សង្គ្រាមអ៊ុយក្រែនជាវិញ្ញាសាសាកល្បងជំហររបស់ហ្វាំងឡង់ចំពោះរុស្ស៊ី
ចុះផ្សាយនៅថ្ងៃ៖
ស្តាប់ - ០៥:០៧
ជាច្រើនទសវត្សរ៍មកហើយ ហ្វាំងឡង់ប្រកាន់ភ្ជាប់គោលការណ៍អព្យាក្រឹតយ៉ាងប្រុងប្រយ័ត្នដើម្បីជៀសវាងការប្រឈមមុខជាមួយរុស្ស៊ីដែលជាប្រទេសក្បែរខាង។ ប៉ុន្តែនាខណៈពេលនេះ សង្គ្រាមអ៊ុយក្រែនកំពុងតែផ្លាស់ប្តូរផ្នត់គំនិតសាធារណជនហ្វាំងឡង់ ហើយការចូលជាសមាជិកអង្គការអូតង់កំពុងកាន់តែក្លាយជាលទ្ធភាពជាក់ស្តែងមួយសម្រាប់ប្រទេសអឺរ៉ុបខាងជើងមួយនេះ។តើសង្គ្រាមអ៊ុយក្រែនអាចនឹងធ្វើឲ្យហ្វាំងឡង់លែងប្រកាន់យកគោលការណ៍អព្យាក្រឹតឬយ៉ាងណា?
កាលពី ២០ឆ្នាំមុន ការចូលជាសមាជិកបក្សសម្ព័ន្ធអូតង់មិនមែនជារឿងដែលគេនឹកដល់សោះឡើយនៅក្នុងប្រទេសហ្វាំងឡង់។ ប៉ុន្តែ ប្រតិបត្តិការសឹករបស់រុស្ស៊ីទៅលើអ៊ុយក្រែនកំពុងធ្វើឲ្យមានការផ្លាស់ប្តូរជាប្រវត្តិសាស្ត្រក្នុងចំណោមមតិសាធារណជនហ្វាំងឡង់។
ការស្ទង់មតិមួយដែលចេញផ្សាយនៅថ្ងៃទី២៨ ខែកុម្ភៈរកឃើញជាលើកដំបូងថាប្រជាពលរដ្ឋហ្វាំងឡង់ភាគច្រើនចំនួនស្មើនឹង ៥៣% គាំទ្រឲ្យប្រទេសរបស់ពួកគេចូលជាសមាជិកអូតង់។ តួលេខនេះកើនឡើង ២៥%ចាប់តាំងពីរុស្ស៊ីផ្តើមធ្វើសង្គ្រាមឈ្លានពានអ៊ុយក្រែនមក។
នៅតែប៉ុណ្ណោះ សំឡេងគាំទ្រឲ្យហ្វាំងឡង់ចូលជាសមាជិកអង្គការអូតង់បានកើនឡើងទៀតទៅដល់ ៦២% នៅក្នុងការបោះឆ្នោតស្ទង់មតិជាលើកពីរកាលពីថ្ងៃទី១៤មីនា ឆ្នាំ២០២២។ ក្រោយផ្ទុះសង្គ្រាមនៅអ៊ុយក្រែន ការព្រួយបារម្ភផ្នែកសន្តិសុខដែលកាន់តែរីកធំឡើងបានជំរុញឲ្យអ្នកនយោបាយហ្វាំងឡង់ពិចារណាលើការផ្លាស់ប្តូរគោលនយោបាយយ៉ាងខ្លាំងចេញពីអព្យាក្រឹតភាពដែលជាគោលកាណ៍ប្រពៃណីរបស់ប្រទេស។
នាយករដ្ឋមន្ត្រីហ្វាំងឡង់អ្នកស្រីសានណា ម៉ារីន (Sanna Marin) បានប្រកាសកាលពីថ្ងៃទី២៨កុម្ភៈថា ហ្វាំងឡង់នឹងផ្គត់ផ្គង់អាវុធដល់អ៊ុយក្រែនដើម្បីប្រយុទ្ធប្រឆាំងនឹងកងទ័ពរុស្ស៊ី។ នេះគឺជារឿងដែលប្រទេសក្បែរខាងរុស្ស៊ីមួយនេះមិនធ្លាប់ធ្វើពីមុនមកសោះឡើយ។
តែទន្ទឹមនេះ ប្រធានាធិបតីហ្វាំងឡង់លោក Sauli Niinistö ក៏បានអំពាវនាវដែរឲ្យពលរដ្ឋខ្លួនកុំសម្រេចចិត្តលឿនពេកនិងត្រូវគិតគូរពិចារណាឲ្យបានគ្រប់ជ្រុងជ្រោយនៅពេលត្រូវសម្រេចចិត្តអំពីសមាជិកភាពរបស់ហ្វាំងឡ់ងក្នុងអង្គការអូតង់។
សម្រាប់ពលរដ្ឋហ្វាំងឡ់ងទាំង ៥លាន ៥សែននាក់ នេះមានន័យថាកុំជ្រួលច្របល់ខ្លាំងពេកក្នុងការចូលបក្សសម្ព័ន្ធអូតង់នៅចំពោះមុខការគំរាមកំហែងកាន់តែខ្លាំងឡើងពីសំណាក់រុស្ស៊ី។
គួរជ្រាបថា មិនខុសគ្នាពីប្រទេសស៊ុយអែតឡើយ ហ្វាំងឡង់រងការព្រមានជាញឹកញយពីសំណាក់ទីក្រុងមូស្គូ។ អ្នកស្រី Chiara Ruffa សាស្ត្រាចារ្យជំនាញផ្នែកសិក្សាពីបញ្ហាសង្គ្រាមនៅសាកលវិទ្យាល័យការពារជាតិស៊ុយអែតនិយាយថា នៅដើមខែមីនានេះមានយន្តហោះចម្បាំងរុស្ស៊ីចំនួន ៤គ្រឿងបានហោះរំលោភចូលដែនអាកាសស៊ុយអែត នៅខណៈដែលយោធាស៊ុតអែតនិងហ្វាំងឡ់ងកំពុងធ្វើសមយុទ្ធនៅឯសមុទ្រប៉ាល់ទិក (Gotland)។
គេមិនគិតនោះទេថា ទីក្រុងមូស្គូនឹងបើកការវាយប្រហារក្នុងពេលឆាប់ៗនេះទៅលើស៊ុយអែតឬហ្វាំងឡង់ ប៉ុន្តែវាជាទឡ្ហីករណ៍ ទាញឲ្យទាំងស៊ុយអែត និងហ្វាំងឡង់ចាំបាច់ត្រូវប្រុងប្រៀបខ្លួនប្រឈមមុខនឹងសង្គ្រាមដែលអាចកើតឡើងជាយថាហេតុ។
ប្រឈមនឹងការគំរាមកំហែងពីរុស្ស៊ីនេះ ប្រទេសហ្វាំងឡង់បាននឹងកំពុងធ្វើទំនើកម្មវិស័យការពារជាតិនិងរំកិលខ្លួនខិតចូលកាន់តែជិតអង្គការអូតង់ ទោះបីមិនមែនជាសមាជិកបក្សសម្ព័ន្ធនេះក៏ដោយ។
នៅក្នុងឆ្នាំ ២០១៤ ហ្វាំងឡង់បានពង្រឹងទំនាក់ទំនងកាន់តែជិតស្និទ្ធជាមួយអូតង់ដោយបានចុះហត្ថលេខាលើសន្ធិសញ្ញា ទទួលជំនួយពីកងទ័ពអូតង់ក្នុងគ្រាមានអាសន្ន។ នៅក្នុងឆ្នាំ ២០២២នេះ អូតង់ក៏បានប្រកាសដែរថានឹងបញ្ចូលហ្វាំងឡង់ទៅក្នុងក្រុមដើម្បីទទួលបានការចែករំលែកព័ត៌មានក្នុងអំឡុងសង្គ្រាមនៅអ៊ុយក្រែន។
គួរបញ្ជាក់ថា ចាប់តាំងពីសហភាពសូវៀតដួលរលំក្នុងឆ្នាំ ១៩៩១មក ហ្វាំងឡង់បានរំកិលខ្លួនទៅមករកលោកខាងលិចនិងបានចូលជាសមាជិកសហភាពអឺរ៉ុបកាលពីឆ្នាំ ១៩៩៥ តែនៅបន្តប្រកាន់គោលការណ៍អព្យាក្រឹត និងមិនចូលជាសមាជិកអូតង់ឡើយដើម្បីរក្សាសន្តិភាព ក៏ដូចជាគេចផុតពីការឈ្លានពានរបស់រុស្ស៊ី។
ប៉ុន្តែដោយសារសង្គ្រាមនៅអ៊ុយក្រែន គោលការណ៍អព្យាក្រឹតនៅហ្វាំងឡង់អាចនឹងផ្លាស់ប្តូរដោយហេតុថាប្រទេសអឺរ៉ុបខាងជើងមួយនេះកំពុងតែពិចារណាពីលទ្ធភាពក្នុងការចូលជាសមាជិកបក្សសម្ព័ន្ធអូតង់។
សភាហ្វាំងឡង់នឹងបើកជំនួបនៅក្នុងខែមេសាខាងមុខដើម្បីពិភាក្សាគ្នាថាគួរចូលជាសមាជិករបស់អូតង់ដែរឬយ៉ាងណា? ដើម្បីទទួលបានការការពារផ្នែកយោធាពីសម្ព័ន្ធមិត្តអូតង់ក្នុងករណីរងការវាយប្រហារណាមួយ ក្រោមមាត្រាទី៥ នៃសន្ធិសញ្ញាអូតង់។
យ៉ាងណាក៏ដោយ មានសំណួរមួយសួរថាប្រសិនបើហ្វាំងឡង់ក្លាយជាសមាជិកពេញសិទ្ធិរបស់អូតង់មែននោះ តើនឹងមានរឿងអ្វីកើតឡើង? ព្រោះចូរកុំភ្លេចថា សព្វថ្ងៃនេះមានសហគមន៍អ្នកនិយាយភាសារុស្ស៊ីជាច្រើនរស់នៅក្នុងប្រទេសហ្វាំងឡង់។
ចុះបើរុស្ស៊ីខឹងក្តៅក្រហាយខ្លាំង! សាកស្រមៃគិតមើលថាបើរុស្ស៊ីយកលេសការពារសហគមន៍អ្នកនិយាយភាសារុស្ស៊ី ដើម្បីចូលវាយហ្វាំងឡង់។ ក្នុងករណីនេះ ហានិភ័យនៃការផ្ទុះសង្រ្គាមធំជាងសង្គ្រាមនៅអ៊ុយក្រែនបច្ចុប្បន្នមានច្រើនណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ