ហេតុអ្វីបានជាអាមេរិក និងតួកគីប្រជែងគ្នាចង់ឲ្យអូទ្រីសបញ្ជូនអ្នកជំនួញតួកគីម្នាក់ទៅឲ្យខ្លួន?
ចុះផ្សាយនៅថ្ងៃ៖
ស្តាប់ - ០៤:៥២
អ្នកជំនួញតួកគីម្នាក់ឈ្មោះសេហ្ស៊ីន បារ៉ាន កូរម៉ាដែលកំពុងជាប់ឃុំនៅក្នុងប្រទេសអូទ្រីសកំពុងក្លាយជាមនុស្សម្នាក់ដែលអាមេរិក និងតួកគីចង់បានដូចគ្នា។ តើអាមេរិក ឬតួកគីដែលអូទ្រីសត្រូវបញ្ចូនលោកសេហ្ស៊ីន បារ៉ាន ក័រម៉ាទៅឲ្យ?។ តុលាការអូទ្រីសនឹងផ្តល់ចម្លើយចំពោះសំណួរនេះនាពេលខាងមុខ។ តែទោះជាតុលាការអូទ្រីសត្រូវសម្រេចយ៉ាងណាក៏ដោយក៏គេអាចនិយាយបានថា រឿងរ៉ាវមួយនេះនឹងបង្កឲ្យមានភាពតានតឹងបន្ថែមទៀតរវាងក្រុងវ៉ាស៊ីនតោន និងក្រុងអង់ការ៉ា។ តើអ្នកជំនួញតួកគីរូបនេះជានរណា?
អ្នកជំនួញតួកគីរូបណាមិនដឹងទេ តែបើអ្នកជំនួញតួកគីលោកសេហ្ស៊ីន បារ៉ាន ក័រម៉ាពិតជាអ្នកជំនួញមិនធម្មតាឡើយ។ មិនធម្មតា ព្រោះរូបគាត់ជាបេះដូង ឬថាជាដើមចមនៃរឿងអាស្រូវហិរញ្ញវត្ថុជាច្រើន។ រឿងអាស្រូវមួយនេះបានធ្វើឲ្យអ្នកដឹកនាំកម្មវិធីព័ត៌មានទូរទស្សន៍តួកគីម្នាក់អស់ការងារធ្វើ និងរដ្ឋមន្រ្តីក្រសួងមហាផ្ទៃដ៏មានឥទ្ធិពលរបស់ប្រធានាធិបតីតួកគីលោកអ៊ែរដូហ្កានកំពុងទើសទាល់ចិត្ត។ បន្ទាប់ពីបានភៀសខ្លួនទៅកាន់ប្រទេសអូទ្រីសក្នុងខែធ្នូ ឆ្នាំ ២០២០ លោកបារ៉ាន ក័រម៉ាត្រូវបានប៉ូលិសអូទ្រីសចាប់ខ្លួនក្នុងថ្ងៃទី១៩ មិថុនា ឆ្នាំ ២០២១ តាមសំណើរបស់អាមេរិក។ ក្រុមរដ្ឋអាជ្ញាអាមេរិកបានចោទលោកបារ៉ាន ក័រម៉ា និងក្រុមមនុស្សឃុបឃិតនៅអាមេរិកពីបទបានលាងលុយកខ្វក់ជាង ១១២លានអឺរ៉ូដែលទទួលបានដោយខុសច្បាប់ពីគណនីនៅតួកគី និងនៅលុចសំបួរ។
តាមក្រុមរដ្ឋអាជ្ញាអាមេរិកដដែល លោកបារ៉ាន ក័រម៉ាបានប្រើលុយកខ្វក់ទាំងនេះដើម្បីទិញក្រុមហ៊ុនអាកាសចរណ៍តួកគីឈ្មោះ Borajet ទិញសណ្ធាគារនៅតួកគី និងនៅស៊្វីស រួមទាំងទិញផ្ទះសម្បែងជាច្រើននៅក្នុងក្រុងអ៊ីស្តង់ប៊ូល។ តែនៅក្នុងបទសម្ភាសន៍មួយជាមួយអ្នកកាសែតតួកគីម្នាក់ពីពន្ធនាគារអូទ្រីសដែលលោកបារ៉ាន ក័រម៉ាកំពុងជាប់ឃុំ អ្នកជំនួញតួកគីរូបនេះបានច្រានចោលលើការចោទប្រកាន់ទាំងនេះរបស់ក្រុមរដ្ឋអាជ្ញាអាមេរិក រួចមិនភ្លេចបញ្ជាក់ទេថា លោកចង់វិលត្រឡប់ទៅប្រទេសកំណើតរបស់លោកវិញ ទោះបីជារដ្ឋអំណាចតួកគីកំពុងស្វែងចាប់ខ្លួនលោកក៏ដោយ។ មន្រ្តីទូតតួកគីម្នាក់សុំមិនបញ្ចេញឈ្មោះនៅស្ថានទូតតួកគីប្រចាំប្រទេសអូទ្រីសបានប្រាប់ AFP ថា ក្រុងអង់ការរ៉ាចង់កាត់ទោសលោកបារ៉ាន ក័រម៉ាពីបទលាងលុយកខ្វក់។
តាមទីភ្នាក់ងារសារព័ត៌មានតួកគី DHA ក្រុងអង់ការ៉ាបានបញ្ជូនទៅឲ្យរដ្ឋអំណាចក្រុងវីយែនរួចហើយនូវសំណើសុំធ្វើបត្យាប័នលោកបារ៉ាន ក័រម៉ា។ គេនៅមិនទាន់ដឹងពីការសម្រេចយ៉ាងណារបស់តុលាការអូទ្រីសទេ។ តែបើតុលាការអូទ្រីសសម្រេចបញ្ជូនលោកបារ៉ាន ក័រម៉ាឲ្យត្រឡប់ទៅតួកគីវិញ នោះលទ្ធភាពនៃការធ្វើបត្យាប័នលោកបារ៉ាន ក័រម៉ាពីតួកគីទៅឲ្យអាមេរិកជារឿងមិនអាចទៅរួចទេដោយសារតែភាពខុសគ្នាផ្លូវច្បាប់រវាងប្រទេសទាំងពីរ។ ចូរកុំភ្លេចថា តួកគីធ្លាប់បានស្នើឲ្យអាមេរិកបញ្ជូនមេប្រឆាំងតួកគីលោក Fethullah Gülen ទៅឲ្យខ្លួនដែរ តែអាមេរិកបដិសេធ។ សំណួរដែលបានចោទឡើងពេលនេះគឺថា ចុះបើតួកគីក៏ចង់កាត់ទោសលោកបារ៉ាន ក័រម៉ាក្នុងបទលាងលុយកខ្វក់ដូចអាមេរិកដែរនោះ ហេតុអ្វីបានជាអាមេរិកចង់ដណ្តើមលោកបារ៉ាន ក័រម៉ាពីតួកគីទៅកាត់ទោសនៅក្នុងសំណុំរឿងដូចគ្នានេះ?។
តាមពិតទៅ រឿងរ៉ាវរវាងលោកបារ៉ាន ក័រម៉ា និងអាមេរិកទាក់ទងនឹងការលាងលុយកខ្វក់គ្រាន់ជារឿងមួយជ្រុងប៉ុណ្ណោះ ព្រោះបើតាមអង្គការក្រៅរដ្ឋាភិបាលមួយ ឈ្មោះលោកសេហ្ស៊ីន បារ៉ាន ក័រម៉ាបានស្ថិតក្នុងបញ្ជីនៃក្រុមឥស្សរជនដែលតួកគីប្រើដើម្បីទទួលបានការជឿទុកចិត្ត និងការអនុគ្រោះពីលោកដូណាល់ ត្រាំចំពោះតួកគី ក្រោយពីលោកត្រាំបានជាប់ឆ្នោតប្រធានាធិបតីអាមេរិកក្នុងឆ្នាំ ២០១៦។ តាមអង្គការក្រៅរដ្ឋាភិបាលមួយនេះដដែល លោកបារ៉ាន ក័រម៉ាជាអ្នកជួយសម្រួលឲ្យក្រុមឥស្សរជនអាមេរិកដែលស្និទ្ធិនឹងលោកត្រាំធ្វើដំណើរទៅកាន់តួកគីក្នុងឆ្នាំ ២០១៨ ដើម្បីទទួលបានការដោះលែងគ្រូគង្វាលអាមេរិកលោក Andrew Brunson ដែលជាប់ឃុំឃាំងក្នុងទឹកដីតួកគី។ អ៊ីចឹងហើយបានជាមានការលើកឡើងថា ការប្រទាញប្រទង់គ្នារវាងតួកគី និងអាមេរិកជុំវិញលោកបារ៉ាន ក័រម៉ាពេលនេះមានបង្កប់ដោយរឿងនយោបាយជាងរឿងអាស្រូវរបស់លោកបារ៉ាន ក័រម៉ាទៅទៀត។
ដូច្នេះចង់ ឬមិនចង់ ទំនាក់ទំនងរវាងអាមេរិក និងតួកគីដែលកំពុងល្អក់កករស្រាប់ដោយសំណុំរឿងមួយចំនួននឹងរឹតតែឡើងតានតឹងមួយកម្រិតទៀតជាមួយនឹងរឿងរ៉ាវលោកបារ៉ាន ក័រម៉ាពេលនេះ។ គួររម្លឹកថាកន្លងមក មានសំណុំរឿងជាច្រើនដែលបានបំពុលទំនាក់ទំនងរវាងក្រុងអង់ការ៉ា និងក្រុងវ៉ាស៊ីនតោន ពិសេសការកាត់ទោសលើធនាគារតួកគីមួយនៅអាមេរិកពីបទបំពានទណ្ឌកម្មប្រឆាំងអ៊ីរ៉ង់ និងការដែលតួកគីបានទិញគ្រាប់មីស៊ីលរុស្ស៊ី។ សម្រាប់ប្រធានាធិបតីតួកគីលោកអ៊ែរដូហ្កាន រឿងរ៉ាវជុំវិញអ្នកជំនួញតួកគីលោកបារ៉ាន ក័រម៉ាពេលនេះមិនមែនជាដំណឹងល្អសម្រាប់លោកទេ។ មិនមែនជាដំណឹងព្រោះវាបានកើតមានឡើង ចំពេលដែលលោកកំពុងព្យាយាមកាត់បន្ថយភាពតានតឹងជាមួយអាមេរិក និងអឺរ៉ុបដើម្បីទាក់ទាញក្រុមអ្នកវិនិយោគបរទេស និងស្តារសេដ្ឋកិច្ចតួកគីឡើងវិញ។
« អ៊ែរដូហ្កានកំពុងស្ថិតក្នុងដំណាក់ការនៃការផ្សះផ្សារជាមួយអាមេរិក និងព្យាយាមរំងាប់ភាពតានតឹងដើម្បីទទួលបានការឆ្លើយតបផ្នែកសេដ្ឋកិច្ច » នេះជាការយល់ឃើញរបស់លោក Max Hoffman ពី Center for American Progress៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ