នៅខួប៣០ឆ្នាំនៃកិច្ចព្រមព្រៀងក្រុងប៉ារីស ប្រជាជនខ្មែរដង្ហែរក្បួនជាលើកទី១តាមផ្លូវក្នុងក្រុងប៉ារីស
នៅប្រទេសបារាំង នៅចំថ្ងៃខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ប្រជាជនខ្មែរមកពីខេត្ត ក្រុងបារាំង និងមកពីអាល្លឺម៉ង់ បានចូលរួមក្នុងក្បួនបាតុកម្ម រៀបចំឡើងដោយសាខាគណបក្សសង្រ្គោះជាតិនៅប្រទេសបារាំង។ ខុសពីលើកមុនៗ ដែលបាតុកម្មដែលទាមទារឲ្យមានការគោរពលទ្ធិប្រជាធិបតេយ្យ សិទ្ធិមនុស្ស និងអធិបតេយ្យភាពទឹកដី ដែលមានចែងក្នុងកិច្ចព្រមព្រៀងទីក្រុងប៉ារីស ២៣ តុលា ឆ្នាំ ១៩៩១ ធ្វើឡើងនៅតែមួយកន្លែង នៅទីលានសិទ្ធិមនុស្ស ត្រូកាដេរ៉ូ ទល់មុខអគារតួអេហ្វែល បាតុកម្មនៅថ្ងៃសៅរ៍ទី ២៣តុលា ២០២១ នៅទីក្រុងប៉ារីស ត្រូវបានធ្វើឡើងក្នុងរូបភាពជាការដើរដង្ហែរក្បួន ចម្ងាយ ជាង ៣គីឡូម៉ែត្រ ពីទីលាន République ទៅដល់ទីលាន Nation ក្រោមការការពារសន្តិសុខ និងជួយបើកផ្លូវពីសំណាក់ប៉ូលិសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៩
នៅទីលានRépublique កណ្តាលក្រុងប៉ារីស ប្រជាជនខ្មែរ រស់នៅប្រទេសបារាំង បានប្រមូលផ្តុំគ្នាស្តាប់វាគ្មិន ជាអ្នកនយោបាយ និងសកម្មជនការពារសិទ្ធិមនុស្ស។ អ្នកចូលរួមក្នុងបាតុកម្ម មានចំនួនប្រមាណ ៥០០នាក់ ដែលនៅក្នុងនោះ មានជិត ២០០នាក់ ធ្វើដំណើរមកពីខេត្ត ដូចជាលីយ៉ុង ម៉ាសីយ៍ លីល បកដូរ ម៉ុលលូស ជាដើម។ នេះបើតាមសាខាគណបក្សសង្រ្គោះជាតិ នៅប្រទេសបារាំង ដែលចូលរួមរៀបចំដឹកនាំបាតុកម្មជាមួយសហគមន៍ និងសមាគមខ្មែរ។
ក្នុងចំណោម វាគ្មិនដ៏សំបូរវោហា គេឃើញមានវត្តមានរបស់លោកសមរង្ស៊ី អតីតប្រធានស្តីទីនៃគណបក្សសង្រ្គោះជាតិ។
ជាលើកទី១ បាតុកម្មរបស់ប្រជាជនខ្មែរដើម្បីទាមទារឲ្យមានការគោរពកិច្ចព្រមព្រៀងក្រុងប៉ារីស បានធ្វើឡើងក្នុងរូបភាពជាដើរដង្ហែរក្បួន តាមផ្លូវនៅទីក្រុងប៉ារីស។ លោកសុវណ្ណា រស់នៅជាយក្រុងប៉ារីសបានធ្វើដំណើរមកចូលរួមក្នុងបាតុកម្ម នៅចំថ្ងៃពិសេស ថ្ងៃខួប ៣០ឆ្នាំ នៃកិច្ចព្រមព្រៀងក្រុងប៉ារីស។ អាយុ ៧៥ឆ្នាំ លោកសុវណ្ណា ក៏ដូចជាអ្នកចូលរួមវ័យចំណាស់ផ្សេងទៀត បានឈប់ អង្គុយសម្រាក នៅតាមផ្លូវ មុននឹងបន្តដំណើរក្នុងក្បួនបាតុកម្ម។
ក្នុងចម្ងាយ ជាង ៣គីឡូម៉ែត្រនៃដំណើរបាតុកម្ម ពី ទីលានRépublique ដល់ទីលានNation ពាក្យរិះគន់រដ្ឋាភិបាលរបស់លោកហ៊ុនសែន និងការទាមទារឲ្យមានសិទ្ធិសេរីភាព ដោះលែងអ្នកទោសនយោបាយ នៅកម្ពុជា លឺលាន់រំពងពេញផ្លូវ ក្រោមក្រសែភ្នែករបស់គ្រប់អ្នកដំណើរតាមផ្លូវ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ