ហេតុអ្វីបានជាអឺរ៉ុបកំពុងស្ថិតក្នុងភាពស្រពិចស្រពិល ក្រោយពី Gazprom បិទរ៉ូប៊ីណេឧស្ម័ននៅបំពង់បង្ហូរ Nord Stream 1?
ចុះផ្សាយនៅថ្ងៃ៖
ស្តាប់ - ០៥:២៦
ចាប់ពីថ្ងៃចន្ទ ទី១១ កក្កដា និងមានរយៈពេល ១០ថ្ងៃ ក្រុមហ៊ុនឧស្ម័នរុស្ស៊ី Gazprom បានបិទរ៉ូប៊ីណេឧស្ម័នដើម្បីផ្តើមការជួសជុលលើបំពង់បង្ហូរឧស្ម័ន Nord Stream 1។ ឧស្ម័នដែលបង្ហូរតាមបំពង់ Nord Stream 1 នេះមានភាគច្រើនលក់ទៅឲ្យប្រទេសអាល្លឺម៉ង់ និងបណ្តាប្រទេសអឺរ៉ុបខាងលិច។ ទន្ទឹមគ្នានេះ Gazprom ក៏បានប្រកាសពីការកាត់បន្ថយការបញ្ជូនឧស្ម័នទៅឲ្យប្រទេសអ៊ីតាលី និងប្រទេសអូទ្រីស។ តាមពិត ការជួសជុលបំពង់បង្ហូរឧស្ម័ន Nord Stream 1 បានគ្រោងទុកតាំងពីយូរ។ តែអឺរ៉ុបបារម្ភខ្លាចរុស្ស៊ីឆ្លៀតយកឱកាសជួសជុលបំពង់បង្ហូរឧស្ម័ន Nord Stream 1 ពេលនេះដើម្បីបញ្ឈប់ការបញ្ជូនឧស្ម័នទៅកាន់អឺរ៉ុបជារៀងរហូត។
អាចថាជារឿងចៃដន្យក៏ថាបាន មិនចៃដន្យក៏ថាបាន ព្រោះការជួសជុលបំពង់បង្ហូរឧស្ម័ន Nord Stream 1 របស់ក្រុមហ៊ុនឧស្ម័នរុស្ស៊ី Gazprom បានធ្វើឡើង ចំពេលដែលរុស្ស៊ីកំពុងបន្តសង្រ្គាមនៅអ៊ុយក្រែន និងចំពេលដែលអឺរ៉ុបកំពុងបន្តដាក់ទណ្ឌកម្មសេដ្ឋកិច្ចចាស់ដៃប្រឆាំងរុស្ស៊ីដោយសាររឿងសង្រ្គាមមួយនេះ។ ផ្ទាំងស៊ីបប្រឆាំងរុស្ស៊ីរបស់បស្ចិមលោក និយាយជារួម និងរបស់អឺរ៉ុប និយាយដោយឡែកមានច្រើន ពិសេសប្រេង និងឧស្ម័នរុស្ស៊ី។ អឺរ៉ុបយល់ថា ការធ្វើពហិកម្មមិនទិញប្រេង និងឧស្ម័នរុស្ស៊ីជាការកាត់ផ្តាច់ប្រភពចំណូលយ៉ាងសំខាន់របស់រុស្ស៊ីក្នុងការចាយវាយលើសង្រ្គាមនៅអ៊ុយក្រែន។
ការយល់របស់អឺរ៉ុបនេះមិនខុសទេ តែក្នុងពេលជាមួយគ្នា ទង្វើរបស់អឺរ៉ុបនេះក៏ជាការធ្វើអត្តឃាតខ្លួនឯងនៅក្នុងវិស័យថាមពលដែរ។ ចូរកុំភ្លេចថា នៅក្នុងចំណោមប្រទេសសមាជិកសហភាពអឺរ៉ុប ការពឹងលើប្រេង និងឧស្ម័នរុស្ស៊ីមានកម្រិតមិនដូចទេ មានន័យថា មានប្រទេសខ្លះបានពឹងខ្លាំង និងប្រទេសខ្លះទៀតបានពឹងតិច។ មួយវិញទៀត គឺឧស្ម័នធម្មជាតិដែលអឺរ៉ុបបានពឹងលើរុស្ស៊ីខ្លាំងជាងគេ ព្រោះនៅក្នុងបរិមាណឧស្ម័នធម្មជាតិដែលសហភាពអឺរ៉ុបបាននាំចូល មានជាង ៤៨% បានទិញពីរុស្ស៊ី។ អាល្លឺម៉ង់ជាប្រទេសអឺរ៉ុបដែលបានទិញឧស្ម័នធម្មជាតិរុស្ស៊ីច្រើនជាងគេ។
នៅមុនផ្ទុះសង្រ្គាមរុស្ស៊ីឈ្លានពានអ៊ុយក្រែន ឧស្ម័នធម្មជាតិដែលអាល្លឺម៉ង់នាំចូលមាន ៥៥% បានទិញពីរុស្ស៊ី។ តែសព្វថ្ងៃ និងដើម្បីបង្ហាញជំហរតែមួយជាមួយសហភាពអឺរ៉ុប ការទិញឧស្ម័នរុស្ស៊ីត្រូវបានអាល្លឺម៉ង់កាត់បន្ថយនៅត្រឹម ៣៥%។ ឧស្ម័នរុស្ស៊ីដែលអាល្លឺម៉ង់ទិញនេះត្រូវបានបង្ហូរតាមបំពង់ Nord Stream 1 ហើយគឺតាមរយៈបំពង់នេះដដែលដែលរុស្ស៊ីបានលក់ឧស្ម័នទៅឲ្យក្រុមប្រទេសអឺរ៉ុបប៉ែកខាងលិច។ កម្មវត្ថុរបស់សហភាពអឺរ៉ុប គឺកាត់បន្ថយការទិញឧស្ម័នរុស្ស៊ីបន្តិចម្តងៗរហូតដល់ឈប់ទិញទាំងស្រុងតែម្តង។
ចំណោតរបស់សហភាពអឺរ៉ុប គឺត្រូវរកឧស្ម័នពីប្រទេសផ្សេងដើម្បីជំនួសឲ្យឧស្ម័នរុស្ស៊ី ហើយចំណោតរបស់រុស្ស៊ី គឺត្រូវរកអតិថិជនផ្សេងជំនួសឲ្យអតិថិជនអឺរ៉ុប។ តែសួរថា រវាងអ្នករកទិញឧស្ម័នពីកន្លែងផ្សេង និងអ្នករកម៉ូយផ្សេងដើម្បីទិញឧស្ម័ន តើភាគីមួយណាពិបាកជាងមួយណា។ បើមើលមួយភ្លែតទៅ គឺពិបាកដូចគ្នា។ តែបើពិចារណាឲ្យយូរបន្តិច គឺអ្នករកទិញឧស្ម័នពីកន្លែងផ្សេងដែលអាចជួបការលំបាកជាងគេ។ នៅអឺរ៉ុប ឧស្ម័នជាប្រភពថាមពលដែលត្រូវបានប្រើច្រើននៅសឹងគ្រប់ផ្នែកតាំងពីនៅក្នុងរោងចក្រ សហគ្រាសធំតូចរហូតដល់នៅតាមផ្ទះសម្បែងរបស់ប្រជាជន។ ជាក់ស្តែងនៅអាល្លឺម៉ង់ ម៉ាស៊ីនកម្តៅជាង ៥០% នៅតាមផ្ទះរបស់ប្រជាជនអាល្លឺម៉ង់បានប្រើឧស្ម័ន។
មួយវិញទៀត ឧស្ម័នជាផលិតផលមួយដែលពិបាកក្នុងការដឹកជញ្ជូន។ ក្រៅពីបង្ហូរតាមបំពង់ គេអាចប្រែឧស្ម័នទៅជាវត្ថុរាវដើម្បីដឹកជញ្ជូនតាមកបាល់ ឬតាមឡានកាមីញ៉ុង។ តែដើម្បីអាចយកទៅប្រើប្រាស់បាន គេត្រូវបំប្លែងឧស្ម័នពង្រាវទៅជាឧស្ម័នធម្មតាឡើងវិញ។ នេះជានីតិវិធីមួយពិបាកដែលប្រទេសអឺរ៉ុបភាគច្រើនមិនអាចធ្វើបានភ្លាមៗ និងត្រូវការពេលវេលា រួមទាំងលុយកាក់ដើម្បីកសាងទីតាំងសម្រាប់ទទួល និងបំប្លែងឧស្ម័នពង្រាវដែលទិញពីប្រទេសផ្សេងក្រៅពីរុស្ស៊ី។ បញ្ហាប្រឈមនេះ រុស្ស៊ីបានដឹងច្បាស់ណាស់ និងមិនញញើតយកឧស្ម័នដើម្បីប្រើជាអាវុធយុទ្ធសាស្រ្តក្នុងការតប ត នឹងទណ្ឌកម្មរបស់អឺរ៉ុបទេ។
ពិតណាស់ ការដែលក្រុមហ៊ុនឧស្ម័នរុស្ស៊ី Gazprom បានព្យួរការបង្ហូរឧស្ម័នតាមបំពង់ Nord Stream 1 ទៅកាន់អាល្លឺម៉ង់ និងបណ្តាប្រទេសអឺរ៉ុបខាងលិចមួយចំនួនដើម្បីធ្វើការជួសជុលរយៈពេល ១០ថ្ងៃ គឺបានគ្រោងទុកតាំងពីយូរមកហើយ។ សម្រាប់ Gazprom វាជានីតិវិធីបច្ចេកទេសមួយធម្មតាដែលធ្លាប់បានធ្វើជាហូរហែរ។ តែសម្រាប់អឺរ៉ុប ពិសេសអាល្លឺម៉ង់កំពុងបារម្ភជាពន់ពេកដោយមិនដឹងថា តើ Gazprom នឹងបើករ៉ូប៊ីណេឧស្ម័នជាថ្មី ឬអត់ទេនៅក្រោយការជួសជុលរួចនាថ្ងៃទី២១ កក្កដា។ ទោះជាយ៉ាងនេះក្តី រដ្ឋាភិបាលអាល្លឺម៉ង់បានត្រៀមគ្រប់សេណារីយ៉ូទាំងអស់។ ឧបនាយករដ្ឋមន្រ្តីអាល្លឺម៉ង់បានបញ្ជាក់ដោយទទួលស្គាល់ថា អាល្លឺម៉ង់បានប្រឈមនឹងស្ថានការណ៍មិនធ្លាប់មាន និងថា ឬមួយរុស្ស៊ីបង្ហូរឧស្ម័នជាថ្មីឡើងវិញ ឬមួយក៏រុស្ស៊ីបិទរ៉ូប៊ីណេរហូត។
ចំណែកបារាំងវិញ រដ្ឋមន្រ្តីក្រសួងសេដ្ឋកិច្ចបានអំពាវនាវឲ្យអឺរ៉ុបរៀបចំជើងព្រួលឲ្យបានឆាប់រហ័សដើម្បីប្រឈមនឹងការផ្តាច់ឧស្ម័នទាំងស្រុងជាយថាហេតុពីរុស្ស៊ី។ គេនៅមិនទាន់ដឹងថា តើ Gazprom នឹងបើករ៉ូប៊ីណេឧស្ម័ននៅបំពង់ Nord Stream 1 ឡើងវិញ ឬអត់ទេ?។ តែក្នុងថ្ងៃប្រកាសបើកជួសជុលបំពង់នេះ Gazprom បានសម្រេចកាត់បន្ថយការបញ្ជូនឧស្ម័នទៅឲ្យប្រទេសអ៊ីតាលី និងអូទ្រីស។ ដូច្នេះ បើរុស្ស៊ីបន្តបិទរ៉ូប៊ីណេឧស្ម័ននៅបំពង់ Nord Stream 1 ទោះក្នុងហេតុផលអ្វីក៏ដោយ វានឹងធ្វើឲ្យវិបត្តិថាលពលនៅអឺរ៉ុបធ្លាក់ធ្ងន់ធ្ងរកាន់តែខ្លាំងជាមួយនឹងតម្លៃខ្ពស់ និងកង្វះថាមពលសម្រាប់រដូវត្រជាក់ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ