តម្លៃស្បៀងអាហារបន្តកើនឡើងខ្ពស់ក្នុងខែវិច្ឆិកា ខណៈជីវភាពកាន់តែលំបាក ដោយសារវិបត្តិសេដ្ឋកិច្ច
នៅក្នុងខែវិច្ឆិកាកន្លងទៅ តម្លៃស្បៀងអាហារ បានបន្តកើនឡើងខ្ពស់បន្ថែមទៀត។ យោងតាមអង្គការ FAO តម្លៃស្បៀងអាហារ បានបន្តកើនឡើង ៤ខែជាប់គ្នាមកហើយ។ ជីវភាពប្រជាជន ជាពិសេសនៅតាមប្រទេសក្រីក្រ កាន់តែលំបាក ខណៈវិបត្តិសេដ្ឋកិច្ចបន្តកៀបសង្កត់ ដោយសារតែបញ្ហាជំងឺឆ្លងកូវីដ១៩។
ចុះផ្សាយនៅថ្ងៃ៖
ស្តាប់ - ០២:៤៩
ថ្វីបើអត្រាតម្លៃស្បៀងអាហារ ក្នុងខែវិច្ឆិកា បានកើនឡើងទាបជាងខែតុលាបន្តិច ពោលគឺប្រមាណ ១.២% ក៏ប៉ុន្តែ តម្លៃស្បៀងអាហារ បានកើនតម្លៃ ខ្ពស់បំផុត មិនធ្លាប់មានទេ បើគិតពីខែមិថុនា ឆ្នាំ២០១១មក។ អង្គការស្បៀងអាហារ និងកសិកម្ម ហៅកាត់ថា FAO បានអះអាងថា តម្លៃស្បៀងអាហារជាមូលដ្ឋាន បានកើនខ្ពស់ជាលំដាប់ ៤ខែមកនេះ ជិតស្មើអត្រាតម្លៃ កាលពីខែកុម្ភៈ ឆ្នាំ២០១១។
តម្រូវការនៃស្រូវសាឡី និងផលិតផលធ្វើពីទឹកដោះគេ បានកើនឡើងខ្លាំង ហើយបានទាញតម្លៃវត្ថុធាតុដើម ឲ្យកើនឡើងខ្ពស់ នៅទូទាំងពិភពលោក ជាពិសេសគឺតម្លៃស្រូវសាឡីតែម្តង។ ដោយឡែក តម្លៃអង្ករ ស្ថិតនៅមានលំនឹង មិនកើនឡើងទេ។ យោងតាមអង្គការ FAO ឈ្មួញបានព្យាយាមទិញបម្រុងស្តុកទុក ក្នុងរយៈពេលខ្លី បន្ទាប់ពីសង្កេតឃើញ ទីផ្សារនិងទំហំវត្ថុធាតុដើម កាន់តែតូចចង្អៀត។ មានការព្រួយបារម្ភផងដែរ អំពីគ្រោះធម្មជាតិ ភ្ញៀងធ្លាក់ខ្លាំងធ្វើឲ្យខូចខាតទិន្នផល ព្រមទាំងវិធានការបិទខ្ទប់ ដែលរដ្ឋាភិបាលរុស្ស៊ីអាចនឹងសម្រេច ដើម្បីរារាំងការនាំចេញស្រូវសាឡី។
ក្រៅពីគ្រាប់ធុញ្ញជាតិ ស្ករក៏បានឡើងតម្លៃដែរ ប្រមាណជា១.៤% បើធៀបទៅខែតុលា និង៤០% បើធៀបទៅនឹងតម្លៃ កាលពីឆ្នាំ២០២០។ តម្លៃស្ករឡើងថ្លៃ ដោយសារតម្រូវការអេតាណុល ឡើងខ្ពស់ បើទោះបីជាមានសញ្ញាវិជ្ជមាន នៃទំហំនាំចេញ របស់ឥណ្ឌា និង ថៃក៏ដោយ។ ដោយឡែក តម្លៃប្រេងចម្រាញ់ពីគ្រាប់ធុញ្ញជាតិ បានធ្លាក់ចុះបន្តិច ចំនួន ០.៣%។ ដូចគ្នាដែរ តម្លៃសាច់សត្វ បានបន្តធ្លាក់ចុះ ចំនួន ០.៩% ក្នុងខែវិច្ឆិកា ដែលជាខែទី៤ជាប់គ្នាហើយ។ កត្តានេះ គឺដោយសារតែតម្រូវសាច់សត្វ ក្នុងទីផ្សារចិនបានធ្លាក់ចុះ បូកផ្សំជាមួយនឹងទំហំនាំចេញ កាន់តែច្រើន របស់អូស្ត្រាលី។
យ៉ាងណាក៏ដោយ អង្គការ FAO រំពឹងថា ក្នុងឆ្នាំ២០២១នេះ ការប្រមូលទិន្នគ្រាប់ធុញ្ញជាតិ គ្រប់ប្រភេទ នឹងកើនឡើងខ្ពស់។ អ្នកជំនាញរំពឹងថា ទិន្នផលនឹងអាចមានចំនួន ២.៧៩១ពាន់លានតោន ពោលគឺកើនប្រមាណ០.៧% បើប្រៀបធៀបទៅឆ្នាំ២០២០។ យោងតាមព្រឹត្តិបត្រប្រចាំខែ ស្តីពីតម្លៃគ្រាប់ធុញ្ញជាតិ គឺក្នុងឆ្នាំ២០២១ ទិន្នផលគ្រាប់ធុញ្ញជាតិបន្ទាប់បន្សំ អាចនឹងកើនចំនួន ១.៤% ចំណែកទិន្នផលស្រូវអង្ករ អាចនឹងកើន០.៩%។ ផ្ទុយទៅវិញទិន្នផលស្រូវសាឡី នឹងធ្លាក់ចុះ ១%។
អ្នកជំនាញអង្គការ FAO ព្យាករណ៍ថា ទិន្នផលដំណាំបន្លៃផ្លែឈើ នឹងចុះថយដែរ នៅតាមប្រទេសដែលមានប្រាក់ចំណូលតិច។ ប្រទេសចំនួន៤៤ នឹងត្រូវការជំនួយស្បៀងអាហារពីខាងក្រៅ ក្នុងនោះមាន៣៣ប្រទេស គឺស្ថិតនៅទ្វីបអាហ្វ្រិក។ សង្គ្រាមប្រដាប់អាវុធ គ្រោះរាំងស្ងួត បានមកបន្ថែម ទំងន់លើវិបត្តិអសន្តិសុខស្បៀងអាហារ នៅតាមប្រទេសអាហ្វ្រិក ឲ្យកាន់តែធ្ងន់ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ