កិច្ចព្រមព្រៀងទីក្រុងប៉ារីស៖ បញ្ញាវ័ន្ត សង្គមស៊ីវិល និងអ្នកនយោបាយខ្វែងគំនិតគ្នាលើសុពលភាពរយៈពេល៣០ឆ្នាំមកនេះ
រាជបណ្ឌិត្យសភាកម្ពុជានៅថ្ងៃសុក្រទី២២តុលានេះ បានបើកកិច្ចពិភាក្សាតុមូលស្តីពីខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស។ ពីភាគីបញ្ញាវ័ន្តមកពីរាជបណ្ឌិតសភាកម្ពុជាយល់ថាកិច្ចព្រមព្រៀងទីក្រុងប៉ារីសបានអស់សុពលភាពទៅហើយបន្ទាប់ពីកម្ពុជាបញ្ចប់ពេលវេលាអន្តរកាល។ ក៏ប៉ុន្តែពីភាគីសង្គមស៊ីវិល និងអ្នកនយោបាយក្រៅរដ្ឋាភិបាលយល់ថាកិច្ចព្រមព្រៀងទីក្រុងប៉ារីសនៅតែមានសុពលភាពឲ្យកម្ពុជាអនុវត្តតាម។
ចុះផ្សាយនៅថ្ងៃ៖
ស្តាប់ - ០២:០០
ពេលនិយាយដល់សុពលភាពនៃកិច្ចព្រមព្រៀងទីក្រុងប៉ារីស វាគ្មិនទាំងអស់ក្នុងកិច្ចពិភាក្សាតុមូលរបស់រាជបណ្ឌិតសភាកម្ពុជា សុទ្ធតែខ្វែងមតិគ្នាទៅវិញទៅមក។ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជាលើកឡើងបញ្ហាសុពលភាពនៃកិច្ចព្រមពៀងសនិ្តភាពទីក្រុងប៉ារីសបានបញ្ចប់ទៅហើយ បន្ទាប់ពីកម្ពុជាមានការបោះឆ្នោត រួមនឹងការបង្កើតរដ្ឋធម្មនុញ្ញកម្ពុជានៅឆ្នាំ១៩៩៣។ តាមលោកសុខ ទូច ការលើកឡើងនេះគឺសំអាងទៅតាមខ្លឹមសារដែលមានចែងនៅក្នុងកិច្ចព្រមព្រៀងទីក្រុងប៉ារីសដោយផ្ទាល់។
ក៏ប៉ុន្តែពីភាគីខាងសង្គមស៊ីវិល អ្នកតាមដានសង្គម និងអ្នកនយោបាយក្រៅរដ្ឋាភិបាលវិញយល់ឃើញថាកិច្ចព្រមព្រៀងទីក្រុងប៉ារីសរយៈពេល៣០ឆ្នាំមកនេះ នៅតែមានសុពលភាពឲ្យរដ្ឋាភិបាលកម្ពុជាអនុវត្តតាម។
លោកស្រី ចក់ សុភាព នាយិកានៃមជ្ឈមណ្ឌលសិទ្ធិមនុស្សកម្ពុជា ដែលជាវាគ្មិនចូលរួមក្នុងកិច្ចពិភាក្សាដែរនោះ លើកឡើងថា កិច្ចព្រមព្រៀងទីក្រុងប៉ារីសគួររតែត្រូវបានលើកមកពិភាក្សានិងអនុវត្តតាមពីសំណាក់អ្នកនយោបាយ ទោះបីកម្ពុជាមានសន្តិភាពទៅហើយក្តី។ បើតាមលោកស្រី ចក់ សុភាព ការធ្វើបែបនេះគឺដើម្បីបង្កបរិយាសបោះឆ្នោតដោយមិនមានភាពភ័យខ្លាច រួមនឹងការបង្កើតលំហសង្គមស៊ីវិល។
រីឯអ្នកនយោបាយមកពីគណបក្សក្រៅរដ្ឋាភិបាលរួមមានលោកអ៊ូ ច័ន្ទរ័ត្ន មកពីគណបក្សកែទម្រង់កម្ពុជា និងលោកយ៉ង សាំងកុមារ មកពីគណបក្សប្រជាធិបតេយ្យមូលដ្ឋានវិញយល់ថា ស្មារតីសុពលភាពនៃកិច្ចព្រមព្រៀងមួយនេះគឺស្ថិតនៅលើពលរដ្ឋគ្រប់រូប និងផលប្រយោជន៍ដែលកម្ពុជារួមទាំងប្រទេសជាហត្ថលេខីទទួលបាន។
បន្ថែមពីនេះគណបក្សនយោបាយក្រៅរដ្ឋាភិបាលទាំងពីរ បានចេញនូវសេចក្តីថ្លែងការណ៍ដាច់ដោយឡែកពីគ្នាផងដែរ ក្នុងការចូលរួមអបអរខួបលើកទី៣០នៃកិច្ចព្រមព្រៀងទីក្រុងប៉ារីសនេះ។
បើតាមសេចក្តីថ្លែងការណ៍ ទាំងគណបក្សកែទម្រង់កម្ពុជា ទាំងគណបក្សប្រជាធិបតេយ្យមូលដ្ឋាន សុទ្ធតែឲ្យតម្លៃលើកិច្ចព្រមព្រៀងទីក្រុងប៉ារីស ដែលបង្កើតឲ្យមានការបង្រួបបង្រួមជាតិ ឈានទៅរកការអភិវឌ្ឍបែបប្រជាធិបតេយ្យ។ ហើយសម្រាប់គណបក្សទាំងពីរសុទ្ធតែចង់ឃើញរដ្ឋាភិបាលដាក់បញ្ចូលថ្ងៃខួបកិច្ចព្រមព្រៀងទីក្រុងប៉ារីស ជាថ្ងៃបុណ្យជាតិឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ