តើប្រព័ន្ធខែលមីស៊ីលរបស់អ៊ីស្រាអែលអាចទប់ទល់គ្រាប់រ៉ុកកែត រាប់ពាន់របស់ក្រុមហាម៉ាសបានយូរប៉ុណ្ណា?
ចុះផ្សាយនៅថ្ងៃ៖
ស្តាប់ - ០៥:៥៨
ក្រៅតែពីបំផ្លាញផ្ទះសម្បែង សម្លាប់ជីវិតប្រជាជន ស៊ីវិល នៅភាគីទាំងសងខាង សង្រ្គាមផ្ទុះអាវុធដាក់គ្នា រវាងកងទ័ពអ៊ីស្រាអែល និងក្រុមហាម៉ាសប៉ាឡេស្ទីន ដែល បានស្តែងឲ្យ ឃើញសមត្ថភាព វាយទប់ស្កាត់របស់ប្រព័ន្ធខែលមីស៊ីល របស់អ៊ីស្រាអែល ដែលបាន ស្ទាក់បាញ់ទម្លាក់ ជាង ៩០ភាគរយ គ្រាប់រ៉ុកកែត ដែលក្រុមហាម៉ាសបាញ់ចេញពីទឹកដីហ្កាហ្សា។ តើក្រុមហាម៉ាស ប៉ាឡេស្ទីន ដែលរស់នៅ ក្នុងតំបន់ហ្កាហ្សា បិទខ្ទប់ជុំជិតដោយរដ្ឋអ៊ីស្រាអែលនោះ បានមីស៊ីល មកពីណា រាប់ពាន់ដើម ដើម្បីបាញ់ស្រោច សំដៅ ទឹកដី អ៊ីស្រាអែលនោះ?
មួយសប្តាហ៍មកហើយ ផ្ទៃមេឃ អ៊ីស្រាអែល និងទឹកដីហ្កាហ្សារបស់ប្រជាជនប៉ាឡេស្ទីន មានស្នាមដានពណ៌ស ខ្វែងខ្វាត់ នៅពេលថ្ងៃ និង ភ្លើងភ្លឺក្រហមហោះឆ្វែលឆ្វាត់ ពេលរាត្រី។ នោះមិនមែនជាគ្រាប់កាំជ្រួចពេលបុណ្យនោះទេ ប៉ុន្តែ ជាគ្រាប់មីស៊ីលរបស់ប្រព័ន្ធខែលមីស៊ីលអ៊ីស្រាអែល ដែលហោះទៅបុក ផ្ទុះបំផ្លាញ គ្រាប់រ៉ុកកែត ដែលក្រុមហាម៉ាសប៉ាឡេស្ទីន បាញ់ស្រោច ចេញពីទឹកដីហ្កាហ្សា សំដៅ ទឹកដីអ៊ីស្រាអែល។
ក្នុងរយៈពេលតែមួយសប្តាហ៍ ក្រុមហាម៉ាស ប៉ាឡេស្ទីន និងក្រុមជីហាតអ៊ីស្លាម ដែលបោះទីតាំងនៅតំបន់ហ្កាហ្សា បាញ់គ្រាប់រ៉ុកកែត ជាង៣ពាន់គ្រាប់ សំដៅទឹកដីអ៊ីស្រាអែល។ ប៉ុន្តែ តាមកងទ័ពអ៊ីស្រាអែល រ៉ុកកែត ជាង ៩០%បាញ់ចេញពីទឹកដីហ្កាហ្សា ត្រូវប្រព័ន្ធខែលមីស៊ីល បាញ់ស្ទាក់ កំទេចនៅលើអាកាស និងនៅសល់ពីនោះ ធ្លាក់នៅក្នុងទឹកដីហ្កាហ្សាខ្លួនឯងផង និងមួយចំនួនតិចប៉ុណ្ណោះដែលបានធា្លក់ក្នុងទឹកដីអ៊ីស្រាអែល។
បើនិយាយពីសមត្ថភាពយោធា នៅក្នុងការប្រយុទ្ធលើកនេះ អ៊ីស្រាអែល នាំមុខដាច់ ជាមួយ កងទ័ពជើងអាកាសដ៏សំបូរបែប ជាពិសេស ប្រព័ន្ធខែលមីស៊ីល Iron Dome ដ៏ពូកែសក្តិសិទ្ធិខាងចាប់ បាញ់ទម្លាក់ មិនឲ្យរ៉ុកកែត របស់ក្រុមហាម៉ាសធ្លាក់ចូលដីអ៊ីស្រាអែលបាន។ ប៉ុន្តែ សួរថា តើប្រព័ន្ធខែលមីស៊ីល អ៊ីស្រាអែល Iron Dome ដ៏មានសមត្ថភាពនឹងអាចតស៊ូ ទ្រាំនឹងគ្រាប់រ៉ុកកែត របស់ក្រុមហាម៉ាស បានយូរប៉ុណ្ណា?
អ្នកជំនាញ តំបន់ដើមបូព៌ា វាយតម្លៃថា ដោយអាចបាញ់ស្រាច គ្រាប់រ៉ុកកែត ជាង ៣ពាន់គ្រាប់សំដៅទឹកដី អ៊ីស្រាអែល ក្នុងរយៈពេលតែមួយសប្តាហ៍ ហើយនិងគ្មានបង្ហាញចេតនា បន្ធូរដៃសោះនោះ គេជឿថា ក្រុមហាម៉ាសប៉ាឡេស្ទីន នៅមានស្តុកគ្រាប់រ៉ុកកែតក្រាសក្រែល សម្រាប់បាញ់ស្រោចទៅលើអ៊ីស្រាអែល យូរថ្ងៃទៀត។ មួយវិញទៀត យុទ្ធសាស្រ្តរបស់ក្រុមហាម៉ាសប៉ាឡេស្ទីន លើកនេះ មិនមែនដើម្បីចង់បានផលចំណេញនយោបាយ ចង់បានមុខមាត់ ក្នុងចំណោមប្រជាជនប៉ាឡេស្ទីន តែមួយមុខនោះទេ ប៉ុន្តែ ក្រុមហាម៉ាសចង់ឃើញផងដែរ អ៊ីស្រាអែលហិចហោច ខាតបង់ លុយ ដោយសារការប្រយុទ្ធលើកនេះ។
ដោយសំរុក បាញ់គ្រាប់រ៉ុកកែត មិនឈប់ និងគ្មានគោលដៅ ច្បាស់លាស់ ក្រុមហាម៉ាស ប៉ាឡេស្ទីន ចង់ជំរុញឲ្យអ៊ីស្រាអែល ចាយលុយ ដូចក្រដាស ព្រោះត្រូវដឹងថា រាល់ ការប្រើប្រព័ន្ធខែលមីស៊ីល Iron Dome មួយឈុត គឺធ្វើឲ្យអ៊ីស្រាអែលចំណាយអស់ ៥ម៉ឺនដុល្លារ។ ការបាញ់ស្ទាក់ ទម្លាក់ រ៉ុកកែត របស់ក្រុមហាម៉ាស ប៉ាឡេស្ទីន នៅមួយសប្តាហ៍មកនេះ បានធ្វើឲ្យអ៊ីស្រាអែលចំណាយអស់ ១៥០លានដុល្លារ។
នៅចំណែកខាងក្រុមហាម៉ាស ប៉ាឡេស្ទីន ទោះគេមិនអាចដឹងពីចំនួនស្តុកមីស៊ីល រ៉ុកកែត ពិតប្រាកដរបស់ក្រុមនេះ ប៉ុន្តែ គេដឹងថា ក្រុមនេះ មានរ៉ុកកែត បាញ់ចម្ងាយមធ្យម ជាច្រើនប្រភេទ ពីរយៈចម្ងាយ ១០គីឡូម៉ែត្រ ទៅដល់ ២០០គីឡូម៉ែត្រ ហើយគ្រាប់រ៉ុកកែត ទាំងអស់ គឺផលិតច្នៃឡើង នៅក្នុងទឹកដីហ្កាហ្សាផ្ទាល់ ប៉ុន្តែ មិនមែននាំចូល ដូចកាលពី ជាង២០ឆ្នាំមុននោះទេ។ គេជឿថា ក្រុមហាម៉ាស អាចផលិតរ៉ុកកែត ក្នុងតំបន់ហ្កាហ្សាផ្ទាល់ ដោយមានជំនួយ គាំទ្រពីខាងអ៊ីរ៉ង់។ សម្រាប់អ្នកតាមដានកិច្ចការតំបន់ដើមបូព៌ា នៅពេលអ៊ីរ៉ង់ បន្ថយ ជំនួយ សម្រាប់ក្រុមហាម៉ាស នៅប៉ុន្មានឆ្នាំចុងក្រោយនេះ ដោយសារជម្លោះរវាងក្រុមអ៊ីស្លាម និកាយស៊ុននីត (ក្រុមហាម៉ាស) និងនិកាយស្ហ៊ីអ៊ីត (អ៊ីរ៉ង់) ក្រុមហាម៉ាសបានជំនួយហិរញ្ញវត្ថុសំខាន់មួយទៀតពីប្រទេសកាតា។ ចំណែក ជំនួយ មនុស្សធម៌របស់អេមីរ៉ាត អារ៉ាប់រួម សម្រាប់ប្រជាជនប៉ាឡេស្ទីននៅតំបន់ហ្កាហ្សា គឺតែងត្រូវ ក្រុមហាម៉ាស គាប ជំរិត យកទៅប្រើសម្រាប់ប្រយោជន៍យោធា។ ហិរញ្ញវត្ថុ ពីកាតា និងសម្ភារៈយោធា មានប្រភពមកពីអ៊ីរ៉ង់ លីប៊ី និងស៊ីរី អនុញ្ញាតឲ្យក្រុមហាម៉ាសមានសមត្ថភាពផលិត រ៉ុកកែត កាន់តែច្រើន និងទំនើប មានកម្លាំងផ្ទុះ កាន់តែខ្លាំងជាងមុន។
សំណួរចោទឡើងនៅត្រង់ថា តើក្រុមហាម៉ាស ប៉ាឡេស្ទីន ដែលរស់នៅ ក្នុង តំបន់ហ្កាហ្សាដ៏តូចមួយ ដែលឡោមព័ទ្ធជុំជិត និងក្រោមការតាមដានឃ្លាំមើលយ៉ាងម៉ត់ចត់របស់អ៊ីស្រាអែល នឹងអាចនាំចូល គ្រឿងផ្ទុះ មកកែច្នៃ ផលិតគ្រាប់រ៉ុកកែតនៅក្នុងតំបន់ហ្កាហ្សាបានយ៉ាងម៉េច?
គេបានលើកសេណារីយ៉ូ ពីរ។ ទី១ ក្រុមហាម៉ាស អាចលួចលាក់ដាក់គ្រឿងផ្ទុះ នៅក្នុងទូកនេសាទ កំបាំងភ្នែកពីការតាមដាន របស់កងទ័ពអ៊ីស្រាអែល។ ដោយសារតែ តំបន់ហ្កាហ្សា ស្ថិតនៅជាប់ឆ្នេរសមុទ្រផ្ទាល់ អ៊ីស្រាអែល មិនអាចគ្រប់គ្រង តាមត្រួតពិនិត្យ រាល់ទូកនេសាទរបស់ប៉ាឡេស្ទីន នៅហ្កាហ្សាបាននោះទេ។
សេណារីយ៉ូទី២ គឺ ក្រុមហាម៉ាសអាចលួចដឹកជញ្ជូននាំចូលឧបករណ៍ គ្រឿងផ្ទុះ សម្រាប់ផលិតរ៉ុកកែត តាមរយៈ ផ្លូវរូងក្រោមដី ចេញពីទឹកដី អេហ្ស៊ីប ចូលទឹកដីហ្កាហ្សា។ ផ្លូវរូងក្រោមដី ជាអាវុធយុទ្ធសាស្រ្តសំខាន់មួយ របស់ក្រុមហាម៉ាស ប៉ាឡេស្ទីន ដើម្បី លួច ដឹកជញ្ជូន និងសំងំផលិតគ្រាប់រ៉ុកកែត។ ទោះអ៊ីស្រាអែល បាញ់កម្ទេច នៅក្នុងប្រតិបត្តិការយោធាកន្លងមក ប៉ុន្តែ ក្រុមហាម៉ាសដែលចិញ្ចឹមចិត្ត ធ្វើសង្រ្គាមប្រឆាំងអ៊ីស្រាអែល នៅតែតាំងចិត្ត សង់រូងក្រោមដី ខ្វាត់ខ្វែង មិនចេះហត់នឿយ ដូចជាសត្វស្រមោច៕
នៅប៉ុន្មានថ្ងៃចុងក្រោយនេះ កងទ័ពអ៊ីស្រាអែល បានសម្រុកវាយប្រហារសំដៅទីតាំង របស់ក្រុមហាម៉ាស ជាពិសេសផ្លូវរូងក្រោមដី និងកន្លែងផលិតគ្រាប់រ៉ុកកែត។ ដោយសំដៅ បាញ់បំផ្លាញ កន្លែងស្តុកគ្រាប់រ៉ុកកែត កន្លែងផលិត និងទីតាំងបញ្ជាការដ្ឋានរបស់ក្រុមហាម៉ាស ប៉ាឡេស្ទីន នៅរូងក្រោមដី អ៊ីស្រាអែល សង្ឃឹម ថា ក្រុមហាម៉ាស នឹងលែងមានគ្រាប់រ៉ុកកែត ដើម្បីបាញ់ស្រោចចូលទឹកដីអ៊ីស្រាអែលតទៅទៀត។ បើអ៊ីស្រាអែលធ្វើបានសម្រេចមែន នោះ អ៊ីស្រាអែលមិនត្រឹមតែ មិនខាតបង់ប្រាក់ ដោយសារត្រូវប្រើប្រព័ន្ធខែលមីស៊ីលតែប៉ុណ្ណោះទេ ប៉ុន្តែ អ៊ីស្រាអែលនឹងអាចជៀសផុត មិនប្រើ កម្លាំងទ័ពជើងគោក វាយចូល ឈ្លានពានទឹកដីហ្កាហ្សា ដូចកាលពី២០១៤។ កាលណោះ ប្រតិបត្តិការ ទ័ពជើងគោករបស់អ៊ីស្រាអែល ទៅក្នុងតំបន់ហ្កាហ្សា បានសម្លាប់ប្រជាជនប៉ាឡេស្ទីន ២២៥១នាក់ ដែលនៅក្នុងនោះ ជិត ១៥០០នាក់ ជាប្រជាជនស៊ីវិល។ នៅពេលតំបន់ហ្កាហ្សា ត្រូវបំផ្លាញខ្ទេចខ្ទាំ និងបាត់បង់ជីវិតដ៏ច្រើន ពាន់នាក់ ដោយសារស្នាដៃវាយប្រហាររបស់ទ័ពអ៊ីស្រាអែល ភាគីអ៊ីស្រាអែល ក៏ត្រូវបាត់បង់ជីវិតទាហានរបស់ខ្លួនចំនួន ៦៧នាក់ និងប្រជាជនស៊ីវិល ៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ