អង្គការសម្ព័ន្ធអាត្លង់ទិកបដិសេធមិនបង្កើតតំបន់ហាមឃាត់ហោះហើររបស់អ៊ុយក្រែន
អង្គការណាតូ ឬអូតង់ បានប្រកាសថ្កោលទោសរុស្ស៊ី ដែលបានវាយប្រហារលើមជ្ឈមណ្ឌលនុយក្លេអ៊ែរអ៊ុយក្រែន ហើយសន្យាដាក់ទណ្ឌកម្មថ្មីបន្ថែមលើរុស្ស៊ី ដើម្បីបិទបញ្ចប់សង្គ្រាម ប៉ុន្តែបក្សសម្ព័ន្ធអាត្លង់ទិក មិនបង្កើតតំបន់ហោះហើរហាមឃាត់ នៅអ៊ុយក្រែន និងតាមសំណើរបស់អ៊ុយក្រែនទេ។ អូតង់/ណាតូ សម្រេចដូច្នេះដើម្បីបញ្ចៀសកុំឱ្យមានសង្គ្រាមទូទៅនៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងជំនួបប្រជុំបន្ទាន់ថ្នាក់រដ្ឋមន្ត្រីការបរទេសអូតង់ លោកអគ្គលេខាធិការ យែន ស្តុលទែនប៊ែរ Jens Stoltenberg អង្គការណាតូ/អូតង់បានពន្យល់ថា សមាជិកអង្គការទាំងអស់បានបដិសេធមិនលូកដៃឱ្យជាប់ពាក់ព័ន្ធដោយផ្ទាល់ក្នុងសង្គ្រាមនៅអ៊ុយក្រែនទេ។
អូតង់/ណាតូ មិនស្វែងរកជម្លោះជាមួយនរណាទេ ជាសម្ព័ន្ធការពារសន្តិសុខ និងការពារដែនដី ទើបអង្គការមិនអាចផ្តល់ចម្លើយវិជ្ជមានទៅនឹងសំណើរបស់អ៊ុយក្រែនសុំបង្កើតតំបន់ហោះហើរហាមឃាត់នោះ។ បង្កើតតំបន់ហោះហើរហាមឃាត់ ជាវិធានការវាយប្រយុទ្ធ ដែលមានន័យស្មើនឹងចូលធ្វើសង្គ្រាម ដោយអង្គការត្រូវបញ្ជូនយន្តហោះចម្បាំងទៅធ្វើប្រតិបត្តិការការពារដែនអាកាសអ៊ុយក្រែន និងបាញ់ទម្លាក់យន្តហោះរុស្ស៊ី ដើម្បីបង្ខំរុស្ស៊ីឱ្យគោរពតំបន់ហោះហើរហាមឃាត់។ នេះជាការពន្យល់របស់លោកប្រមុខអង្គការអូតង់ ដោយគូសបញ្ជាក់ថែមទៀតថា អង្គការមានទំនួលខុសត្រូវធ្វើយ៉ាងណាបញ្ឈប់សង្គ្រាមរបស់រុស្ស៊ីនៅអ៊ុយក្រែនមិនឱ្យរាលដាល ព្រោះបើរាលដាលនោះគ្រោះថ្នាក់មានកាន់តែខ្លាំង មហន្តរាយកាន់តែអាក្រក់ មនុស្សរងទុក្ខកាន់តែច្រើន។
ការវាយប្រហារលើមជ្ឈមណ្ឌលនុយក្លេអ៊ែរ នៅភាគខាងត្បូងប្រទេសអ៊ុយក្រែនយប់មិញ ជាទង្វើគ្មានទំនួលខុសត្រូវមួយនៃសង្គ្រាមដែលចាំបាច់ត្រូវបិទបញ្ចប់ឱ្យបាន។ នេះជាពាក្យទទូចរបស់លោកយែន ស្តុលទែនប៊ែរ។
លោកយែន ស្តុលទែនប៊ែរ បានព្រមានថា ស្ថានភាពនៅអ៊ុយក្រែនកាន់តែអាក្រក់នៅថ្ងៃខាងមុខ ជនស៊ីវិលនឹងស្លាប់កាន់តែច្រើន ប្រទេសកាន់តែហិនហោច ព្រោះរុស្ស៊ីនឹងប្រើអាវុធធុនធ្ងន់កាន់កាន់តែច្រើន ដើម្បីឈ្នះ។ អង្គការបានពង្រឹងការការពារខ្លួនរួចជាច្រើនហើយ ដោយបានដាក់ពង្រាយជាលើកទីមួយកងកម្លាំងប្រតិកម្មរហ័ស ចំនួនរាប់ពាន់នាក់ នៅតាមព្រំដែនភាគខាងកើតរបស់អូតង់ ហើយកងកម្លាំងយន្តហោះចម្បាំង១៣០គ្រឿង ព្រមទាំងកងនាវាយោធាជាង២០០គ្រឿង ស្ថិតក្នុងស្ថានភាពប្រុងជើងការដែរ។
នេះជាវិធានការដំបូងដែលអង្គការអាចនឹងពង្រឹងបន្ថែមបើចាំបាច់។ លោកអគ្គលេខាធិការអង្គការអូតង់បានធានាថា អង្គការបានកោះជំនួបប្រជុំក្រុមរដ្ឋមន្ត្រីការពារជាតិ នៅថ្ងៃទី ១៦មីនា ដើម្បីសម្រេចចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ