តើមានសម្មតិកម្មអ្វីខ្លះស្តីពីឃាតកម្មសម្លាប់ជនជាតិគួដឌីស្ថានចំនួន ៣នាក់ក្នុងប្រទេសបារាំង?
ចុះផ្សាយនៅថ្ងៃ៖
ស្តាប់ - ០៥:៤០
នៅក្នុងប្រទេសបារាំង សហគមន៍គួដឌីស្ថានកំពុងបន្តបញ្ចេញកំហឹងប្រឆាំងនឹងរដ្ឋាភិបាលបារាំងដោយបានរៀបចំដង្ហែរក្បួនក្នុងក្រុងប៉ារីសនាថ្ងៃចន្ទ ទី២៦ ធ្នូ។ កំហឹងនេះបានកើតមានឡើងក្រោយពីមានខ្មាន់កាំភ្លើងជនជាតិបារាំងម្នាក់បានបាញ់សម្លាប់ពលរដ្ឋគួដឌីស្ថានចំនួន ៣នាក់ក្នុងក្រុងប៉ារីសកាលពីថ្ងៃសុក្រ ទី២៣ ធ្នូ។ ខ្មាន់កាំភ្លើងមានអាយុ ៦៩ឆ្នាំបានឆ្លើយសារភាពថា ខ្លួនមានគំនិតប្រកាន់ពូជសាសន៍ ស្អប់ជនបរទេស និងចង់សម្លាប់ជនភៀសខ្លួន។ តែសំណួរដែលកំពុងចោទនៅត្រង់ថា ហេតុអ្វីបានជាជនជាតិគួដឌីស្ថានបានក្លាយជាផ្ទាំងស៊ីប និងថា តើអាចមានសម្មតិកម្មអ្វីខ្លះនៅពីក្រោយឃាតកម្មសម្លាប់ជនជាតិគួដឌីស្ថានលើទឹកដីបារាំងពេលនេះ?
៣ថ្ងៃក្រោយការបាញ់សម្លាប់ពលរដ្ឋគួដឌីស្ថានចំនួន ៣នាក់នៅកណ្តាលក្រុងប៉ារីសមក ការស៊ើបអង្កេតស្វែងរកការពិតបាន និងកំពុងបន្តធ្វើយ៉ាងសកម្ម។ ចំណែកខ្មាន់កាំភ្លើងជាបុរសជនជាតិបារាំងអាយុ ៦៩ឆ្នាំក៏បានឆ្លើយសារភាពដោយទទួលស្គាល់ពីការប្រកាន់ពូជសាសន៍ ស្អប់ជនបរទេស និងចង់សម្លាប់ជនភៀសខ្លួន។ តែជនដៃដល់រូបនេះមិនបានបញ្ជាក់ទេថា ហេតុអ្វីបានជារូបគេបែរជាជ្រើសយកពលរដ្ឋគួដឌីស្ថានធ្វើជាផ្ទាំងស៊ីបទៅវិញ។ មែនទែនទៅ មិនថានៅក្នុងប្រទេសបារាំង ឬនៅក្នុងប្រទេសអឺរ៉ុបខ្លះទេ គំនិតប្រកាន់ពូជសាសន៍ គំនិតស្អប់ខ្ពើមជនបរទេស ពិសេសជនអន្តោប្រវេសន៍ និងជនភៀសខ្លួនតែងមាននៅក្នុងផ្នត់គំនិតរបស់ក្រុមជាតិនិយម និងក្រុមជ្រុលនិយម។
នៅត្រង់ចំណុចនេះ សហគមន៍គួដឌីស្ថានដែលមានវត្តមានក្នុងទឹកដីបារាំងតាំងពីច្រើនទសវត្សរ៍បានយល់ច្បាស់ណាស់។ តែអ្វីដែលពួកគេហាក់ពិបាកយល់ និងពិបាកទទួលយកនៅត្រង់ថា ហេតុអ្វីបានពួកគេបានក្លាយជាផ្ទាំងស៊ីបនៅពេលនេះទៅវិញ។ ពិតណាស់ សហគមន៍គួដឌីស្ថានមិនបានទាត់ចោលសម្មតិកម្មណាមួយទេទាក់ទងនឹងការបាញ់សម្លាប់គ្នីគ្នាចំនួន ៣នាក់កាលពី ៣ថ្ងៃមុន ក្នុងនោះ ក៏មានសម្មតិកម្មស្តីពីការប្រកាន់ពូជសាសន៍មួយដែរ។ តែបញ្ហានៅត្រង់ថា តាំងពីមានវត្តមានក្នុងប្រទេសបារាំងជិត ៤០ឆ្នាំកន្លងទៅ សហគមន៍គួដឌីស្ថានមិនដែលបានចាត់ទុកការប្រកាន់ពូជសាសន៍ជាការគំរាមកំហែងមួយចំពោះខ្លួនឡើយ។
ផ្ទុយទៅវិញ បើការសម្លាប់ជនជាតិគួដឌីស្ថានលើទឹកដីបារាំងពេលនេះជាហេតុផលប្រកាន់ពូជសាសន៍មែន នេះពិតជាលើកទី១ ដែលជនជាតិគ្មានរដ្ឋ និងគ្មានទឹកដីមួយនេះបានជួបប្រទះ។ យ៉ាងណាក៏ដោយចុះ គេគួរទុកឲ្យក្រុមអ្នកស៊ើបអង្កេតបារាំងបន្តស្វែងរកការពិតជាបន្តទៀត។ តែក្នុងពេលជាមួយគ្នា មានសម្មតិកម្មមួយផ្សេងទៀតត្រូវបានលើកឡើង និងដែលសហគមន៍គួដឌីស្ថានខ្លួនឯងហាក់បានចាត់ទុកជាសម្មតិកម្មដែលគួរឲ្យជឿជាក់ជាង។ សម្មតិកម្មនោះ គឺប្រទេសតួគគីជាអ្នកនៅពីក្រោយការបាញ់សម្លាប់ជនជាតិគួដឌីស្ថានចំនួន ៣នាក់ក្នុងក្រុងប៉ារីសកាលពី ៣ថ្ងៃមុន។ ការលេចចេញនូវសម្មតិកម្មមួយនេះក៏ដោយសារថា តួកគីកំពុងបន្តធ្វើសង្រ្គាមប្រឆាំងនឹងគណបក្សពលករគួដឌីស្ថានហៅកាត់ PKK ដែលមានវត្តមានក្នុងទឹកដីតួកគី និងកំពុងបន្តទាមទារឯករាជ្យផ្តាច់ចេញពីតួកគី។ គួររម្លឹកថា PKK ត្រូវបានតួកគី និងប្រទេសលោកខាងលិចមួយចំនួនចាត់ទុកជាចលនាភេរវនិយម។
អស់រយៈពេលជាច្រើនទសវត្សរ៍ដែលតួកគីបានធ្វើសង្រ្គាមតាមកំចាត់ពលរដ្ឋគួដឌីស្ថានដោយមិនរើសមុខនៅទូទាំងតំបន់មជ្ឈិមបូព៌ា ពិសេសពលរដ្ឋគួដឌីស្ថានដែលរស់នៅលើទឹកដីស៊ីរីប៉ែកខាងជើង។ កម្មវត្ថុរបស់ទីក្រុងអង់ការ៉ាមានតែមួយគត់ គឺបញ្ចុះឥទ្ធិពលដើម្បីឈានទៅកាច់បំបាក់ធ្មុងពួក PKK នៅលើទឹកដីខ្លួន។ ដូច្នេះក្រោមភ្នែកច្រមុះរបស់ពលរដ្ឋគួដឌីស្ថានដែលស្និទ្ធនឹង PKK ការសម្លាប់ពលរដ្ឋគួដឌីស្ថានចំនួន ៣នាក់លើទឹកដីបារាំងជាសក្ខីកម្មដែលបញ្ជាក់ថា តួកគីមានសមត្ថភាព និងលទ្ធភាពក្នុងការតាមកំចាត់ពលរដ្ឋគួដឌីស្ថាននៅគ្រប់ទីកន្លែងទាំងអស់ ពោលឆ្ងាយពីតំបន់ដែលជាប់នឹងក្លៀកខ្លួនទៅទៀត។
គួររម្លឹកថា នេះមិនមែនជាលើកទី១ ទេដែលមានឃាតកម្មសម្លាប់ពលរដ្ឋគួដឌីស្ថានក្នុងទឹកដីបារាំង។ កាលពី ១០ឆ្នាំមុន ពោលក្នុងថ្ងៃទី៩ មករា ឆ្នាំ ២០១៣ មានឃាតកម្មសម្លាប់អ្នកទទួលខុសត្រូវចលនាគួដឌីស្ថានចំនួន ៣នាក់ក្នុងសង្កាត់ដដែលក្នុងក្រុងប៉ារីស។ ឃាតកម្មកាលពី ១០ឆ្នាំមួយនេះក៏ត្រូវបានសហគមន៍គួដឌីស្ថានចង្អុលមុខតួកគីដែរ។ អ៊ីចឹងសួរថា តើរដ្ឋអំណាចបារាំងពិតជាមិនបានជួយការពារពលរដ្ឋគួដឌីស្ថានដូចការចោទរបស់សហគមន៍គួដឌីស្ថានដែរ ឬទេ?។ គេពិបាកផ្តល់ចម្លើយច្បាស់ចំពោះសំណួរនេះដោយអាចត្រឹមបញ្ជាក់ថា ទំនាក់ទំនងរវាងបារាំង និងសហគមន៍គួដឌីស្ថានបារាំងជាទំនាក់ទំនងមួយដែលបារាំងត្រូវថ្លឹងថ្លែង និងគិតគូរពីកិច្ចសហប្រតិបត្តិការដែលបារាំងមានជាមួយតួកគី។
គួររម្លឹកថានៅក្នុងលោកសព្វថ្ងៃ ប្រជាជនគួដឌីស្ថានត្រូវបានគេចាត់ទុកជាប្រជាជនដែលរស់នៅរប៉ាត់រប៉ាយគ្មានរដ្ឋ និងគ្មានទឹកដី ពោលជាប្រជាជនដែលកំពុងរស់នៅជ្រកកោនលើទឹកដីរបស់ប្រទេសផ្សេង។ ទីតាំង ឬតំបន់ដែលប្រជាជនគួដឌីស្ថានកំពុងតាំងលំនៅដ្ឋានច្រើននាពេលបច្ចុប្បន្នមានពីរ ទី១ នៅតាមព្រំដែនរវាងតួកគី និងស៊ីរី ហើយទី២ នៅតាមព្រំដែនរវាងអ៊ីរ៉ាក់ និងអ៊ីរ៉ង់។ តែទោះនៅទីកន្លែងណាក៏ដោយ ប្រជាជនគ្មានរដ្ឋ និងគ្មានទឹកដីមួយនេះកំពុងបន្តជាផ្ទាំងស៊ីបនៃការតាមធ្វើទុក្ខបុកម្នេញមិនចេះចប់ មិនចេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ