អាល្លឺម៉ង់ប្រកាសជួបវិបត្តិខ្វះហ្កាស នៅក្រោយរុស្ស៊ីកាត់បន្ថយការបង្ហូរឧស្ម័ន
អាល្លឺម៉ង់បានឈានចូលដំណាក់កាលទី២នៃកម្មវិធីថាមពលបន្ទាន់ នៅពេលរដ្ឋាភិបាលសម្រេចទាញសញ្ញាអាសន្នស្តីពីវិបត្តិខ្វះហ្កាស កាលពីថ្ងៃព្រហស្បតិ៍ម្សិលមិញ។ នៅក្នុងបទសម្ភាសន៍ដែលចុះផ្សាយដោយកាសែតអាល្លឺម៉ង់Spiegel នៅថ្ងៃសុក្រនេះ រដ្ឋមន្រ្តីក្រសួងសេដ្ឋកិច្ចលោកRobert Habeck បានព្រមានថា អាល្លឺម៉ង់អាចត្រូវប្រឈមនឹងកង្វះឧស្ម័ន បើសិនគ្មានប្រភពផ្គត់ផ្គង់ផ្សេងមកជំនួសឧស្ម័នរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៦
អាល្លឺម៉ង់ប្រទេសសេដ្ឋកិច្ចធំសំខាន់ជាងគេនៅអឺរ៉ុបបានប្រកាសវិបត្តិខ្វះឧស្ម័ន នៅពេលរុស្ស៊ីចាប់ផ្តើមបិទបណ្តើរៗបំពង់បង្ហូរឧស្ម័នចូលទឹកដីអឺរ៉ុប។ នៅថ្ងៃព្រហស្បតិ៍ រដ្ឋាភិបាលអាល្លឺម៉ង់ ប្រកាសអនុវត្តដំណាក់កាលទី២នៃកម្មវិធីថាមពលបន្ទាន់របស់ប្រទេស នោះគឺការទាញសញ្ញាអាសន្នដែលមានន័យថាអាល្លឺម៉ង់នឹងអាចប្រឈមនឹងវិបត្តិខ្វះឧស្ម័នក្នុងរយៈពេលវែង។ បើសិនស្ថានភាពនៅតែចុះអាក្រក់ អាល្លឺម៉ង់នឹងអនុវត្តដំណាក់កាលទី៣ចុងក្រោយគេ គឺការប្រកាសអាសន្ន។ នៅពេលនោះ រដ្ឋនឹងដាក់កម្រិតខ្លាំងក្នុងការប្រើប្រាស់ឧស្ម័ននៅទូទាំងប្រទេស ដើម្បីសន្សំសំចៃសម្រាប់ការប្រើប្រាស់ដែលចាំបាច់បំផុត នៅរដូវត្រជាក់ខាងមុខ ដូចជាសម្រាប់ម៉ាស៊ីនកំដៅនៅតាមផ្ទះប្រជាជន និងនៅតាមមន្ទីរពេទ្យ។ ចំណែក រោងចក្រឧស្សាហកម្ម និងក្រុមហ៊ុនវិញត្រូវប្រឈមនឹងការកាត់ផ្តាច់ឧស្ម័នមុនគេ។
តាមរដ្ឋមន្រ្តីសេដ្ឋកិច្ចអាល្លឺម៉ង់ លោកRobert Habeck អាល្លឺម៉ង់ត្រូវប្រឈមខ្វះឧស្ម័ន បើសិនការបង្ហូរលក់ឧស្ម័នរបស់រុស្ស៊ីមកអាល្លឺម៉ង់នៅតែមានកម្រិតទាបដូចសព្វថ្ងៃ។ រោងចក្រសហគ្រាសមួយចំនួនត្រូវបិទទ្វារ បើសិនចំនួនស្តុកឧស្ម័នមានមិនគ្រប់គ្រាន់សម្រាប់ការប្រើប្រាស់នៅរដូវត្រជាក់។
នៅក្នុងបទសម្ភាសន៍ជាមួយកាសែតអាល្លឺម៉ង់ Spiegel លោករដ្ឋមន្រ្តីRobert Habeck បានព្រមានពីវិបត្តិសេដ្ឋកិច្ចនៅអាល្លឺម៉ង់ ដោយសារតែវិបត្តិខ្វះឧស្ម័ន ព្រោះថា ដោយសារគ្មានឧស្ម័នគ្រប់គ្រាន់ ក្រុមហ៊ុន រោងចក្រអាចផ្អាកសកម្មភាពផលិត កាត់បន្ថយបុគ្គលិក ប្រព័ន្ធផ្គត់ផ្គង់ទំនិញត្រូវដួលរលំ ចំណែកប្រជាជនជំពាក់បំណុលគេកាន់តែច្រើន និងធ្លាក់ខ្លួនក្រីក្រ ដោយសារភ្លើង ហ្កាសឡើងថ្លៃ។
សម្រាប់រដ្ឋមន្រ្តីសេដ្ឋកិច្ចអាល្លឺម៉ង់ ស្ថានភាពអាក្រក់ខាងលើនេះត្រូវបានលោកប្រធានាធិបតីរុស្ស៊ី គន់គូរទុករួចហើយនៅក្នុងយុទ្ធសាស្រ្តរបស់លោកដែលចង់ឃើញអាល្លឺម៉ង់បែកបាក់។ ស្ថានភាពបែបនេះបង្កើតឱកាសល្អក្រៃ សម្រាប់ការរីករាលដាលនៃក្រុមប្រជានិយម។ គោលដៅគឺបំផ្លាញលទ្ធិប្រជាធិបតេយ្យសេរីនៅក្នុងប្រទេសអាល្លឺម៉ង់។
នៅក្នុងបរិបទនេះ រដ្ឋមន្រ្តីសេដ្ឋកិច្ចអាល្លឺម៉ង់បានលើកឡើងពីវិធានការថ្មីសម្រាប់ជួយទ្រទ្រង់ក្រុមហ៊ុន រោងចក្រ និងប្រជាជន ប៉ុន្តែ លោកទទួលស្គាល់ថា ជំនួយរបស់រដ្ឋនឹងមិនអាចជួយដោះស្រាយវិបត្តិទាំងស្រុងនោះទេ។
អាល្លឺម៉ង់ធ្លាប់បានចោទប្រកាន់រុស្ស៊ីថា បានយកឧស្ម័នធ្វើជាអាវុធគំរាមកំហែងអឺរ៉ុប។ នៅប៉ុន្មានសប្តាហ៍មកនេះក្រុមហ៊ុនហ្កាសរុស្ស៊ី បានឈប់បង្ហូរលក់ឧស្ម័នទៅឲ្យប្រទេសសមាជិកសហភាពអឺរ៉ុបចំនួន ១២ ដែលក្នុងនោះមានអាល្លឺម៉ង់ និងអ៊ីតាលី។ អ្នកនាំពាក្យរបស់ប្រធានាធិបតីរុស្ស៊ី បានលើកឡើងពីបញ្ហាបច្ចេកទេស ឬការបដិសេធរបស់អឺរ៉ុបដែលមិនព្រមប្រើលុយរូប្លដើម្បីបង់ថ្លៃទិញឧស្ម័នរុស្ស៊ី។
ទីភ្នាក់ងារគ្រប់គ្រងទីផ្សារឧស្ម័នអាល្លឺម៉ង់បានវាយតម្លៃនៅថ្ងៃសុក្រនេះថាប្រជាជននឹងប្រឈមនឹងការបង់ថ្លៃឧស្ម័នដែលអាចកើនឡើងទ្វេ ឬបីដងនាពេលខាងមុខ។
សព្វថ្ងៃ អាល្លឺម៉ង់ប្រមូលទិញស្តុកឧស្ម័នបានប្រមាណ ៥៨% និងគ្រោងទិញស្តុកឲ្យបានយ៉ាងតិច ៩០%នៅខែវិច្ឆិកាសម្រាប់ការប្រើប្រាស់នៅរដូវរងា។ ទីភ្នាក់ងារគ្រប់គ្រងទីផ្សារឧស្ម័នអាល្លឺម៉ង់ បានបង្ហាញសេណារីយ៉ូបី។ ទី១គឺអាល្លឺម៉ង់អាចចាប់ខ្វះឧស្ម័ននៅចុងរដូវត្រជាក់។ ទី២ អាល្លឺម៉ង់អាចចាប់ផ្តើមខ្វះឧស្ម័ននៅខែតុលា និងទី៣គឺអាល្លឺម៉ង់លែងមានឧស្ម័នក្នុងអំឡុងពេលរដូវរងាតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ