គ្លេសកាត់ឥណ្ឌា Salman Rushdie អ្នកនិពន្ធអ៊ីតាលី Roberto Saviano អ្នកកាសែតបារាំងដើមកំណើតម៉ារុកLeïla Slimani សមិទ្ធិករ Jacques Audiard តារាភាពយន្ត Omar Sy បារាំង ប្រធានគណបក្សសង្គមនិយមប៊ែលហ្សិក Paul Magnette សេដ្ឋវិទូបារាំង Thomas Piketty ប្រវត្តិវិទូបារាង Patrick Weil ឬប្រធានវិទ្យាស្ថានអ៊ុយហ្គួអឺរ៉ុប លោក Dilnur Reyhan ជាដើម។
វេទិកាអំពាវនាវបានស្នើសុំជាពិសេសឱ្យរដ្ឋាភិបាលប្រទេសនីមួយៗរបស់ខ្លួន ចាត់វិធានការ ឱ្យបានឆាប់ៗ ដាក់ទណ្ឌកម្មឱ្យចំលើបុគ្គលអ្នកទទួលខុសត្រូវចិននៅស៊ីនជាំង និងរៀបចំផែនការនយោបាយ ជួយ-ទទួលជនជាតិអ៊ុយហ្គូរដែលរត់គេចរួច។ ម្ចាស់ហត្ថលេខីទាំងអស់ចង់ឱ្យអង្គការសហប្រជាជាតិថាត្រូវតែបើកអង្កេតនិងរកវិធីយ៉ាងណាចូលឱ្យដល់ជំរំលត់ដំ បើទោះត្រូវប្រើវិធីគំរាមដាក់ទណ្ឌកម្មក៏ដោយ និងបានជំរុញឱ្យក្រុមហ៊ុនពហុជាតិចំនួន ៨៣ ត្រូវតែបញ្ឈប់ភ្លាមរាល់គ្រប់កិច្ចសហប្រតិបត្តិការជាមួយចិន ដែលប្រើកម្មករអ៊ុយហ្គួ។
ក្រៅអំពីវេទិកាអំពាវនាវ នៅពុធទី ៣០កញ្ញានេះ សភាអឺរ៉ុបក៏បានបើកយុទ្ធនាការសម្តែងសាមគ្គីភាពជាមួយជនជាតិអ៊ុយហ្គួ។ ក្នុងសុន្ទរកថាថ្លែងទៅកាន់សភាអឺរ៉ុប នៅថ្ងៃពុធទី ៣០កញ្ញា ត្រូវជាមួយថ្ងៃមុនបើកជំនួបកំពូលសហភាពអឺរ៉ុប-ចិន លោកស្រី មែរកិល ប្រមុខរដ្ឋាភិបាលអាល្លឺម៉ង់ បានបរិហារទង្វើរបស់ចិនចំពោះជនជាតិភាគតិចអ៊ុយហ្គួ។ លោកស្រីបានអះអាងថា សិទ្ធិមនុស្សជាបញ្ហាសំខាន់ដែលអឺរ៉ុបត្រូវលើមកនិយាយនូវរាល់គ្រប់ជំនួបមួយចិន។ អឺរ៉ុបត្រូវតែបង្ហាញឱ្យបានច្បាស់លាស់អំពីជំហរខុសគ្នារវាងអឺរ៉ុបនិងចិន។ អឺរ៉ុបត្រូវតែសម្តែងការព្រួយបារម្ភ និងលើកទៅជជែកជាមួយចិនអំពីស្ថានភាពរំលោភសិទ្ធិមនុស្សដ៏ឃោរឃៅលើជនជាតិភាគតិច និងស្ថានភាពនយោបាយនៅហុងកុង។ នេះបើតាមប្រសាសន៍របស់លោកស្រីប្រមុខរដ្ឋាភិបាលអាល្លឺម៉ង់ដែលកំពុងធ្វើជាប្រធានផ្លាស់វេនអឺរ៉ុប តែលោកស្រីមិនហៅឱ្យចំជនជាតិភាគតិច “អ៊ុយហ្គួ”ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ