FAO ៖ ធនធានទឹកនិងគុណភាពដី ធ្លាក់ចុះ ជាការគំរាមកំហែងសុវត្ថិភាពចំណីអាហារ សម្រាប់អនាគត
ចុះផ្សាយនៅថ្ងៃ៖
ស្តាប់ - ០៤:៣៥
អង្គការស្បៀងអាហារពិភពលោកបានទាញសញ្ញាអាសន្នស្តីអំពីការធ្លាក់ចុះយ៉ាងខ្លាំងនៃធនធានទឹកនិងដី របស់ភពផែនដី ដោយសារសកម្មភាពរបស់មនុស្ស។ ស្ថានភាពធនធានដីនិងទឹកធ្លាក់ដុនដាបខ្លាំង ដល់កំរិតមួយដែលបង្កគ្រោះថ្នាក់ និងគំរាមកំហែងដល់ប្រព័ន្ធខ្លះ មានជាអាទិ៍ប្រព័ន្ធសុវត្ថិភាពចំណីអាហារ។
នៅក្នុងរបាយការណ៍ដ៏ក្រាស់ឃ្នឹក ស្តីពី ស្ថានភាព ដី និងទឹក សម្រាប់កសិកម្មនិងចំណីអាហារនៅលើពិភពលោក អង្គការស្បៀងអាហារនិងកសិកម្មរបស់អង្គការសហប្រជាតិ ហៅកាត់ថាអង្គការFAO បានផ្តល់សេចក្តីសន្និដ្ឋានគួរឱ្យរន្ធត់ថា ធនធានទឹកនិងគុណភាពដី បានធា្លក់ចុះដុនដាបខ្លាំងបំផុតក្នុងរយៈពេល១០ឆ្នាំចុងក្រោយនេះ ពោលគឺចាប់តាំងពីអង្គការបានចាប់ផ្តើមចេញរបាយការណ៍ជាលើកដំបូងនៅឆ្នាំ២០១១។ កាលណោះ ការសិក្សាបានសម្គាល់ឃើញរួចទៅហើយថា ប្រព័ន្ធអេកូសាស្ត្រលើដីនិងក្នុងទឹក កំពុងស្ថិតក្នុងស្ថានភាព “គ្រោះថ្នាក់”។ ហើយមិនតែប៉ុណ្ណោះ តាំងពីពេលនោះមក ប្រព័ន្ធអេកូសាស្ត្រ រងសម្ពាធកាន់តែខ្លាំងនិងកាន់តែច្រើន និងខ្លះឈានដល់កំរិត ធ្ងន់ធ្ងររ៉ាំរៃទៅហើយផង។ នេះបើតាមការគូសបញ្ជាក់របស់លោក Qu Dongyu អគ្គនាយកអង្គការFAO នៅក្នុងអារម្ភកថារបស់របាយការណ៍ ដោយទាញសញ្ញាអាសន្ន បញ្ជាក់ពីក្តីព្រួយបារម្ភ ខ្លាចតែពិភពលោកជួបគ្រោះហានិភ័យមិនអាចរកស្បៀងអាហារបានគ្រប់គ្រាន់សម្រាប់យកមកចិញ្ចឹមមនុស្សលោក ដែលនឹងកើនឡើងដល់ជិត១០ពាន់លាននាក់នៅឆ្នាំ២០៥០។
អង្គការFAO សន្និដ្ឋានថា ដើម្បីអាចចិញ្ចឹម និងឆ្លើយតបទៅនឹងសេចក្តីត្រូវការរបស់មនុស្សជាតិនៅឆ្នាំ២០៥០ ស្របតាមកម្មវត្ថុរបស់អង្គការសហប្រជាជាតិដែលកំណត់ ថានឹងគ្មានភាពអត់ឃ្លានសោះនៅលើពិភពលោកនាឆ្នាំ២០៣០បាន ពិភពលោកត្រូវបង្កើនផលិតកម្មកសិកម្ម ចំណីអាហារ សារធាតុសរសៃ និងជីវឥន្ធនៈ ជិត៥០%លើសអ្វីដែលពិភពលោកផលិតនៅឆ្នាំ២០១២។ ជាទូទៅ គិតក្នុងកំរិតពិភពលោក គេនៅតែអាចបំពេញសេចក្តីត្រូវការផ្នែកអាហាររូបត្ថម្ភដល់ពលរដ្ឋទាំង៩៧០០លាននាក់ បានពីពេលនេះដល់ឆ្នាំ២០៥០ ប៉ុន្តែបើគិតតាមកំរិតមូលដ្ឋានវិញ ទើបឃើញមានបញ្ហាធ្ងន់ធ្ងរខ្លាំង ដោយបរិមាណមនុស្សហូបមិនគ្រប់គ្រាន់បានកើនឡើងជាលំដាប់ អ្នកឈឺជំងឺធាត់ជ្រុលមានចំនួនកាន់តែច្រើននាក់ និងគ្រប់កន្លែង។ បន្ទាប់ពីធ្លាក់ចុះ បានមួយរយៈ ចំនួនមនុស្សធ្លាក់ក្នុងគ្រោះខ្វះស្បៀងអាហារ ហូបមិនគ្រប់គ្រាន់ បានចាប់កើនឡើងជាថ្មីវិញ ពី៦០៤លាននាក់នៅឆ្នាំ២០១៤ ទៅ ៧៦៨លាននាក់នៅឆ្នាំ២០២០។
តើមានកត្តាអ្វីដែលជំរុញឱ្យFAO ហ៊ានអះអាងបែបនេះ ?
ការលូតលាស់ដ៏លឿនរហ័សក្នុងវិស័យនគរូបនីយកម្ម បូកផ្សំនឹងកំណើនប្រជាជននៅលើភពផែនដី នឹងធ្វើឱ្យសេចក្តីត្រូវការផ្នែកស្បៀងអាហារកើនឡើងដែរ ហើយនិន្នាការកើនឡើងបែបនេះត្រូវបន្តជាច្រើនទសវត្សរ៍ជាប់ៗគ្នាទៅមុខទៀត។ ប៉ុន្តែទន្ទឹមពេលជាមួយគ្នានេះ គ្រប់សន្ទទស្សន៍សុទ្ធតែចង្អុលប្រាប់ថា ផលិតកម្មកសិកម្មបានចាប់បន្ថយកំណើន និងបន្ថយល្បឿន ហើយសមត្ថភាពផលិតរបស់ភពផែនដីចាប់ធ្លាក់ចុះជាលំដាប់និងយ៉ាងឆាប់រហ័ស។ ឯការខូចខាតបរិស្ថាន ក៏កើនឡើងឥតឈប់ទៀត។
របាយការណ៍ដដែល ពន្យល់លម្អិតទៀតថា ដោយសារទង្វើរបស់មនុស្ស គុណភាពដីបានធ្លាក់ចុះ ប្រភពទឹកក្រោមដីក៏ចាប់ខ្សត់ ហើយការប្រែប្រួលអាកាសធាតុ បានបង្ហិនបង្ហោចផលិតផលកសិកម្មកាន់តែច្រើនឡើងៗ ជាពិសេសក្នុងតំបន់ដែលចាំបាច់ត្រូវមានកំណើនសេដ្ឋកិច្ចខ្លាំង។
ប្រសិនបើគ្មានការប្តូរផ្លាស់ទេ ការបង្កើនផលិតកម្មចំណីអាហារបន្ថែមចំនួន៥០% ដើម្បីបំពេញសេចក្តីត្រូវការពិភពលោក អាចនឹងស្រូបយកទឹកពីស្រទាប់ដីបន្ថែមរហូតដល់ទៅ៣០%សម្រាប់ធ្វើកសិកម្ម។ កំណើននិងសេចក្តីត្រូវការប្រើទឹកខ្លាំងដូច្នេះ អាចនឹងបង្កឱ្យមានមហន្តរាយធម្មជាតិ បរិស្ថានផង និងជំរុញឱ្យមានការប្រកួតប្រជែងដណ្តើមធនធានគ្នា ដែលអាចបណ្តាលឱ្យមានលេចឡើងនូវបញ្ហាថ្មីផ្សេងផង និង ជម្លោះសង្គមផង។
ដើម្បីឆ្លើយតបទៅនឹងហានិភ័យទាំងនេះ FAO ណែនាំឱ្យមានការអភិវឌ្ឍន៍កំរិតពិភពលោក នូវកសិកម្មនិងផលិតកម្មដែលមានទំនួលខុសត្រូវ គោរពបរិស្ថាន និងទំនើបនៅចំពោះមុខការប្រែប្រួលអាកាសធាតុ។ ម្ចាស់របាយការណ៍បានលើកឡើងផងដែរអំពីតម្លៃសំខាន់នៃការប្រើនិងគ្រប់គ្រងបច្ចេកវិទ្យាថ្មី សម្រាប់លើកកម្ពស់គុណភាពដីដែលគ្មាននរណាយកចិត្តទុកដាក់ពីមុន ដីដែលជួបគ្រោះរាំងស្ងួត និងដីខ្វះជាតិទឹក។
សុវត្ថិភាពចំណីអាហាររបស់ពិភពលោកនាពេលអនាគតរំពឹងលើការការពារថែទាំប្រភពធនធានធម្មជាតិដីនិងទឹកនេះហើយ។ នេះជាសារបញ្ចប់របស់លោកអគ្គនាយកអង្គការស្បៀងអាហារនិងកសិកម្មដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ