លោក កើត រិទ្ធ៖យុទ្ធនាការរបស់ក្រសួងយុត្តិធម៌មិនបង្ហាញពីកម្សោយប្រព័ន្ធយុត្តិធម៌កម្ពុជាទេ
ចុះផ្សាយនៅថ្ងៃ៖
ស្តាប់ - ១៦:៤៤
ក្រសួងយុត្តិធម៌នៅថ្ងៃទី៩មករា ឆ្នាំ២០២៤ បានប្រកាសយុទ្ធនាការថ្មីចំនួន២ ដើម្បីពង្រឹងប្រព័ន្ធយុត្តិធម៌នៅកម្ពុជា។ យុទ្ធនាការទី១ គឺការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការទី២ គឺការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ។ យុទ្ធនាការថ្មីនេះធ្វើឡើងទន្ទឹមនឹងការដាក់ចេញយន្តការដោះស្រាយវិវាទក្រៅប្រព័ន្ធតុលាការដែរ។ ឆ្លើយតបនឹងសំណួររបស់វិទ្យុបារាំងអន្តរជាតិ លោក កើត រិទ្ធ រដ្ឋមន្ត្រីក្រសួងយុត្តិធម៌ អះអាងថា ការដាក់ចេញយុទ្ធនាការថ្មីដែលមានទាំងក្នុងនិងក្រៅប្រព័ន្ធតុលាការមិនបានឆ្លុះបញ្ចាំងថា ប្រព័ន្ធយុត្តិធម៌នៅកម្ពុជាទន់ខ្សោយដូចការចោទរបស់អង្គការក្រៅស្រុកមួយចំនួននោះទេ។ ទន្ទឹមគ្នានេះ លោក កើត រិទ្ធបានស្វាគមន៍ផងដែរចំពោះការចូលរួមសហការពីសំណាក់អង្គការសង្គមស៊ីវិលមកពីគ្រប់និន្នាការដើម្បីពង្រឹងបន្ថែមលើប្រព័ន្ធយុត្តិធម៌នៅកម្ពុជា។
