ដើម្បីបន្តរក្សាតំណែងជាអ្នកផលិតលោហៈកម្រទី១ ក្នុងលោក ចិនបានបង្កើតចេញនូវក្រុមហ៊ុនយក្សមួយ
ចុះផ្សាយនៅថ្ងៃ៖
ស្តាប់ - ០៤:០៥
នៅក្នុងប្រទេសចិន រដ្ឋាភិបាលទើបបានប្រសូត្រចេញនូវក្រុមហ៊ុនដ៏ធំមួយដើម្បីគ្រប់គ្រងលើផលិកម្មលោហៈកម្រ។ លោហៈកម្រនេះជារ៉ែម្យ៉ាងដែលពិភពលោកត្រូវការចាំបាច់ជារៀងរាល់ថ្ងៃនៅក្នុងការផលិតរថយន្តអគ្គិសនី ទូរស័ព្ទដៃ smartphones និងកញ្ចក់ទូរទស្សន៍ plasma។ តាមរយៈការបង្កើតឲ្យមានក្រុមហ៊ុនដ៏ធំដើម្បីគ្រប់គ្រងលើផលិកម្មលោហៈកម្រនេះ ចិននឹងអាចដាក់កម្រិតកូតាលើការផលិត ការនាំចេញ និងការប្រើលោហៈកម្រជាឧបករណ៍យុទ្ធសាស្រ្តនៅក្នុងសង្រ្គាមពាណិជ្ជកម្ម ពិសេសជាមួយអាមេរិក។
ដើម្បីរកឈ្មោះដាក់ឲ្យក្រុមហ៊ុនដ៏ធំមួយដែលទើបបង្កើតឡើង រដ្ឋាភិបាលចិនមិនបាច់ពិចារណានាំឲ្យឈឺក្បាលច្រើនដោយដាក់ឈ្មោះយ៉ាងសាមញ្ញបំផុតថា « China Rare Earth » ឬប្រែថា « លោហៈកម្រចិន »។ តាមពិតទៅ គេអាចនិយាយបានថា ក្រុមហ៊ុនលោហៈកម្រចិននេះមិនមែនជាក្រុមហ៊ុនថ្មីថ្មោងទេ តែជាក្រុមហ៊ុនមួយដែលបានមកពីការច្របាច់បញ្ជូលគ្នារវាងក្រុមហ៊ុនចំនួន ៣។ ខុសពីកិច្ចការមួយចំនួនដែលចិនបានចាត់ទុកជារឿងសម្ងាត់ក្រោមហេតុផលសន្តិសុខជាតិ រឿងបង្កើតក្រុមហ៊ុនយក្សដើម្បីគ្រប់គ្រងលើផលិកម្មរ៉ែលោហៈកម្រមិនត្រូវបានចិនលាក់ទេ និងប្រហែលជាពិបាកលាក់ផង។ ពិបាកលាក់ ព្រោះជាផែនការមួយដែលត្រូវប្រមូលផ្តុំប្រភពរ៉ែលោហៈកម្រពីខេត្តធំៗចំនួន ៤ គឺជាំងស៊ី ចានដុង ស៊ីឈាន់ និងហ៊ូណាន់។
កម្មវត្ថុនៃការបង្កើតឲ្យមានក្រុមហ៊ុនធំតែមួយនេះឡើង គឺដើម្បីគ្រប់គ្រងឧស្សាហកម្មលោហៈកម្រជាង ១ភាគ៣ នៅក្នុងប្រទេស និងដែលនៅក្នុងនោះ មានជិត ៧០% ជាលោហៈកម្រប្រភេទធ្ងន់។ លោហៈកម្រប្រភេទធ្ងន់នេះមានច្រើននៅប៉ែកខាងត្បូងប្រទេស ដូចជា dysprosium ដែលគេយកទៅប្រើនៅក្នុងម៉ាស៊ីនប្រតិកម្មនុយក្លេអ៊ែរ ពិសេសនៅក្នុងវិស័យយោធា។ តែចំណោទនៅត្រង់ថា ការធ្វើអាជីកម្មលើរ៉ែលោហៈកម្រប្រភេទធ្ងន់ត្រូវចំណាយលុយច្រើន មានការលំបាកជាង និងអាចនាំឲ្យប៉ះពាល់ខ្លាំងដល់បរិស្ថាន។ ចំណែកលោហៈកម្រប្រភេទស្រាល ដូចជា praséodyme និង néodyme ត្រូវបានគេប្រើដើម្បីផលិតរថយន្តអគ្គិសនី ឬមួយក៏ដើម្បីផលិតកង្ហារយក្សម៉ាញ៉េទិក។
នៅពេលដែលគេនិយាយពីលោហៈកម្រ គ្រប់គ្នាប្រាកដជាគិតភ្លាមថាជាលោហៈដែលក្រមិនសូវមាន។ ការគិតនេះមិនសូវខុស ហើយក៏មិនសូវត្រូវប៉ុន្មានដែរ ព្រោះតាមពិតទៅនោះ លោហៈកម្រនេះមិនសូវជាក្រប៉ុន្មានទេ ហើយក៏មិនមានតែនៅក្នុងប្រទេសចិនឯណា។ គ្រាន់តែថា ចិនសម្បូរច្រើនជាងគេ ពិសេសលោហៈកម្រប្រភេទធ្ងន់។ សព្វថ្ងៃនេះ ចិនកំពុងប្រឈមនឹងគូប្រជែងបរទេស ពិសេសអាមេរិក។ ជាក់ស្តែងក្នុងឆ្នាំ ២០២១ អាមេរិកបានបង្កើនសមត្ថភាពផលិតលោហៈកម្រចំនួន ៣៦%។ ក្នុងឆ្នាំ ២០១៨ អាមេរិកបានជំរុញឲ្យមានឡើងវិញនូវផលិតកម្មលោហៈកម្រនៅអណ្តូងរ៉ែ Mountain Pass។ ក្រៅពីនៅអាមេរិក កំណើនផលិតកម្មលោហៈកម្រក៏មាននៅក្នុងប្រទេសផ្សេងទៀត ដូចជានៅប្រទេសភូមា និងប្រទេសម៉ាដាហ្កាស្កា។ បច្ចុប្បន្ននេះ ចំណែករបស់ចិននៅក្នុងផលិតកម្មលោហៈកម្រក្នុងលោកបានធ្លាក់ចុះនៅក្រោម ៦០%។
ដូច្នេះសម្រាប់ចិន មានតែការបង្កើតឲ្យមានក្រុមហ៊ុនយក្សមួយដើម្បីគ្រប់គ្រងលើផលិកម្មលោហៈកម្រទេទើបខ្លួនអាចរក្សាបាននូវអត្ថប្រយោជន៍យុទ្ធសាស្រ្ត និងការប្រកួតប្រជែងរបស់ខ្លួនបាន។ ចិនយល់មិនច្រឡំទេថាសព្វថ្ងៃនេះ គូប្រជែងរបស់ខ្លួន ពិសេសអាមេរិករង់ចាំតែឱកាសដើម្បីកាច់បំបាក់ និងទម្លាក់ខ្លួននៅសឹងគ្រប់វិស័យទាំងអស់។ តែជាមួយនឹងការច្របាច់ក្រុមហ៊ុន ៣ ចូលជាក្រុមហ៊ុនមួយពេលនេះ ចិនអាចនឹងមានទឹកមាត់ប្រៃ និងមានឥទ្ធិពលក្នុងការកំណត់កូតាលើផលិតកម្ម និងការនាំចូលលោហៈកម្រដោយមិនត្រូវការពឹងផ្អែកលើអ្នកដទៃ។ ទន្ទឹមគ្នានេះ ចិនក៏អាចបន្តប្រើលោហៈកម្រជាឧបករណ៍យុទ្ធសាស្រ្តនៅក្នុងសង្រ្គាមពាណិជ្ជកម្មដូចដែលខ្លួនកំពុងបន្តត ទល់នឹងអាមេរិកសព្វថ្ងៃ។ តែស្របពេលគ្នា យុទ្ធវិធីរបស់ចិនក៏រួមចំណែកធ្វើឲ្យតម្លៃលោហៈកម្រឡើងថ្លៃបន្ថែមទៀតដែរ ខណៈដែលតម្លៃរបស់វាបានហក់ឡើង ៨៨% កាលពីឆ្នាំ ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ