សហរដ្ឋអាមេរិក៖លោកចូ បៃដិនជាប់ឆ្នោតប្រធានាធិបតីទី៤៦ ដោយមានលោកស្រីខាម៉ាឡា ហារីសជាអនុប្រធានាធិបតី
ចុះផ្សាយនៅថ្ងៃ៖
នៅសហរដ្ឋអាមេរិក លទ្ធផលនៃការបោះឆ្នោតប្រធានាធិបតីកាលពីថ្ងៃទី៣ វិច្ឆិកាបានផ្តល់ជ័យជំនះឲ្យលោកចូ បៃដិនមកពីគណបក្សប្រជាធិបតេយ្យ។ មានអាយុ ៧៧ឆ្នាំ លោកចូ បៃដិនជាប្រធានាធិបតីទី៤៦ របស់សហរដ្ឋអាមេអាមេរិក។ ចំណែកលោកស្រីខាម៉ាឡា ហារីសដែលមានអាយុ ៥៦ឆ្នាំបានក្លាយជាស្រ្តីទី១ កាន់តំណែងអនុប្រធានាធិបតី។ ខណៈដែលបណ្តាញសារព័ត៌មានធំៗរបស់អាមេរិកប្រកាសពីជ័យជំនះរបស់លោកបៃដិន ប្រធានាធិបតីផុតអាណត្តិលោកដូណាល់ ត្រាំបានបន្តជំទាស់នឹងលទ្ធផល ហើយប្រកាសពីជ័យជំនះរបស់ខ្លួនទៅវិញ។
មានអាយុ ៧៧ឆ្នាំលោកចូ បៃដិនជាអ្នកនយោបាយជើងចាស់ម្នាក់ដែលមានបទពិសោធន៍នយោបាយជិត ៥០ឆ្នាំ។ បន្ទាប់ពីបានរៀបការក្នុងឆ្នាំ ១៩៧២ លោកបៃដិនដែលជាមេធាវីបានចូលប្រឡូកក្នុងឆាកនយោបាយក្នុងអាយុ ២៩ឆ្នាំ។ ក្នុងឆ្នាំ ១៩៧២ ដដែល លោកបៃដិនបានជាប់ឆ្នោតជាសមាជិកព្រឹទ្ធសភាពាក់ស្លាកគណបក្សប្រជាធិបតេយ្យ។ ចំណែកជីវិតគ្រួសាររបស់លោកបៃដិនមានការឆ្លងកាត់រឿងអភ័ព្វច្រើន។ ក្នុងឆ្នាំ ១៩៧២ ពោលក្រោយជាប់ឆ្នោតជាសមាជិកព្រឹទ្ធសភាមិនបានមួយខែផង ប្រពន្ធទី១ របស់លោក និងកូនស្រីបានស្លាប់នៅក្នុងគ្រោះថ្នាក់ចរាចរណ៍ ហើយកូនប្រុសចំនួន ២នាក់បានរួចខ្លួនដោយត្រឹមរបួស។ ៥ឆ្នាំក្រោយមក ពោលក្នុងឆ្នាំ ១៩៧៧ លោកបៃដិនបានរៀបការលើកទី២ ដោយមានកូនស្រីម្នាក់។
ក្នុងឆ្នាំ ២០១៥ លោកបៃដិនបានបាត់បង់កូនប្រុសម្នាក់ឈ្មោះ បូ ដោយជំងឺមហារីកខួរក្បាល។ ក្នុងរយៈពេល ៣៦ឆ្នាំជាអាជីពនយោបាយ លោកបៃដិនបានជាប់ឆ្នោតម្តងហើយម្តងទៀតជាសមាជិកព្រឹទ្ធសភាចំនួន ៦ដង។ លើសពីនេះនៅក្នុងព្រឹទ្ធសភា លោកបៃដិនបានទទួលតំណែងឡើងដូចកាំជណ្តើរដោយបានក្លាយជាប្រធានគណៈកម្មការច្បាប់ក្នុងឆ្នាំ ២០០១ និងជាប្រធានគណៈកម្មការកិច្ចការបរទេសក្នុងឆ្នាំ ២០០៦។ ក្នុងឆ្នាំ ២០០៨ លោកបៃដិនបានលាឈប់ពីតំណែងប្រធានគណៈកម្មការកិច្ចការបរទេសនៅព្រឹទ្ធសភាដើម្បីក្លាយជាអនុប្រធានាធិបតីរបស់លោកបារ៉ាក់ អូបាម៉ាចំនួន ៨ឆ្នាំរហូតដល់ឆ្នាំ ២០១៦។
តែមហិច្ឆិតារបស់លោកបៃដិនក៏សំដៅសេតវិមានដែរ ព្រោះលោកធ្លាប់បានចូលរួមប្រកួតប្រជែងជាបេក្ខជនប្រធានាធិបតីក្នុងគណបក្សប្រជាធិបតេយ្យចំនួន ២ដង គឺឆ្នាំ ១៩៨៨ និងឆ្នាំ ២០០៨ ដោយទទួលបរាជ័យទាំងពីរលើក។ គឺទើបតែលើកទី៣ ដែលការព្យាយាមរបស់លោកទទួលបានជោគជ័យ។ បន្ទាប់ពីបានក្លាយជាសមាជិកព្រឹទ្ធសភាដ៏វ័យក្មេងជាងគេក្នុងអាយុ ២៩ឆ្នាំ លោកចូ បៃដិនបានជាប់ឆ្នោតប្រធានាធិបតីដែលមានវ័យចំណាស់ជាងគេក្នុងអាយុ ៧៧ឆ្នាំនៅក្នុងប្រវត្តិសហរដ្ឋអាមេរិក។
ប្រវត្តិរូបសង្ខេបរបស់លោកស្រីខាម៉ាឡា ហារីស
កើតនៅថ្ងៃទី២០ តុលា ឆ្នាំ ១៩៦៤ លោកស្រីខាម៉ាឡា ហារីសមានឱពុកដើមកំណើតហ្សាម៉ាអ៊ីក និងមានម្តាយដើមកំណើតឥណ្ឌា។ តែឱពុក ម្តាយបានលែងលះគ្នានៅពេលលោកស្រីហារីសទើបមានអាយុ ៥ឆ្នាំ ហើយម្តាយជាអ្នកបន្តចិញ្ចឹមបីបាច់ថៃរក្សាលោកស្រីហារីសតែម្នាក់ឯង។ នៅក្នុងវ័យកុមារ លោកស្រីហារីសបានរស់នៅក្នុងទីក្រុងម៉ុងរ៉េអាល់ ប្រទេសកាណាដាចំនួន ៥ឆ្នាំដែលនៅទីនោះ ម្តាយលោកស្រីហារីសទទួលបានការងារជាគ្រូបង្រៀន។ បន្ទាប់មក ម្តាយ និងកូនបានត្រឡប់ទៅអាមេរិកវិញដែលលោកស្រីហារីសបានសម្រេចចូលរៀននៅសកលវិទ្យាល័យ Howard University ក្នុងទីក្រុងវ៉ាស៊ីនតោន និងបន្តសិក្សាផ្នែកច្បាប់។
ក្នុងឆ្នាំ ១៩៩០ លោកស្រីហារីសបានចាប់ឆ្នោតជារដ្ឋអាជ្ញាក្នុងទីក្រុង San Francisco និងជារដ្ឋអាជ្ញាក្នុងរដ្ឋ California ក្នុងឆ្នាំ ២០១០ និងបានជាប់ជាថ្មីក្នុងឆ្នាំ ២០១៤។ មុនបញ្ចប់អាណត្តិទីពីរជារដ្ឋអាជ្ញា នៅឆ្នាំ២០១៧ លោកស្រីហារីសបានសម្រេចចិត្តឈរឈ្មោះជាសមាជិកព្រឹទ្ធសភានៅរដ្ឋកាលីហ្វ័រញ៉ា។ ដោយមានទទួលបានការគាំទ្រពីលោកបារ៉ាក់អូបាម៉ា និងលោក ចូបៃដិន លោកស្រីហារីសបានទទួលជោគជ័យយ៉ាងត្រចះត្រចង់ក្នុងសម័យបោះឆ្នោតព្រឹទ្ធសភា។ តំណែងមួយនេះបានធ្វើឲ្យលោកស្រីហារីសក្លាយជាស្ត្រីសមាជិកព្រឹទ្ធសភាទី១ មានដើមកំណើតអាស៊ីខាងត្បូង និងជាស្ត្រីសមាជិកព្រឹទ្ធសភាសម្បុរខ្មៅទីពីរនៅក្នុងប្រវត្តិព្រឹទ្ធសភាសហរដ្ឋអាមេរិក។
សំណុំរឿងអាទិភាពដែលកំពុងរង់ចាំលោកចូ បៃដិន
មានសំណុំរឿងអាទិភាពច្រើននៅក្នុងចំណោមសំណុំរឿងអាទិភាពដែលកំពុងរង់ចាំលោកចូ បៃដិន។ តែនៅចំពោះមុខ និងជាបន្ទាន់ គឺការផ្សះផ្សា បង្រួបបង្រួមសង្គមអាមេរិកដែលកំពុងបែកបាក់ខ្លាំងនៅពេលនេះ។ លោកបៃដិនបានថ្លែងនៅមុនពេលជាប់ឆ្នោតក៏ដូចនៅក្រោយពេលជាប់ឆ្នោតថា លោកជាប្រធានាធិបតីរបស់សហរដ្ឋអាមេរិក និងពលរដ្ឋអាមេរិកគ្រប់រូបដោយគ្មានការបែងចែកពណ៌សម្បុរ ឬនិន្នាការនយោបាយ។ នេះពិតជាសារមួយសំខាន់ខ្លាំងណាស់ដើម្បីធានាក្រុមអ្នកគាំទ្រលោកបៃដិន និងរំងាប់ភាពរំជួបរំជួលក្រុមអ្នកគាំទ្រលោកដូណាល់ ត្រាំ។
សំណុំរឿងអាទិភាពបន្ទាប់ គឺយុទ្ធនាការប្រឆាំងនឹងជំងឺកូវីដ១៩ ដែលកំពុងបន្តសម្លាប់ និងឆ្លងមនុស្សជាច្រើនរយនាក់នៅសហរដ្ឋអាមេរិកក្នុងមួយថ្ងៃៗ។ លោកបៃដិនបានប្រកាសថាចាប់ពីថ្ងៃចន្ទ ទី៨ វិច្ឆិកា លោកនឹងបង្កើតក្រុមមួយដែលប្រមូលផ្តុំដោយក្រុមអ្នកវិទ្យាសាស្រ្ត និងអ្នកជំនាញដើម្បីចាត់វិធានការប្រឆាំងនឹងកូវីដ១៩។ ក្នុងសំណុំរឿងសេដ្ឋកិច្ច ពាក្យស្លោកដែលលោកបៃដិនបានប្រើនៅក្នុងយុទ្ធនាការឃោសនាបោះឆ្នោត គឺ « America is back » និង « Made in USA »។ ផែនការ « Made in USA » នេះត្រូវបានលោកបៃដិនគ្រោងប្រើលុយចំនួន ៧០០ ០០០លានដុល្លារ។ នៅក្នុងសំណុំរឿងបរិស្ថាន លោកបៃដិនផ្តល់អាទិភាពលើថាមពលកកើតឡើងវិញ និងចង់ឲ្យសហរដ្ឋអាមេរិកមានអព្យាក្រឹតភាពកាបោនពីពេលនេះទៅឆ្នាំ ២០៥០។
នៅលើឆាកអន្តរជាតិលោកបៃដិននឹងពិនិត្យមើលឡើងវិញលើសំណុំរឿងដែលលោកត្រាំបានសម្រេចជាមួយក្រុមប្រទេសសម្ព័ន្ធមិត្តក៏ដូចជាជាមួយអង្គការ និងស្ថាប័នអន្តរជាតិនានា។ លោកបៃដិនបានបញ្ជាក់រួចហើយថា លោកនឹងបញ្ចូលសហរដ្ឋអាមេរិកជាថ្មីទៅក្នុងកិច្ចព្រមព្រៀងក្រុងប៉ារីសឆ្នាំ ២០១៥ស្តីពីអាកាសធាតុ ទៅក្នុងអង្គការសុខភាពពិភពលោក ឬទៅក្នុងអង្គការ Unesco ដែលលោកត្រាំបានដកសហរដ្ឋអាមេរិកចេញ។ លោកបៃដិនចង់មើលឡើងវិញពីទំនាក់ទំនងរវាងសហរដ្ឋអាមេរិកជាមួយមេដឹកនាំកូរ៉េខាងជើងលោកគីម ជុងអ៊ុន រួមទាំងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០០៥ ដែលលោកត្រាំបានដកសហរដ្ឋអាមេរិកចេញក្នុងឆ្នាំ ២០១៨។
ជាមួយប្រទេសចិន លោកចូ បៃដិនចង់ស្តារឡើងវិញនូវកិច្ចសន្ទនាប្រកបដោយការស្ថាបនាជាជាងការបន្តប្រើសង្រ្គាមពាក្យសម្តី។ ជារួម និងអ្វីដែលលោកបៃដិនចង់បាន គឺចង់ឲ្យសហរដ្ឋអាមេរិករកឃើញកន្លែងរបស់ខ្លួនឡើងវិញជាមហាអំណាចពិភពលោក និងតម្លៃពិតរបស់សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ