បារាំង៖ ខ្មាន់កាំភ្លើងបាញ់រះនៅសហគមន៍ជនជាតិគួដ ទទួលស្គាល់ថា«ស្អប់ជនបរទេសខ្លាំង»
នៅក្រុងប៉ារីស ខ្មាន់កាំភ្លើង ដែលបាញ់រះនៅសហគមន៍ជនជាតិគួដ បានទទួលស្គាល់ថា«ស្អប់ជនបរទេសខ្លាំង» ហើយនិងមានចេតនា«ចង់សម្លាប់ជនភៀសខ្លួន»ទៀតផង។ នេះបើតាមរដ្ឋអាជ្ញាក្រុងប៉ារីស នៅថ្ងៃអាទិត្យ បន្ទាប់បានសាកសួរចម្លើយជនដៃដល់រួច។
ចុះផ្សាយនៅថ្ងៃ៖
ស្តាប់ - ០១:៥៧
បុរសខ្មាន់កាំភ្លើង មានវ័យ ៦៩ ឆ្នាំ ជានិវត្តន៍ជន និងមានគំនិតប្រកាន់ពូជសាសន៍ «ស្អប់ជនបរទេសដល់ឆ្អឹង» រហូតដល់ក្លាយជាជំងឺផ្លូវចិត្ត។ នេះបើតាមការគូសបញ្ជាក់របស់អ្នកស្រីរដ្ឋអាជ្ញាក្រុងប៉ារីសនៅក្នុងសេចក្តីថ្លែងការណ៍។
កាលពីថ្ងៃសុក្រ ជនដៃបានបាញ់រះនៅមជ្ឈមណ្ឌលសហគមន៍ជនជាតិគួដ សម្លាប់មនុស្ស៣នាក់ ហើយ៣នាកទៀតរងរបួសធ្ងន់។ តំណាងអយ្យការក្រុងប៉ារីស សម្រេចចោទប្រកាន់ ក្នុងសំណុំរឿងឃាតកម្ម និងការរើសអើងប្រកាន់ពូជសាសន៍ ពោលគឺមិនមែនជាករណីភេរវកម្មទេ។
នៅថ្ងៃកើតហេតុភ្លាមៗ ឪពុករបស់ជនសង្ស័យ ក៏បានប្រកាសបណ្តាញព័ត៌មានបារាំងដែរថា កូនប្រុសរបស់ខ្លួន «ឡប់សតិ»។ តាមការសាកសួររបស់ប៉ូលីសបារាំង គឺ ខ្មាន់កាំភ្លើងប្រុងនឹងបាញ់សម្លាប់ខ្លួន ក្រោយពីបាញ់រះរួច តែរូបគេត្រូវក្រុមមនុស្សនៅហាងកាត់សក់មួយ ជាប់កន្លែងកើតហេតុ បានទៅចាប់ឃាត់ មុននឹងត្រូវនគរបាលបារាំងចាប់ខ្លួន។ នៅពេលនេះ ខ្មាន់កាំភ្លើង លែងឋិតនៅការឃុំខ្លួនរបស់ប៉ូលីសសម្រាប់ស៊ើបអង្កេតនិងសួរចម្លើយទៀតហើយ គឺ រូបគេ ត្រូវបញ្ជូនទៅផ្នែកព្យាបាលសង្គ្រោះផ្លូវចិត្ត។
សូមជ្រាបថា បុរសខ្មាន់កាំភ្លើង ធ្លាប់ត្រូវជាប់ក្តីក្តាំក្នុងសំណុំរឿងរបស់តុលាការដែរ ទាក់ទងនឹងពាក្យសម្តីរើសអើងប្រកាន់ពូជសាសន៍ និងការប្រើប្រាស់អាវុធខុសច្បាប់។ កាំភ្លើងដែលរូបគេប្រើសម្រាប់បាញ់រះសម្លាប់មនុស្សកាលពីថ្ងៃសុក្រ គឺបានទទួលពីមិត្តភក្តិម្នាក់ តាំងពី ៤ ឆ្នាំមុន។ មិត្តនោះស្លាប់ហើយ។ ហើយ ជនដៃដល់ រក្សាទុកកាំភ្លើងនៅផ្ទះឪពុកម្តាយរបស់ខ្លួន។
ចាប់តាំងពីថ្ងៃសុក្រមក ក្រុមសហគមន៍ជនជាតិគួដ បានផ្ទុះកំហឹងខ្លាំង ហើយចលនាបាតុកម្ម មានសន្ទុះខ្លាំង ពិសេសថ្ងៃសៅរ៍អាទិត្យ រហូតដល់ប្រើហិង្សាដុះឡានតាមផ្លូវ និងបំផ្លាញសម្ភារៈផ្សេងៗ នៅកណ្តាលក្រុងប៉ារីសផង។ ក្នុងរឿងនេះ ពួកគួដនៅស៊ីរីក៏ធ្វើបាតុកម្មដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ