បារាំងបើកយុទ្ធនាការបោសសំអាតទ្រឹស្តីអ៊ីស្លាមជ្រុលនិយម ក្រោយហេតុការណ៍សម្លាប់កាត់កគ្រូបង្រៀន
ចុះផ្សាយនៅថ្ងៃ៖
ស្តាប់ - ០៩:៤៥
នៅប្រទេសបារាំង កាលពីថ្ងៃសុក្រ១៦តុលា មានហេតុការណ៍ឃាតកម្មដ៏សាហាវមួយបានកើតឡើង ដោយយុវជនអាយុ១៨ឆ្នាំមា្នក់ បានសម្លាប់កាត់ក្បាល គ្រូបង្រៀនអនុវិទ្យាល័យម្នាក់ ក្រោមហេតុផលថា គ្រូបង្រៀនរូបនោះ បានប្រមាថ មើលងាយព្រះអាឡា។ អំពើឃាតកម្មនេះ បានញ៉ាំងឲ្យផុសផុល នូវទឹកចិត្តក្រេវក្រោធក្នុងសង្គមបារាំង ប្រឆាំងនឹងចរន្តទ្រឹស្តីអ៊ីស្លាមជ្រុលនិយម ដែលកាន់តែរីកធំឡើងៗ ផ្ទុយពីច្បាប់គ្រិះរបស់បារាំង ដែលការពារសេរីភាពនៃការបញ្ចេញមតិ។ អាជ្ញាធរបារាំងបានចាត់ទុក អំពើឃាតុកម្មដ៏ព្រៃផ្សៃនេះ ថាជាអំពើភេរវកម្មបែបអ៊ីស្លាមជ្រុលនិយម។ រដ្ឋាភិបាលបារាំង បានអះអាងថា នឹងបើកយុទ្ធនាការបន្ទាន់មួយ ដើម្បីបោសសំអាត ក្រុមមនុស្ស ឬក៏ចលនាដែលសាបព្រួសទ្រឹស្តីអ៊ីស្លាមជ្រុលនិយមនេះ នៅលើទឹកដីបារាំង។
សម្លាប់កាត់ក្បាលគ្រូបង្រៀន នៅក្បែរសាលា
នេះគឺជាអំពើឃាតកម្ម ដ៏សាហាវព្រៃផ្សៃបំផុត ដែលបានកើតឡើង ក្នុងទឹកដីបារាំង។ ជនរងគ្រោះ គឺជាគ្រូបង្រៀនភេទប្រុស ឈ្មោះ Samuel Paty អាយុ៤៧ឆ្នាំ បង្រៀនមុខវិជ្ជាប្រវត្តិវិទ្យានិងភូមិវិទ្យា នៅអនុវិទ្យាល័យ Bois d’Aulne ក្នុងឃុំ Conflans-Sainte-Honorine ភាគពាយ័ព្យ ជាយទីក្រុងបារីស។ ចំណែកជនដៃដល់ គឺជាក្មេងប្រុសជំទង់អាយុ១៨ឆ្នាំ ជនជាតិរុស្ស៊ី ដើមកំណើតឆេឆិននី មករស់ក្នុងប្រទេសបារាំងក្នុងនាមជាជនភៀសខ្លួន ជាមួយនិងឪពុកម្តាយ។ យោងតាមលទ្ធផលស៊ើបអង្កេត ជននេះមិនមែនជាសិស្ស រៀននៅក្នុងអនុវិទ្យាល័យ ដែលជនរងគ្រោះបង្រៀនទេ។ ឃាតករនេះ ធ្លាប់ត្រូវបានសមត្ថកិច្ចស្គាល់ថា ជនពាល បង្កអំពើហិង្សា បង្កការខូចខាតទ្រព្យសម្បត្តិសាធារណៈ ជាច្រើនលើក។
នៅថ្ងៃសុក្រ ទី១៦តុលា វេលាម៉ោង៥ល្ងាច នគរបាលបានប្រទះឃើញសាកសពជនរងគ្រោះ ដោយក្បាលត្រូវកាត់ចេញពីដងខ្លួន នៅមិនឆ្ងាយប៉ុន្មានពីអនុវិទ្យាល័យ។ ការស៊ើបអង្កេតបានបង្ហាញថា ឃាតករ បានមកចាំនៅមុខច្រកចូលសាលា ហើយបានសួរទៅកាន់កូនសិស្សថា មួយណាជាគ្រូបង្រៀនឈ្មោះ Samuel Paty ហើយបន្ទាប់មកក៏ស្ទាក់សម្លាប់ជនរងគ្រោះ។ នៅក្បែរសាកសពជនរងគ្រោះ គេឃើញមានកាំបិត២ កាំបិត១នោះមានប្រវែងជាង៣០សង់ទីមែត្រ។ នៅល្ងាចថ្ងៃដដែលនេះ ឃាតករ ត្រូវបានសមត្ថកិច្ចស្ទាក់បាញ់សម្លាប់ ដោយគ្រាប់កាំភ្លើងចំនួន១០គ្រាប់ បន្ទាប់ពីជននោះ បានកាន់អាវុធគំរាមបាញ់ទៅលើសមត្ថកិច្ច ហើយថែមទាំងបានស្រែកឃ្លាថា “Allahou Akbar ! “ ថែមទៀតផង។
នៅក្នុងទូរស័ព្ទដៃឃាតករ គេបានរកឃើញរូបថតជាច្រើនប៉ុស្តិ ដែលជននេះបាន ថតសាកសព ក្បាលរបស់ជនរងគ្រោះ នៅវេលាម៉ោងប្រមាណជា៤និង៥៧នាទីល្ងាច។ ជននេះបានបង្ហោះរូបថតនេះ នៅលើគណនីបណ្តាញTwitter របស់ខ្លួនឈ្មោះថា @Tchetchene_270 អមដោយសារសរសេរថា៖ ក្នុងនាមព្រះអាឡា ខ្លួនបានសម្លាប់ជនម្នាក់ ដែលហ៊ានប្រមាថមើលងាយព្រះអាឡាជាម្ចាស់។ សារនោះមានខ្លឹមសារគំរាមដល់ លោកម៉ាក្រុង និងប្រជាជនបារាំងទាំងអស់ទៀតផង ថាបើមិនបញ្ឈប់ការប្រមាថព្រះអាឡាទទេនោះ ខ្លួននឹងសងសឹក សម្លាប់មិនបង្អង់ដៃ។ នៅថ្ងៃសៅរ៍ គណនី រូបថត និងសារTwitter របស់ឃាតករនេះ ត្រូវបានប្រព័ន្ធបិទចោលទាំងអស់។
រករឿងជនរងគ្រោះ ដោយសារ បានយករូបត្លុកព្រះអាឡាមកពន្យល់សិស្ស
បើតាមការស៊ើបអង្កេត ជនរងគ្រោះធ្លាប់បាន យករូបថ្លុកព្រះអាឡា មកបង្ហាញក្នុងថ្នាក់រៀន កាលពីដើមខែតុលានេះ ដើម្បីពន្យល់ វែកញែកជាមួយសិស្សក្នុងថ្នាក់ ឲ្យស្វែងយក់ថាអ្វីទៅជា សិទ្ធិសេរីភាពក្នុងការបញ្ចេញមតិ ដែលជាគោលការណ៍គ្រិះ នៃច្បាប់បារាំង។ រឿងរ៉ាវនេះ បានបង្កឲ្យមានការតវ៉ា យ៉ាងផុសផុល ពីសំណាក់អាណាព្យាបាលសិស្ស ដែលជាអ្នកកាន់សាសនាអ៊ីស្លាម។ ឆ្លងកាត់ការប្រជុំ ជាមួយសិស្សៗ ជាមួយអាណាព្យាបាលសិស្ស ព្រមទាំងបានសាកសួរគ្រូបង្រៀនផ្ទាល់ផង ខាងថ្នាក់ដឹកនាំសាលា បានសន្និដ្ឋានថា គ្រូបង្រៀនឈ្មោះ Samuel Paty មិនបានធ្វើអ្វីខុសឆ្គងឡើយ ពោលគឺជាតួនាទី និងការងាររបស់គ្រូបង្រៀន ដែលត្រូវពន្យល់អប់រំសិស្ស ឲ្យស្វែងយល់ពីសិទ្ធិសេរីភាព ពីច្បាប់ក្នុងសង្គមបារាំង។
តែក្រោយមក ឪពុករបស់សិស្សស្រីម្នាក់ បានធ្វើវីដេអូ ចំនួន២ បង្ហោះផ្សាយតាមបណ្តាញ Youtube ដោយបានចោទប្រកាន់ធ្ងន់ៗទៅលើគ្រូបង្រៀងរូបនេះ ព្រមទាំងបានអំពាវនាវ ឲ្យអាណាព្យាបាលសិស្សផ្សេងៗទៀត ដែលកាន់សាសនាអ៊ីស្លាមដូចគ្នា ឲ្យជួយគ្នា ដាក់ពាក្យប្តឹងគ្រប់ច្រកល្ហក ដើម្បីបណ្តេញគ្រូនេះចេញពីសាលា ដោយចោទគ្រូនេះ បានប្រមាថមើលងាយសាសនាអ៊ីស្លាម និងធ្វើបាបកូនចៅរបស់ខ្លួនដែលជាអ្នកគោរពសាសនាអ៊ីស្លាម។
អាណាព្យាបាលខ្លះ ចិញ្ចឹមបំប៉នគំនិតស្អប់គុំគួន ងប់ងុលនឹងអ៊ីស្លាមជ្រុលនិយម ក្នុងខួរក្បាលក្មេង
ឆ្លងកាត់ការស៊ើបអង្កេត សមត្ថកិច្ចបារាំង បានអះអាងថា អ្វីដែលជំរុះ ឲ្យឃាតករ ដែលមិនមែនជាសិស្សនៅក្នុងសាលារៀននេះ មិនទាំងស្គាល់គ្រូបង្រៀនរូបនេះសោះពីមុនមក ហើយឈានទៅសម្លាប់កាត់ក គ្រូបង្រៀនរូបនេះ គឺវាជាលទ្ធផល នៃសកម្មភាពបំពុល ផ្លុំត្រចៀក ពន្យុះ ញុះញង់ ពីសំណាក់អាណាព្យាបាលសិស្សមួយចំនួន ដែលជាសមាជិក ក្នុងសហគមអ្នកកាន់សាសនាអ៊ីស្លាម ជាមួយនឹងឪពុកម្តាយរបស់ជនដៃដល់។ កាលពីថ្ងៃសៅរ៍ទី១៧ សមត្ថកិច្ចបានចាប់ឃាត់ខ្លួន មនុស្សចំនួន១១នាក់ ក្នុងនោះមានឪពុកម្តាយ និងសមាជិកគ្រួសាររបស់ឃាតករ ព្រមទាំងអាណាព្យាបាលសិស្សស្រី ដែលបានធ្វើវីដេអូ អំពាវនាវឲ្យគេរករឿងគ្រូបង្រៀននោះផងដែរ។
អំពើព្រៃផ្សៃ បង្កឡើងដោយក្មេងប្រុសអាយុ១៨ឆ្នាំនេះ គឺវាជាលទ្ធផល នៃការស្រោចទឹកដាក់ជី ពីសំណាក់មនុស្សចាស់ ដែលជាឪពុកម្តាយ អាណាព្យាបាល ដើម្បីបំប៉នគំនិតអ៊ីស្លាមជ្រុលនិយមនេះ ឲ្យវាលូតធំធាត់នៅក្នុងខួរក្បាលក្មេង រហូតក្មេងជឿងប់ងល់ គ្មានគំនិតបើកទូលាយ ហ៊ានសម្លាប់មនុស្សដោយព្រៃផ្សៃ ក្នុងនាមព្រះសាសនាអ៊ីស្លាមបែបនេះ។ បញ្ហានេះ គឺជាបញ្ហារួម នៅក្នុងសង្គមបារាំងតែម្តង ព្រោះថាដូចយើងដឹងហើយ ថាបារាំងបានរងនូវអំពោះភេរវកម្ម បែបអ៊ីស្លាមជ្រុលនិយមនេះ ច្រើនដងមកហើយ។
បារាំង ជាប្រទេសដែលមិនប្រកាន់សាសនាណាទាំងអស់។ សិទ្ធិសេរីភាពនៃការបញ្ចេញមតិ ត្រូវបានការពារដោយច្បាប់។ ការសើចចំអកលេង មិនថាទៅលើសាសនាណាក៏ដោយ គឺជាប្រពៃណីនៅក្នុងសង្គមបារាំង ព្រោះវាជាសិទ្ធិនៃការបញ្ចេញមតិ។ ក៏ប៉ុន្តែ អ្វីដែលគេសង្កេតឃើញ ប៉ុន្មានឆ្នាំចុងក្រោយនេះ គឺថាអ្នកកាន់សាសនាអ៊ីស្លាម បែបជ្រុលនិយមខ្លះ បានចេញមុខរារាំង និងបរិហារសិទ្ធិសេរីភាពនេះ។
រំលាយចោល អង្គការសមគមអ៊ីស្លាមមួយចំនួន
ថ្ងៃអាទិត្យទី១៨តុលា ក្រុមប្រឹក្សាសន្តិសុខជាតិបារាំង បានបើកការប្រជុំបន្ទាន់ ដើម្បីចេញវិធានការក្តីមួយចំនួន ឈានទៅប្រយុទ្ធប្រឆាំង និងការរីកសាយភាយ នូវចរន្តទ្រឹស្តីអ៊ីស្លាមជ្រុលនិយមនេះ។ នៅព្រឹកថ្ងៃចន្ទ លោក Gérald Darmanin រដ្ឋមន្ត្រីក្រសួងមហាផ្ទៃបារាំង បានអះអាងថា សមត្ថកិច្ចបារាំង កំពុងតែបើកប្រតិបត្តិការស៊ើបអង្កេត ចំនួនយ៉ាងហោច ៨០សំណុំរឿង ទាំងពាក់ព័ន្ធដោយផ្ទាល់ ទាំងមិនពាក់ព័ន្ធ និងករណីឃាតកម្មលើគ្រូបង្រៀននេះ។
លោករដ្ឋមន្ត្រីក្រសួងមហាផ្ទៃបារាំង បានបញ្ជាក់ទៀតថា លោកនឹងស្នើទៅកិច្ចប្រជុំគណរដ្ឋមន្ត្រី ឲ្យរំលាយចោល នូវសមាគមដែលពាក់ព័ន្ធនឹងសាសនាអ៊ីស្លាម ចំនួន៥១សមាគម។ ក្នុងនោះលោកបញ្ជាក់ថា មានដូចជា សមាគមសហព័ន្ធប្រឆាំងនឹងការរើសអើងលើអ្នកកាន់សាសនាអ៊ីស្លាម (CCIF) ដែលជាសមាគមជួយគាំព៌ាផ្នែកច្បាប់ ដល់អ្នកកាន់សាសនាអ៊ីស្លាម ដែលរងគ្រោះដោយការមើលងាយ រើសអើងផ្សេងៗ និងអង្គការ BarakCity ដែលជាអង្គការសាបព្រួសទ្រឹស្តីអ៊ីស្លាមជ្រុលនិយម ដ៏សកម្មមួយនៅបារាំង។
លោករដ្ឋមន្ត្រីក្រសួងមហាផ្ទៃបារាំង អះអាងថា ឆ្លងកាត់ការស៊ើបអង្កេត គឺបានបង្ហាញយ៉ាងច្បាស់ថា សហព័ន្ធប្រឆាំងនឹងការរើសអើងអ្នកកាន់សាសនាអ៊ីស្លាម បានចូលរួមចំណែក នៅក្នុងការជំរុញឲ្យមានអំពើឃាតកម្មនេះ។ លោក បានប្រើពាក្យធ្ងន់ៗ អង្គការសមាគមដែលលាក់មុខក្នុងនាមជាអ្នកជួយសហគមអ្នកកាន់សាសនាអ៊ីស្លាមទាំងនោះ តាមពិត គឺជា “សត្រូវរបស់សាធារណៈរដ្ឋបារាំង” ។ បារាំងជាប្រទេសមានច្បាប់ គឺមិនអាចបន្ត ឲ្យសមាគមអង្គការទាំងនោះ បន្តធ្វើកម្មភាពប្រឆាំងច្បាប់បារាំង សាបព្រួសទ្រឹស្តីអ៊ីស្លាមជ្រុលនិយម បែបនេះបានទៀតទេ។
តែយ៉ាងណា អ្នកវិភាគនយោបាយខ្លះ បានរិះគន់រដ្ឋាភិបាលលោកម៉ាក្រុង ថាមានភាពស្ទើស្ទាក់ បង្អែរបង្អង់ មិនព្រមចាត់វិធានការ ឲ្យទាន់ពេលវេលា។ បញ្ហាចរន្តអ៊ីស្លាមជ្រុលនិយមនេះ ជាដំបៅក្នុងសង្គមបារាំង យូរឆ្នាំមកហើយ ជាក់ស្តែងអំពើភេរវកម្មផ្ទួនៗគ្នា ក្នុងឆ្នាំ២០១៥។ តែរដ្ឋបារាំង និងតែមិនអាចជីកកកាយឫសគល់នេះបាន។
បញ្ហានេះ វាក៏ជាលទ្ធផលនៃការបែកបាក់គ្នា រវាងអ្នកនយោបាយបារាំងដែរ។ ក្រុមស្តាំនិយម បានរិះគន់ ចង្អុរមុខពួកឆ្វេងនិយមជ្រុលមួយចំនួន ថាបានបំពាក់បំប៉ន ជួយសហគមអ្នកកាន់សាសនាអ៊ីស្លាម ឲ្យខឹងរករឿងរដ្ឋាភិបាល ដើម្បីតែកេងចំណេញសន្លឹកឆ្នោត។ គឺក្រុមឆ្វេងនិយមជ្រុលខ្លះនេះហើយ ដែលបានរារាំងមិនឲ្យមានវិធានការតឹងតែង ប្រឆាំងនឹងពួកផ្តាច់ការ ជាក់ស្តែង គម្រោងច្បាប់ដកសញ្ញាតិបារាំងពីភេរវជនអ៊ីស្លាម ដែលទីបំផុតត្រូវធីបចោលវិញ។ ប្រការទាំងអស់នេះ បានធ្វើឲ្យរដ្ឋបារាំង បរាជ័យ ម្តងជា២ដង ក្នុងការប្រយុទ្ធប្រឆាំងនឹងទ្រឹស្តីអ៊ីស្លាមជ្រុលនិយមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ