លោក ហង្ស ពុទ្ធា៖ ដំណើរការឃោសនាបោះឆ្នោតព្រឹទ្ធសភាមានភាពចាស់ទុំ និងគ្មានបណ្តឹង
ចុះផ្សាយនៅថ្ងៃ៖
ស្តាប់ - ១០:០២
យុទ្ធនាការឃោសនារកសម្លេងគាំទ្រសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ បានបិទបញ្ចប់នៅថ្ងៃទី២៣ ខែកុម្ភៈនេះ បន្ទាប់ពីបានធ្វើឡើងអស់រយៈពេល២សប្តាហ៍កន្លងទៅ។ ថ្ងៃទី២៤ កុម្ភៈស្អែកជាថ្ងៃស ហើយថ្ងៃទី២៥ កុម្ភៈ ជាថ្ងៃបោះឆ្នោត។ គណបក្សនយោបាយចំនួន៤ គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ្វុនស៊ីនប៉ិចបានចូលប្រកួតប្រជែងនៅក្នុងការបោះឆ្នោតអសកលនេះ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃសុក្រ ទី២៣ ខែកុម្ភៈនេះ លោក ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោតបានបញ្ជាក់ថា យុទ្ធនាការឃោសនារកសម្លេងឆ្នោតរបស់គណបក្សនយោបាយទាំង៤ រយៈពេល២សប្តាហ៍មកនេះ គឺបានប្រព្រឹត្តទៅដោយរលូន។