ហេតុអ្វីទណ្ឌកម្មដ៏តឹងរ៉ឹងបំផុតលើរុស្ស៊ីគឺជាជម្រើសពិបាកបំផុតសម្រាប់អឺរ៉ុប?
ចុះផ្សាយនៅថ្ងៃ៖
ស្តាប់ - ០៣:២០
រដ្ឋាភិបាលរុស្ស៊ីពឹងផ្អែកយ៉ាងខ្លាំងលើថវិកាបានពីការលក់ប្រេង និងឧស្ម័នទៅអឺរ៉ុប។ ដូច្នេះ ប្រសិនបើអឺរ៉ុបដាក់ទណ្ឌកម្មណាមួយដោយបញ្ឈប់ ឬកាត់បន្ថយការនាំចូលប្រេង និងឧស្ម័នពីរុស្ស៊ី នោះសេដ្ឋកិច្ចរុស្ស៊ីនឹងរងផលប៉ះពាល់ខ្លាំង និងភ្លាមៗ។ ក៏ប៉ុន្តែ ក្នុងពេលជាមួយគ្នា វិបត្តិថាមពលក៏នឹងបង្កផលប៉ះពាល់ធ្ងន់ធ្ងរដល់សេដ្ឋកិច្ចអឺរ៉ុបផងដែរ។
ការដាក់ទណ្ឌកម្មដែលសហរដ្ឋអាមេរិក និងសហភាពអឺរ៉ុបបានប្រកាសប្រឆាំងនឹងរុស្ស៊ី សម្រាប់ការឈ្លានពានអ៊ុយក្រែន រួមមាន ការដកចេញរដ្ឋាភិបាលរុស្ស៊ី និងធនាគារចេញពីទីផ្សារហិរញ្ញវត្ថុពិភពលោក ការរឹតបន្តឹងការនាំចេញបច្ចេកវិទ្យា និងការបង្កកទ្រព្យសម្បត្តិរបស់មន្រ្ដីមានអំណាចរុស្ស៊ី។ ក្រៅពីវិស័យទាំងនេះ បញ្ហាសំខាន់មួយផ្សេងទៀតដែលអាចធ្វើឱ្យរុស្ស៊ីរងផលប៉ះពាល់បំផុត គឺការការដាក់ទណ្ឌកម្មលើនាំចេញប្រេងឥន្ធនៈរបស់រុស្ស៊ី។
រឿងនេះគ្មានអ្វីគួរឱ្យភ្ញាក់ផ្អើលទេ។ ក្នុងរយៈពេលប៉ុន្មានឆ្នាំចុងក្រោយនេះ សហភាពអឺរ៉ុបបាននាំចូលឧស្ម័នជិត៤០ភាគរយ និងតំណាងច្រើនជាងមួយភាគបួននៃប្រេងឥន្ធនៈរបស់ខ្លួនពីប្រទេសរុស្ស៊ី។ ឧស្ម័ន គឺជាប្រភពថាមពល សម្រាប់កំដៅផ្ទះនៅអឺរ៉ុប ហើយវាក៏ផ្តល់ថាមពលដល់រោងចក្រអឺរ៉ុប និងសម្រាប់ការប្រើប្រាស់រថយន្តរបស់អឺរ៉ុប។ ក្នុងពេលជាមួយគ្នា រុស្ស៊ីក៏ទទួលបានប្រាក់ដ៏ច្រើនសន្ធឹកសន្ធាប់ទៅក្នុងសេដ្ឋកិច្ចរបស់ខ្លួនផងដែរ។
ការបាត់បង់ប្រាក់ចំណូលទាំងនោះបង្កផលលំបាកខ្លាំងណាស់ដល់រុស្ស៊ី ដែលពឹងផ្អែកខ្លាំងលើការនាំចេញថាមពល សម្រាប់ដំណើរការរដ្ឋាភិបាល និងគាំទ្រសេដ្ឋកិច្ចរបស់ខ្លួន។ ការនាំចេញប្រេង និងឧស្ម័នផ្តល់ចំណូលច្រើនជាងមួយភាគបីនៃថវិកាជាតិសរុប។ ប៉ុន្តែ ការកាត់ផ្តាច់ការនាំចូលប្រេង និងឧស្ម័នពីរុស្ស៊ីក៏នឹងប៉ះពាល់ដល់អឺរ៉ុបផងដែរ។
នៅក្រោយសង្គ្រាមលោកលើកទី២ ក្នុងពេលប្រឈមមុខគ្នានៃមហាអំណាច អ្នកវិភាគជាច្រើនជឿថា ទំនាក់ទំនងសេដ្ឋកិច្ចរវាងសហភាពសូវៀត និងបស្ចិមប្រទេសកាន់តែមានភាពស៊ីសង្វាក់គ្នា នោះវាទំនងជាមិនសូវមានជម្លោះកើតឡើងនោះទេ។ ពាណិជ្ជកម្ម និងផលប្រយោជន៍សេដ្ឋកិច្ចនៅទីបំផុតនឹងធ្វើឱ្យសម្ព័ន្ធមិត្តកើនឡើង។
ឥឡូវនេះ សហភាពអឺរ៉ុបគឺជាដៃគូពាណិជ្ជកម្មដ៏ធំបំផុតរបស់រុស្ស៊ី ដែលស្មើនឹង ៣៧ភាគរយនៃពាណិជ្ជកម្មសកលរបស់ខ្លួន ក្នុងឆ្នាំ២០២០។ វាស្មើប្រហែល ៧០ភាគរយនៃការនាំចេញឧស្ម័នរបស់រុស្ស៊ី និងពាក់កណ្តាលនៃការនាំចេញប្រេងទៅអឺរ៉ុប។
ការធ្វើពាណិជ្ជកម្ម និងការដាក់ទណ្ឌកម្មកាត់ផ្ដាច់ពាណិជ្ជកម្ម គឺផ្តល់ផលប្រយោជន៍ទៅវិញទៅមក ក៏ដូចជាផ្ដល់ផលប៉ះពាល់ទៅវិញទៅមកផងដែរ។
ក្នុងពេលនេះ មេដឹកនាំអឺរ៉ុបត្រូវប្រឈមនឹងជម្រើសដាក់ទណ្ឌកម្មលើរុស្ស៊ី និងការពារសេដ្ឋកិច្ចរបស់ខ្លួន។
លោក Mathieu Savary ប្រធានស្ថាប័នយុទ្ធសាស្រ្តវិនិយោគអឺរ៉ុប បានលើកឡើងថា រហូតមកដល់ពេលនេះ ការសម្រេចចិត្តរបស់ប្រទេសអាល្លឺម៉ង់ កាលពីថ្ងៃអង្គារ ក្នុងការបញ្ឈប់បំពង់បង្ហូរឧស្ម័ន Nord Stream 2 តភ្ជាប់ដោយផ្ទាល់ពីប្រទេសរុស្ស៊ី និងភាគឦសានប្រទេសអាល្លឺម៉ង់ គឺជាផលវិបាកបំផុតសម្រាប់អាល្លឺម៉ង់។
ជាក់ស្ដែង មេដឹកនាំលោកខាងលិចមានការស្ទាក់ស្ទើរយ៉ាងខ្លាំង ក្នុងការកាត់បន្ថយវាបន្ថែមទៀត ដោយសារតែក្នុងអំឡុងពេលបីខែចុងក្រោយនៃឆ្នាំ២០២១ ប្រទេសរុស្ស៊ីបានកាត់បន្ថយការនាំចេញបំពង់ឧស្ម័នរបស់ខ្លួន ជិត២៥ភាគរយបើធៀបនឹងឆ្នាំមុន។ ទុនបម្រុងឧស្ម័នរបស់អឺរ៉ុប មានត្រឹមតែ ៣០ភាគរយប៉ុណ្ណោះ ហើយប្រជាជនអឺរ៉ុបកំពុងបង់ថ្លៃថាមពល ក្នុងតម្លៃថ្លៃខ្លាំងរួចទៅហើយ។ តម្លៃប្រេង និងឧស្ម័នធម្មជាតិកំពុងកើនឡើងខ្លាំង នាពេលបច្ចុប្បន្ន។
អាល្លឺម៉ង់ គឺជាដៃគូពាណិជ្ជកម្មដ៏ធំបំផុតរបស់រុស្ស៊ីនៅអឺរ៉ុប និងនាំចូល៥៥ភាគរយនៃការផ្គត់ផ្គង់ឧស្ម័នរបស់ខ្លួនពីរុស្ស៊ី។ អ៊ីតាលី គឺជាដៃគូពាណិជ្ជកម្មធំជាងគេទីពីរ និងនាំចូល៤១ភាគរយ។ នៅក្នុងវេទិកាមួយ ក្នុងទីក្រុង Milan កាលពីសប្តាហ៍មុន ឯកអគ្គរដ្ឋទូតរុស្ស៊ី លោក Sergey Razov បាននិយាយថា លោកប្រធានាធិបតី Vladimir V. Putin បានប្រាប់នាយករដ្ឋមន្ត្រីអ៊ីតាលី លោក Mario Draghi ថា "ប្រសិនបើប្រទេសអ៊ីតាលីត្រូវការឧស្ម័នបន្ថែមទៀត យើងត្រៀមខ្លួនជាស្រេចដើម្បីផ្គត់ផ្គង់វាទៅអ៊ីតាលី"។ អូទ្រីស តួកគី និងបារាំង គឺជាអ្នកប្រើប្រាស់ឧស្ម័នធម្មជាតិដ៏ធំរបស់រុស្ស៊ីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ