ប៉ាគីស្ថាន៖តើស្ថានការណ៍នយោបាយមិនមែនកំពុងធ្វើដំណើរបកក្រោយទៅរកទ្រនំចាស់ទេ ឬយ៉ាងណា?
ចុះផ្សាយនៅថ្ងៃ៖
ស្តាប់ - ០៥:៥៥
នៅក្នុងប្រទេសប៉ាគីស្ថាន លោកស្ហេបា ស្ហារីហ្វត្រូវបានសភាបោះឆ្នោតជ្រើសតាំងជានាយករដ្ឋមន្រ្តីថ្មីនាថ្ងៃចន្ទ ទី១១ មេសា។ មានអាយុ ៧០ឆ្នាំ លោកស្ហេបា ស្ហារីហ្វចូលជំនួសកន្លែងលោកអ៊ីមរ៉ាន់ ខាន់ដែលត្រូវបានសភាបោះឆ្នោតដកសេចក្តីទុកចិត្តកាលពីថ្ងៃអាទិត្យ ទី១០ មេសា។ តើនាយករដ្ឋមន្រ្តីថ្មីលោកស្ហេបា ស្ហារីហ្វជានរណា?។ តើមានបញ្ហាប្រឈមអ្វីខ្លះដែលកំពុងរង់ចាំលោកស្ហេបា ស្ហារីហ្វ និងថា តើអ្វីដែលកំពុងកើតមាននៅប៉ាគីស្ថានពេលនេះមិនមែនជាការវិលទៅរកទ្រនំចាស់ទេ ឬយ៉ាងណា?។
ចប់ហើយសករាជនៃការដឹកនាំរបស់លោកអ៊ីមរ៉ាន់ ខាន់។ គឺជាការចប់ដោយល្វីងជូតចត់ជាទីបំផុត ព្រោះទី១ លោកត្រូវបានខ្ទាតពីតំណែងមុនអាណត្តិ និងទី២ លោកត្រូវបានខ្ទាតពីអំណាចតាមរយៈការបោះឆ្នោតដកសេចក្តីទុកចិត្តនៅសភា។ នេះជាព្រឹត្តិការណ៍ទី១ នៅក្នុងប្រវត្តិរបស់ប៉ាគីស្ថានដែលមានប្រជាជនចំនួន ២២០លាននាក់ និងជាប្រទេសមហានុយក្លេអ៊ែរមួយក្នុងលោក។ ចាប់ពីពេលនេះតទៅ ទំព័រសករាជថ្មីរបស់ប្រទេសអាស៊ីខាងត្បូងមួយនេះបានចាប់បើកជាមួយនាយករដ្ឋមន្រ្តីថ្មីលោកស្ហេបា ស្ហារីហ្វ។ មានអាយុ ៧០ឆ្នាំ លោកស្ហេបា ស្ហារីហ្វជាប្រធានគណបក្សសម្ព័ន្ធអ៊ីស្លាមប៉ាគីស្ថាន PML-N និងត្រូវជាប្អូនប្រុសបង្កើតរបស់លោកណាវ៉ា ស្ហារីហ្វ។
នៅក្នុងប្រទេសណាមិនដឹងទេ តែបើនៅប៉ាគីស្ថាន ប្រជាជនសឹងគ្រប់រូបបានស្គាល់លោកណាវ៉ា ស្ហារីហ្វច្បាស់ណាស់។ ស្គាល់ច្បាស់ ព្រោះលោកធ្លាប់បានកាន់តំណែងនាយករដ្ឋមន្រ្តីដល់ទៅ ៣ដង មុននឹងធ្លាក់ពីតំណែងក្នុងឆ្នាំ ២០១៧ដោយអំពើពុករលួយ និងទទួលទោសជាប់ក្នុងពន្ធនាគារ។ បន្ទាប់ពីបានដេកក្នុងគុកអស់រយៈពេល ២ឆ្នាំ លោកណាវ៉ា ស្ហារីហ្វទទួលបានការដោះលែងក្រោមហេតុផលសុខភាព និងកំពុងភៀសខ្លួនរស់នៅក្នុងប្រទេសអង់គ្លេសមកដល់សព្វថ្ងៃ។ ដូច្នេះគេអាចនិយាយបានថា ការឡើងកាន់តំណែងរបស់លោកស្ហេបា ស្ហារីហ្វដែលជាប្អូនប្រុសបង្កើតរបស់លោកណាវ៉ា ស្ហារីហ្វពេលនេះ គឺជាការវិលត្រឡប់វិញរបស់ត្រកូលគ្រួសារស្ហារីហ្វ។
មែនទែនទៅ លោកស្ហេបា ស្ហារីហ្វមានបទពិសោធន៍នយោបាយពេញខ្លួន ព្រោះមុននឹងជាប់ឆ្នោតជាតំណាងរាស្រ្ត និងឡើងអង្គុយកៅនាយករដ្ឋមន្រ្តីពេលនេះ លោកស្ហេបា ស្ហារីហ្វធ្លាប់បានអង្គុយកៅអីចៅហ្វាយខេត្តភេនយ៉ាបអស់រយៈពេលជាច្រើនឆ្នាំ។ តែមិនខុសពីបងប្រុសខ្លួនឯងទេ លោកស្ហេបា ស្ហារីហ្វក៏មានជំពាក់វាក់វិននឹងរឿងអាស្រូវពុករលួយដែរ។ ក្នុងខែធ្នូ ឆ្នាំ ២០១៩ អង្គភាពប្រឆាំងអំពើពុករលួយបានរឹបអូសទ្រព្យសម្បត្តិប្រមាណជា ២០កន្លែងរបស់លោកស្ហេបា ស្ហារីហ្វ និងកូនប្រុសដោយចោទពីបទលាងលុយកខ្វក់។ លោកស្ហេបា ស្ហារីហ្វត្រូវបានចាប់ខ្លួន និងដាក់គុកក្នុងខែកញ្ញា ឆ្នាំ ២០២០។ តែនៅ ២ខែក្រោយមក លោកទទួលបានការដោះលែងបណ្តោះអាសន្នដោយតម្កល់ប្រាក់ធានា។
តែខុសពីបងប្រុសដែលមានជំហរតឹងរឹង និងមានទំនាក់ទំនងតឹងតែងជាមួយគូប្រឆាំង ពិសេសជាមួយកងទ័ព លោកស្ហេបា ស្ហារីហ្វត្រូវបានគេចាត់ទុកជាអ្នកចរចាដែលទន់ភ្លន់ ចេះបត់បែន និងអាចសម្រុះសម្រួលសូម្បីជាមួយក្រុមសត្រូវ។ រហូតមកដល់ពេលនេះ លោកស្ហេបា ស្ហារីហ្វជាមេបក្សប្រឆាំងម្នាក់ដែលកងទ័ពអាចទទួលយកបាន។ គួរបញ្ជាក់ថានៅប៉ាគីស្ថាន កងទ័ពជាស្ថាប័នដ៏មានឥទ្ធិពល និងជាគន្លឹះនយោបាយផ្ទៃក្នុង។ តាំងពីទទួលបានឯករាជ្យក្នុងឆ្នាំ ១៩៤៧ ប៉ាគីស្ថានធ្លាប់បានស្ថិតក្រោមការកាន់កាប់របស់កងទ័ពអស់រយៈពេលជាង ៣ទសវត្សរ៍។
ក្រៅពីនោះ អំណាចត្រូវបានចែកគ្នាកាន់រវាងគណបក្សប្រពៃណីចំនួនពីរ គឺគណបក្សសម្ព័ន្ធអ៊ីស្លាមប៉ាគីស្ថាន PML-N របស់លោកស្ហេបា ស្ហារីហ្វ និងគណបក្សប្រជាជនប៉ាគីស្ថាន PPP របស់លោកប៊ីឡាវ៉ាល់ ប៊ុយតូ ហ្សារដារីដែលជាកូនប្រុសរបស់សពអតីតនាយករដ្ឋមន្រ្តីលោកស្រីបេណាហ្ស៊ៀរ ប៊ុយតូ។ គឺជាមួយគណបក្ស PPP និងគណបក្សផ្សេងដែលលោកស្ហេបា ស្ហារីហ្វបានចាប់ដៃដើម្បីទម្លាក់លោកអ៊ីមរ៉ាន់ ខាន់។ ឥឡូវនេះ យុទ្ធសាស្រ្តនយោបាយរបស់លោកស្ហេបា ស្ហារីហ្វទទួលបានជោគជ័យដូចក្តីបំណង។ តែចាប់ពីអំណេះត ទៅ មានសំណួរមួយបានចោទឡើង និងបញ្ហាប្រឈមជាច្រើនដែលនាយករដ្ឋមន្រ្តីថ្មីលោកស្ហេបា ស្ហារីហ្វត្រូវដោះស្រាយ។
គេត្រូវរង់ចាំមើលថា តើគណបក្សសម្ព័ន្ធអ៊ីស្លាមប៉ាគីស្ថានរបស់លោកស្ហេបា ស្ហារីហ្វ និងគណបក្សប្រជាជនប៉ាគីស្ថានរបស់លោកប៊ីឡាវ៉ាល់ ប៊ុយតូ ហ្សារដារីដែលធ្លាប់ស្ថិតក្នុងក្រុមប្រឆាំងដូចគ្នា និងធ្លាប់ជាគូប្រជែងដណ្តើមអំណាចគ្នានឹងអាចចូលរួមធ្វើការ និងដឹកនាំប្រទេសជាមួយគ្នាបានដែរ ឬទេ?។ ចំណែកបញ្ហាប្រឈមដែលកំពុងរង់ចាំលោកស្ហេបា ស្ហារីហ្វមាននៅក្នុងវិស័យសំខាន់ចំនួន ៣ គឺសេដ្ឋកិច្ច សន្តិសុខ និងទំនាក់ទំនងអន្តរជាតិ។ ទាក់ទងនឹងសេដ្ឋកិច្ច លោកស្ហេបា ស្ហារីហ្វត្រូវកាត់បន្ថយកម្រិតអតិផរណាដែលកំពុងមានក្នុងរង្វង់ ១២% ដោះស្រាយរឿងបំណុលដែលមានដល់ទៅ ១៣០ ០០០លានដុល្លារ និងស្រោចស្រង់តម្លៃប្រាក់រូពីដែលកំពុងធ្លាក់ថ្លៃខ្លាំងធៀបនឹងប្រាក់ដុល្លារអាមេរិក។
ទាក់ទងនឹងផ្នែកសន្តិសុខ លោកស្ហេបា ស្ហារីហ្វត្រូវពន្លឿនការចរចាសន្តិភាពជាមួយពួកតាលីបង់ប៉ាគីស្ថាន ព្រោះពួកនេះហាក់កំពុងឡើងចាងខ្លាំងតាំងពីការឡើងកាន់អំណាចរបស់ពួកតាលីបង់នៅអាហ្វហ្កានីស្ថាន។ នៅក្នុងទំនាក់ទំនងអន្តរជាតិ លោកស្ហេបា ស្ហារីហ្វត្រូវព្យាយាមស្រោចស្រង់ និងផ្សះផ្សាទំនាក់ទំនងជាមួយបស្ចិមលោក និយាយជារួម និងជាមួយអាមេរិក និយាយដោយឡែក។ តែក្នុងពេលជាមួយគ្នា លោកស្ហេបា ស្ហារីហ្វក៏មិនត្រូវភ្លេចខ្លួនពីគំនុំសងសឹកបកវិញរបស់លោកអ៊ីមរ៉ាន់ ខាន់ទេ។ មានអាយុ ៦៩ឆ្នាំ នាយករដ្ឋមន្រ្តីដែលទើបធ្លាក់ពីអំណាចក្តៅៗរូបនេះច្បាស់ជាមិនទុកឲ្យលោកស្ហេបា ស្ហារីហ្វសោយសុខឡើយ។ សម្រាប់លោកអ៊ីមរ៉ាន់ ខាន់ ការទម្លាក់លោកពេលនេះជាល្បិចកលរៀបចំដោយក្រុមប្រឆាំង និងមានការជួយជ្រោមជ្រែងពីបរទេស៕
មិនទាន់អីផង ក្រុមសកម្មជនរបស់លោកអ៊ីមរ៉ាន់ ខាន់បានចុះផ្លូវធ្វើបាតុកម្មតាមការអំពាវនាវរបស់លោក។ អ្វីដែលហាក់កំពុងលេចច្បាស់នៅពេលនេះ គឺអស្ថិរភាពនយោបាយដែលប៉ាគីស្ថានមិនអាចចៀសផុត។ នៅក្នុងករណីនេះ និងអ្នកដែលមានទឹកមាត់ប្រៃចុងក្រោយ គឺប្រហែលគ្មាននរណាក្រៅពីកងទ័ពទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ