អាមេរិកប្រាប់តួកគី និងរុស្ស៊ីឲ្យដកទ័ព និងទាហានស៊ីឈ្នួលពីទឹកដី លីប៊ី
រដ្ឋបាលអាមេរិកថ្មីរបស់លោកចូ បៃដិនបានបង្ហាញជំហរច្បាស់ នៅក្នុងវិបត្តិលីប៊ី។ នៅក្នុងកិច្ចប្រជុំរបស់ក្រុមប្រឹក្សាសន្តិសុខរបស់អង្គការសហប្រជាជាតិ កាលពីថ្ងៃព្រហស្បតិ៍ ម្សិលមិញ សហរដ្ឋអាមេរិក តាមរយៈ ឯកអគ្គរដ្ឋទូតអាមេរិកប្រចាំអង្គការសហប្រជាជាតិ បាននិយាយចំៗ ប្រាប់ឲ្យតួកគី និងរុស្ស៊ី ចាប់ផ្តើមដកកងទ័ព ឬទាហានស៊ីឈ្នួលរបស់ខ្លួន ចេញពីទឹកដី លីប៊ី ជាបន្ទាន់។ នៅថ្ងៃម្សិលមិញ ក្រុមប្រឹក្សាសន្តិសុខរបស់អង្គការសហប្រជាជាតិ បានបោះឆ្នោតលើសេចក្តីសម្រេចមួយដែរ ទាមទារឲ្យកងទ័ពបរទេស ដកខ្លួនចេញពីប្រទេសលីប៊ី ដើម្បីបើកផ្លូវ ទុកឲ្យភាគីជម្លោះ នៅលីប៊ី ដោះស្រាយ បញ្ហាដោយខ្លួនឯង ដោយគ្មានអន្តរាគមន៍លូកដៃពីបរទេស។
ចុះផ្សាយនៅថ្ងៃ៖
ស្តាប់ - ០២:២៣
ផ្ទុយពីរដ្ឋបាលលោកដូណាល់ ត្រាំ ដែលហាក់មានជំហរស្រពិចស្រពិល ក្នុងសំណុំរឿងលីប៊ី ដោយសារតែ នយោបាយចង់ដកខ្លួនរបស់អាមេរិកចេញពីតំបន់អាហ្វ្រិក រដ្ឋាភិបាលអាមេរិករបស់លោកចូ បៃដិនវិញ បានបញ្ជាក់ច្បាស់ពីជំហររបស់អាមេរិក នៅក្នុងជម្លោះលីប៊ី ដែលជាប្រធានបទសំខាន់ នៅក្នុងកិច្ចប្រជុំ របស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃព្រហស្បតិ៍ម្សិលមិញ។
នៅក្នុងកិច្ចប្រជុំរបស់ក្រុមប្រឹក្សាសន្តិសុខ កាលពីថ្ងៃម្សិលមិញ អគ្គរដ្ឋទូតអាមេរិកប្រចាំអង្គការសហប្រជាជាតិ បាននិយាយប្រាប់ទៅតួកគី និង រុស្ស៊ី ឲ្យចាប់ផ្តើមជាបន្ទាន់ ដកកងទ័ព ទាហានស៊ីឈ្នួលបរទេស ដែលពួកគេបានរើសបញ្ចូល ជួលជាប្រាក់ និងដាក់ពង្រាយក្នុងទឹកដី លីប៊ី។
តាមអគ្គរដ្ឋទូតអាមេរិក រុស្ស៊ី តួកគី អេមីរ៉ា អារ៉ាប់រួម ត្រូវគោរពអធិបតេយ្យភាពរបស់លីប៊ី និងឈប់ធ្វើអន្តរាគមន៍យោធា នៅ លីប៊ីតទៅទៀត។ ទៅតាម កិច្ចព្រមព្រៀង ស្តីពីបទឈប់បាញ់ ដែលចុះហត្ថលេខា នៅខែ តុលា ឆ្នាំ មុន ដោយភាគីប្រយុទ្ធទាំងសងខាង កងទ័ពបរទេស និងទាហានស៊ីឈ្នួល ត្រូវចាកចេញពីលីប៊ី យ៉ាងយូរ ក្នុងរយៈពេល ៣ខែ។ កាលកំណត់ត្រូវបញ្ចប់នៅថ្ងៃទី ២៣មករាចុងសប្តាហ៍នេះ ប៉ុន្តែ គេគ្មានឃើញសញ្ញាដកកងទ័ពបរទេសណាមួយនោះទេ។
នៅខែធ្នូកន្លងទៅ អង្គការសហប្រជាជាតិបានប៉ាន់ស្មានថា មានទាហានស៊ីឈ្នួល និងកងទ័ពបរទេស ប្រមាណ ២ម៉ឺននាក់ មានវត្តមាន ក្នុងទឹកដី លីប៊ី ដើម្បីជួយប្រយុទ្ធឲ្យគូភាគីជម្លោះ នៅលីប៊ី។ ក្នុងចំណោមទាហានបរទេស គេសំគាល់ឃើញមានទាហានស៊ីឈ្នួលជាតិ រុស្ស៊ី ស៊ូដង់ ឆាត ហើយនិងពួកឧទ្ទាមស៊ីរី ដែលតួកគីបញ្ជូន ទៅលីប៊ី។
នៅក្នុងសង្រ្គាមស៊ីវិលលីប៊ី ដែលលែងជាសង្រ្គាមប្រយុទ្ធគ្នារវាងជនជាតិ លីប៊ី ទាហានបរទេស និងទាហានស៊ីឈ្នួល មានវត្តមាននៅគ្រប់កន្លែង។ ទៅតាមកិច្ចព្រមព្រៀងយោធា ជាមួយ រដ្ឋាភិបាលជាតិលីប៊ី ដែលកាន់កាប់តំបន់ភាគខាងកើតលីប៊ី តួកគីបានបញ្ជូនទ័ព ទៅជួយរដ្ឋាភិបាលជាតិលីប៊ី។ ចំណែក រុស្ស៊ី អេមីរ៉ា អារ៉ាប់រួម អេហ្ស៊ីប ផ្តល់ជំនួយយោធាដល់មេដឹកនាំ ហាហ្វតា ដែលគ្រប់គ្រង តំបន់ខាងលិចលីប៊ី។
ឯកអគ្គរដ្ឋទូតរុស្ស៊ី បានបដិសេធ ថា គ្មានកងទ័ពពាក់ឯកសណ្ឋានរុស្ស៊ីនៅទឹកដីលីប៊ីនោះទេ ប៉ុន្តែ លោកក៏មិនប្រកែកដែរ ពីរឿងវត្តមានទាហានស៊ីឈ្នួលរុស្ស៊ី នៅលីប៊ីនោះ។ នៅក្នុងសេចក្តីសម្រេចកាលពីថ្ងៃព្រហស្បតិ៍ ក្រុមប្រឹក្សាសន្តិសុខ ដែលមានផងដែររុស្ស៊ី បារាំង ឥណ្ឌា បានទាមទារឲ្យគេដកជាបន្ទាន់ កងទ័ព និងទាហានស៊ីឈ្នួលចេញពី លីប៊ី ដើម្បី បើកផ្លូវឲ្យភាគីជម្លោះលីប៊ី ចាប់ផ្តើមចរចាផ្នែកនយោបាយ នៅប៉ុន្មានថ្ងៃខាងមុខ នៅទីក្រុងហ្សឺណែវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ