ប្រឈមនឹងការឆ្លងរាលដាលកូវីដ១៩ ដ៏ធ្ងន់ធ្ងរបំផុត បារាំងសម្រេចបិទខ្ទប់ប្រទេស១ខែ
ចុះផ្សាយនៅថ្ងៃ៖
ស្តាប់ - ០៨:០៥
បារាំង ក៏ដូចជាប្រទេសស្ទើរតែទាំងអស់នៅអឺរ៉ុប កំពុងតែស្ថិតក្នុងស្ថានភាពអាសន្ន បណ្តាលមកពីការឆ្លងរាលដាលកូវីដ១៩ ដ៏ច្រើន និងលឿនរហ័សជាទីបំផុត។ ២៤ម៉ោងចុងក្រោយ នៅបារាំង មានអ្នកឆ្លងថ្មី ប្រមាណជាង៣ម៉ឺន៦ពាន់នាក់។ ចំនួនអ្នកជំងឺកូវីដ១៩ ដែលត្រូវទទួលការសង្គ្រោះបន្ទាន់ កាន់តែកើនឡើងខ្លាំង ខណៈគ្រែពេទ្យដែលមានបំពាក់ដោយគ្រឿងម៉ាស៊ីនជំនួយការដកដង្ហើម ក៏កាន់តែខើច។ ប្រឈមនឹងបញ្ហានេះ កាលពីយប់ថ្ងៃពុធ ម្សិលមិញនេះ លោកប្រធានាធិបតីបារាំង អេម៉ានុយអែល ម៉ាក្រុង បានសម្រេចបិទខ្ទប់ប្រទេសឡើងវិញ ជាថ្មីម្តងទៀត ដើម្បីទប់បង្អាក់ ការឆ្លងរាលដាល។
សន្ទរកថារបស់លោកម៉ាក្រុង កាលពីយប់ថ្ងៃពុធទី២៨តុលា ត្រូវបានមនុស្សនៅស្រុកបារាំង ជាង៣០លាននាក់ តាមដានស្តាប់ យ៉ាងយកចិត្តទុកដាក់បំផុត។ ដូចយើងបានដឹងហើយ ថាប្រមាណ២សប្តាហ៍ចុងក្រោយនេះ បារាំងបានឆ្លងកាត់ការឆ្លងរាលដាលកូវីដ១៩ ខ្លាំងសម្បើមណាស់។ មានថ្ងៃខ្លះ គ្រាន់តែក្នុងមួយថ្ងៃ គេបានធ្វើតេស្តរកឃើញវិជ្ជមានថ្មីបន្ថែម ដល់ទៅជាង៥ម៉ឹននាក់ឯណោះ។
បារាំង និងប្រទេសសឹងទាំងអស់នៅអឺរ៉ុប ស្ថិតក្នុងស្ថានការណ៍អាសន្នដូចគ្នា
នៅក្នុងសន្ទរកថា រយៈពេលប្រមាណ២៣នាទី លោកម៉ាក្រុង បានផ្តើមនិយាយ អំពីស្ថានការណ៍ឆ្លងរាលដាលកូវីដ១៩ ក្នុងរយៈពេល២សប្តាហ៍កន្លងមកនេះ ហើយលោកបានទទួលស្គាល់ថា វិធានការដាក់បំរាមគោលចរ នៅតាមទីក្រុងធំៗ ដែលបានសម្រេចជាង១០ថ្ងៃមុននោះ គឺមិនគ្រប់គ្រាន់ ក្នុងការទប់ការឆ្លងរាលដាលទេ។
លោកបញ្ជាក់ថា គ្រាន់តែក្នុងមួយថ្ងៃ២៧តុលា មានអ្នកជំងឺកូវីដ១៩ បានស្លាប់ប្រមាណ៥២០នាក់នៅបារាំង។ចំនួនអ្នកជំងឺ កូវីដ១៩ ដែលត្រូវការការសង្គ្រោះបន្ទាន់ បានកើនឡើងខ្លាំងណាស់ រហូតសរុបប្រមាណ៣០០០នាក់ហើយ។ ពោលគឺវាពាក់កណ្តាល នៃចំនួនគ្រែពេទ្យ ដែលមានបំពាក់ម៉ាស៊ីនជំនួយដកដង្ហើម។ ដូច្នេះបើសិនជាបន្តកើនឡើងថែមទៀត មានន័យថា ដល់ពេលមួយ គឺគ្រូពេទ្យនឹងត្រូវសម្រេចចិត្ត ថាត្រូវចោលអ្នកជំងឺមួយណាហើយ។
លោកម៉ាក្រុង ក៏បានលើកឡើងដែរថា យុទ្ធសាស្ត្ររបស់រដ្ឋាភិបាលបារាំង ក៏ដូចជាប្រទេសផ្សេងទៀតនៅអឺរ៉ុប គឺធ្វើយ៉ាងណា អំពាវនាវឲ្យប្រជាជនប្រុងប្រយ័ត្ន គោរពបទវិធានអនាម័យ ពាក់ម៉ាស និងរក្សាគំលាត។ រដ្ឋបារាំង ក៏បានបន្ថែមសមត្ថភាពធ្វើតេស្ត ក្នុងចំនួនច្រើនណាស់។ តែលោក ក៏មិនចង់យកឱកាសនេះ មកស្តីបន្ទោសប្រជាជន ថាមិនប្រយ័ត្ននោះទេ។ បញ្ហាចំពោះមុខនាពេលនេះគឺថា គ្រប់ប្រទេសនៅអឺរ៉ុប គឺគ្រប់គ្នាបានភ្ញាក់ផ្អើលទាំងអស់គ្នា អំពីល្បឿននៃការឆ្លងរាលដាល ដ៏លឿនរហ័ស នៃមេរោគនេះ
ដូច្នេះហើយ បន្ទាប់ពីបានថ្លែងថ្លែង ពិគ្រោះយោបល់ជាមួយអ្នកជំនាញទាំងអស់ លោកម៉ាក្រុង បាននិយាយថា គ្មានជម្រើសផ្សេងទេ ក្រៅតែពីបិទខ្ទប់ប្រទេសឡើងវិញ រយៈពេល១ខែ ដើម្បីបង្អាក់ចរាចរណ៍ឆ្លងរាលដាលនៃមេរោគជំងឺកូវីដ១៩។
បិទខ្ទប់ប្រទេសលើកទី២ តែធូរស្រាលជាងលើកទី១
នៅលើកនេះ លោកម៉ាក្រុង បានបញ្ជាក់ថា រដ្ឋាភិបាលបានស្រង់បទពិសោធន៍ខ្លះ នៃការបិទខ្ទប់កាលពីលើកមុន។ មានចំណុចធូរស្រាលមួយចំនួន តួយ៉ាង គឺសាលារៀន ពីថ្នាក់មតេយ្យ ដល់ថ្នាក់មធ្យមសិក្សា នឹងអាចដំណើរការធម្មតាបាន ដើម្បីឲ្យឪពុកម្តាយ អាចមានលទ្ធភាពទៅធ្វើការ។ ក្រុមហ៊ុន សហគ្រាស រោងចក្រ និង ការដ្ឋានសាងសង់ផ្សេងៗ ក៏អាចដំណើរការបានដែរ។
ចាប់ពីថ្ងៃទី ៣០តុលា ដល់ថ្ងៃទី១ធ្នូ ប្រជាជនអាចចេញដើរក្រៅផ្ទះបាន តែត្រូវមានលិខិតបញ្ជាក់ មានពេលត្រឹមតែមួយម៉ោង និងមិនឲ្យឆ្ងាយលើស១គីឡូមែត្រជុំវិញផ្ទះទេ។ ហាងទំនិញដែលមិនចាំបាច់ គឺត្រូវបិទ។ ហាងកាហ្វេ ភោជនីយដ្ឋាន រោងកុន រោងល្ខោនជាដើម ក៏ត្រូវបិទដែរ។
លោកម៉ាក្រុងបានបញ្ជាក់ថា រដ្ឋនឹងធានា ជួយទប់ការខាតបង់របស់ហាងទំនិញ ក្រុមហ៊ុនតូចតាច ដែលបាត់បង់ប្រាក់ចំណូល ដោយសារតែការបិទទ្វារនេះ។ ហើយបុគ្គលិក ដែលត្រូវបង្ខំចិត្តធ្វើការតែពាក់កណ្តាលម៉ោង គឺរដ្ឋនឹងជួយបំពេញប្រាក់ខែ។
នៅព្រឹកថ្ងៃព្រហស្បតិ៍ លោក Jean Castex នាយករដ្ឋមន្ត្រីបារាំង បានចូលទៅសភា ដើម្បីប្រាប់ទៅសមាជិកសភា អំពីវិធានការ ដែលរដ្ឋាភិបាលគ្រោងនឹងអនុវត្ត មុននឹងធ្វើសន្និសីទកាសែត ដើម្បីរៀបរាប់លំអិតប្រាប់ទៅប្រជាជនទូទាំងប្រទេស នៅពេលល្ងាច។ រដ្ឋាភិបាលតម្រូវឲ្យពាក់ម៉ាស ចាប់ពីក្មេងអាយុ៦ឆ្នាំឡើងទៅ ហើយការពាក់ម៉ាស ត្រូវតែធ្វើជាទូទៅ បើទោះបីជានៅក្នុងផ្ទះក៏ដោយ នៅពេលណាមានភ្ញៀវឬសមាជិកគ្រួសារមក។ សួនច្បារសាធារណៈ និងផ្សារលក់ម្ហូបអាហារហាលវាល អាចបើកទ្វារបានធម្មតា តែការជួបជុំនៅទីសាធារណៈ ត្រូវហាមឃាត់ទាំងស្រុង។ ក្រុមហ៊ុនទាំងអស់ ត្រូវតែរៀបចំឲ្យបុគ្គលិកធ្វើការពីផ្ទះ រាល់ថ្ងៃតែម្តង បើសិនជាអាចធ្វើទៅបាន។
ស៊ូលំបាកមួយគ្រា ដើម្បីការពារសុខភាពប្រជាជន
ការបិទខ្ទប់ប្រទេសទាំងស្រុងឡើងវិញនេះ ប្រាកដជានឹងធ្វើឲ្យសេដ្ឋកិច្ចបារាំង ត្រូវរាំងស្ទះ និងរងផលលំបាកជាក់ជាមិនខានទេ។ មានមតិរិះគន់ច្រើនណាស់ ជាពិសេសពីសំណាក់ ហាងកាហ្វេ ភោជនីយដ្ឋាន ថាវិធានការថ្មីនេះ នឹងផ្កាប់ឆ្នាំងបាយពួកគេ។ ហាងលក់ទំនិញតូចតាច ប្រាកដជាក្ស័យធនមិនខានទេ។ តាមពិតទៅ វាគឺជារឿងដ៏ពិបាកណាស់ សម្រាប់រដ្ឋាភិបាលបារាំង ដែលត្រូវសម្រេច។ ណាអ្នកឆ្លងកាន់តែច្រើន មនុស្សអាចប្រឈមនឹងការស្លាប់ច្រើន។ ណាវិស័យសេដ្ឋកិច្ច បើបិទទៅ គឺត្រូវរាំងស្ទះ គ្មានប្រាក់ចំណូល ថៅកែនឹងបញ្ឈប់បុគ្គលិក ជាដើម។
នៅក្នុងសន្ទរកថា លោកម៉ាក្រុង បានបញ្ជាក់ថា រដ្ឋផ្តល់អាទិភាពដល់ការការពារសុខភាពប្រជាជនជាចាំបាច់។ តែរដ្ឋក៏ត្រូវាការពារសេដ្ឋកិច្ចដែរ។ គឺចំណូលពន្ធ បានមកពីវិស័យសេដ្ឋកិច្ចនេះហើយ ដែលរដ្ឋយកទៅចំណាយ ក្នុងវិស័យសុខាភិបាល។ តែទន្ទឹមនឹងនេះ បើសិនជាប្រជាពលរដ្ឋ មានបញ្ហាសុខភាព សេដ្ឋកិច្ចក៏វានឹងមិនរីកចម្រើនទៅតាមនោះដែរ។ ដូច្នេះជាបឋម និងបន្ទាន់នាពេលនេះ គឺរដ្ឋត្រូវតែបង្ខំចិត្តបិទសេដ្ឋកិច្ចខ្លះ ទុកតែផ្នែកណាដែលចាំបាច់ខានមិនបាន ដើម្បីធ្វើយ៉ាងណា ការពារសុខភាពប្រជាជនជាមុនសិន។ កម្មវត្ថុរបស់រដ្ឋាភិបាល គឺធ្វើយ៉ាងណា ទាញចំនួនអ្នកឆ្លងប្រចាំថ្ងៃ ឲ្យធ្លាក់មកនៅត្រឹម ៥ពាន់ក្នុងមួយថ្ងៃ មិនមែន ៤-៥ម៉ឺននាក់ក្នុងបច្ចុប្បន្ននេះទេ។
យោងតាមអ្នកវិភាគ រលកឆ្លងខ្លាំងលើកទី២នាពេលនេះ គឺបណ្តាលមកពីមនុស្សម្នា មិនខ្វល់មិនប្រយ័ត្ន មិនពាក់ម៉ាសឲ្យបានជាប់ជាប្រចាំ មិនរក្សាគម្លាត ហើយជួបជុំគ្នាក្នុងចំណោមបងប្អូនគ្រួសារ និងមិត្តភ័ក្តិញឹកញាប់ពេក។ ហេតុដូច្នេះហើយ បានជានៅក្នុងសុន្ទរកថា របស់លោកម៉ាក្រុង កាលពីយប់មិញ គឺលោកបាននិយាយទទូច ឲ្យប្រជាជនទាំងអស់ គោរពវិធានការឲ្យជាប់ជានិច្ច។ ម្នាក់ៗត្រូវតែមានស្មារតីទទួលខុសត្រូវ ប្រុងប្រយ័ត្នជាប់ជានិច្ច មិនត្រូវព្រលែងនោះទេ។
បិទខ្ទប់លើកទីមួយកាលពីខែមីនា តែនៅតែមិនអាចទប់ការឆ្លងរាលដាលបាន។ ដូច្នេះបិទលើកនេះទៀត តើសួរថាច្បាស់ទេ ថាអាចទប់ស្កាត់ ការឆ្លងរាលដាលបាន? យ៉ាងណាមិញ លោករដ្ឋមន្ត្រីក្រសួងសុខាភិបាលបារាំង បានលើកឡើងថា បច្ចុប្បន្ននេះ វាគឺជារលកឆ្លងទី២ តែក៏មានន័យថា បារាំងក៏អាចប្រឈមនឹងរលកឆ្លងរាលដាល លើកទី៣ដែរ។ មេរោគនេះ ធ្វើឲ្យអ្នកវិទ្យាសាស្ត្រវង្វេងអស់ហើយ។ បើតាមស្មាន សីតុណ្ហភាពត្រជាក់ អាចជាកត្តាជំរុញ ឲ្យការឆ្លងរាលដាលមានភាពលឿនរហ័ស។ ធម្មតារដូវត្រជាក់នៅអឺរ៉ុប គឺចាប់ពីពេលនេះ រហូតដល់ខែមីនា ដូច្នេះថាមិនត្រូវដែរ កូវីដ១៩អាចនឹងនៅតែបន្តវាយលុក ច្រើនខែទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ