អ្នកជំនាញយោធាបារាំង៖ ពូទីនសំឡុតប្រើអាវុធនុយក្លេអ៊ែរ ព្រោះប្រតិបត្តិការអ៊ុយក្រែនមិនរហ័ស និងមិនជោគជ័យ ដូចការរំពឹងទុក
កាលពីថ្ងៃអាទិត្យ ទី២៧កុម្ភៈ លោកពូទីន បានប្រកាស ប្រាប់ឲ្យមេបញ្ជាការកងទ័ពរុស្ស៊ីទាំងអស់ ត្រៀមប្រុងប្រៀប ក្នុងករណីត្រូវប្រើអាវុធនុយក្លេអ៊ែរ។ ជាការប្រកាស ដែលបានធ្វើឲ្យអ៊ុយក្រែន ក៏ដូចជាពិភពលោកទាំងមូល មានការព្រួយបារម្ភបំផុត។ តើមានហេតុផលអ្វី មកពន្យល់លើការបោះជំហាន សំឡុតប្រើអាវុធនុយក្លេអ៊ែរ របស់លោកប្រធានាធិបតីរុស្ស៊ីនាពេលនេះ?
ចុះផ្សាយនៅថ្ងៃ៖
យោងតាមឧត្តមសេនីយ៍ Vincent Desportes អតីតនាយកសាលាសង្រ្គាម និងជាសាស្ត្រាចារ្យនៅសាលាវិទ្យានយោបាយបារាំង ហេតុផលគឺថា ប្រតិបត្តិការវាយឈ្លានពានអ៊ុយក្រែន របស់កងទ័ពរុស្ស៊ី មិនបានដំណើរការទៅ ដោយលឿនរហ័ស និងបានជោគជ័យ ដូចអ្វីដែលលោកពូទីន បានរំពឹងទុកនោះទេ។
តទៅនេះ សូមស្តាប់ ប្រសាសន៍របស់ឧត្តមសេនីយ៍ ដេរព័រត៍ ដែលបានផ្តល់បទសម្ភាសន៍ ឲ្យវិទ្យុបារាំងអន្តរជាតិ RFI កាលពីល្ងាចថ្ងៃអាទិត្យ ទី២៧ កុម្ភៈ ៖
ប្រសាសន៍លោកមេបញ្ជាការ Vincent Desportes
« អ្វីដែលពូទីនរំពឹងសង្ឃឹម គឺវាយយករដ្ឋធានីកៀវ ឲ្យបានកាលពីថ្ងៃសុក្រ តែអ្វីដែលយើងឃើញ គឺថាវាមិនទាន់បានសម្រេចទេ ។ បន្ថែមពីនេះទៀត ទីក្រុងខារគីវ ដែលកងទ័ពរុស្ស៊ីបានសម្រុកវាយដណ្តើមនោះ ឥឡូវពេលនេះ កងទ័ពអ៊ុយក្រែន បានវាយដណ្តើមយកមកគ្រប់គ្រងបានវិញទាំងស្រុងហើយ។ ទីក្រុងកៀវ ក៏ចូលមិនទាន់ចុះ ព្រលានយន្តហោះដែលចាំបាច់ដើម្បីបើកប្រតិបត្តិការដណ្តើមក្រុងកៀវ ក៏វាយយកមិនបាន។
ដូច្នេះយើងឃើញថា អ្វីដែលពូទីនបានភ្នាល់ គឺកំពុងតែចាញ់ហើយ។ ក៏ប៉ុន្តែ ពូទីនមិនអាចចាញ់សង្គ្រាមនេះបានទេ បើចាញ់នោះពូទីននឹងបាត់បង់អំណាច។ ដូចយើងដឹងច្បាស់ហើយ ពូទីនធ្វើគ្រប់យ៉ាងដើម្បីការពារអំណាចគាត់។
អញ្ចឹងហើយ បានជាពូទីន ប្រើយុទ្ធសាស្ត្រ គំរាមសំឡុតកាន់តែខ្លាំងនាពេលនេះ ដើម្បីរុញ បង្ខំសត្រូវម្ខាងទៀត ឲ្យយល់ព្រមចរចា។ ការសំឡុតរបស់ពូទីននេះ គឺដើម្បីរុញឲ្យមានច្រកចេញតាមផ្លូវការទូត មិនអញ្ចឹងទេ សង្គ្រាមនឹងឈានរហូតដល់ ការប្រើអាវុធប្រល័យលោក។ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ