លោកហមប៊ុនឆាយឈប់ជេររិះគន់ ប៉ុន្តែ ត្រលប់មកស្វែងរកមធ្យោបាយបង្រួបង្រួមដើម្បីការពារជាតិខ្មែរ
ចុះផ្សាយនៅថ្ងៃ៖
ស្តាប់ - ១០:២៥
នៅប្រទេសបារាំង ជាទីដែលកិច្ចព្រមព្រៀងសន្តិភាព ទីក្រុងប៉ារីសឆ្នាំ ១៩៩១ ស្តីពីកម្ពុជា ចាប់កំណើត សមាគម សហគមន៍ និងអ្នកគាំទ្រគណបក្សនយោបាយខ្មែរ បានផ្តួចផ្តើមគំនិតរៀបចំព្រឹត្តិការណ៍ នៅទីតាំង ៣កន្លែងផ្សេងៗគ្នា សម្រាប់ខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស។ នៅថ្ងៃសុក្រទី២២តុលា ២០២១ សមាគម ចំនួន៤ ដូចជាសមាគម២៣តុលា ១៩៩១ សមាគមបដិវត្តផ្កាឈូក ទេពនិម្មិត និងគណៈកម្មាធិការយុត្តិធម៌ដើម្បីកម្ពុជា រៀបចំបាតុកម្មនៅក្បែរស្ថានទូតអាមេរិកក្នុងក្រុងប៉ារីស ចំណែក នៅថ្ងៃសៅរ៍ទី២៣តុលា សាខាគណបក្សសង្រ្គោះជាតិប្រចាំប្រទេសបារាំង និងសហគមន៍ខ្មែរ រៀបចំបាតុកម្ម ក្នុងរូបភាពជាការដង្ហែរក្បួន ដើម្បីទាមទារឲ្យសហគមន៍អន្តរជាតិ និងបណ្តាប្រទេសហត្ថលេខី សើរើឡើងវិញ កិច្ចព្រមព្រៀង។ សម្រាប់លោកហម ប៊ុនឆាយ អគ្គលេខាធិការនៃគណៈកម្មការព្រំដែនប្រទេសបារាំង ខុសពីលើកមុនៗ ការបា្ររព្ធខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស នឹងធ្វើឡើងក្នុងរូបភាពជាសន្និសីទ ពិភាក្សា ប៉ុន្តែ មិនមែនជាបាតុកម្មទាមទារឲ្យអន្តរជាតិដាក់សម្ពាធលើរបបលោកហ៊ុនសែនដូចមុនទៀតនោះទេ។
