កងទ័ពអូស្ត្រាលី ទទួលស្គាល់អំពើឧក្រិដ្ឋ សម្លាប់មនុស្សដោយខុសច្បាប់ ធ្វើនៅអាហ្វហ្កានីស្ថាន
ចុះផ្សាយនៅថ្ងៃ៖
ស្តាប់ - ០៧:១៥
នៅថ្ងៃទី១៩វិច្ឆិកា កងទ័ពអូស្ត្រាលី បានចេញរបាយការណ៍មួយ ស្តីអំពីអំពើឧក្រិដ្ឋធ្វើឡើង ដោយកងកុម្មង់ដូពិសេសអូស្ត្រាលី ក្នុងពេលបំពេញបេសកកម្មនៅអាហ្វហ្កានីស្ថាន រវាងពីឆ្នាំ២០០៧ ដល់២០១៣។ យោងតាមរបាយការណ៍នេះ កងទ័ពអូស្ត្រាលី បានទទួលស្គាល់ ថាកងកុម្មង់ដូខ្លួន បានសម្លាប់ប្រជាជនស្លូតត្រង់អាហ្វហ្កានីស្ថាន រួមទាំងអ្នកទោស សរុបយ៉ាងហោច៣៩នាក់ ដែលជាការសម្លាប់ដោយខុសច្បាប់ និងមិនពាក់ព័ន្ធនឹងការប្រយុទ្ធក្នុងសមរភូមិឡើយ។ ដំណឹងនេះ បានធ្វើឲ្យរញ្ជួយមតិសាធារណៈអូស្ត្រាលី ដែលកន្លងមក តែងតែគាំទ្រ នៅពីក្រោយកងទ័ពរបស់ខ្លួន។
អគ្គមេបញ្ជាការកងទ័ពអូស្ត្រាលី ចេញមុខទទួលស្គាល់
របាយការណ៍ដែលមានកម្រាស់ ៤៦៥ទំព័រនេះ គឺជាលទ្ធផលស៊ើបអង្កេត របស់ក្រុមការងារស៊ើបអង្កេតផ្ទៃក្នុង នៃកងទ័ពអូស្រាលី ជាច្រើនឆ្នាំមកហើយ។ ជាសរុបសន្និដ្ឋាន កងទ័ពអូស្ត្រាលី បានទទួលស្គាល់ថា កងកុម្មង់ដូពិសេសរបស់ខ្លួន ដែលបំពេញបេសកកម្មនៅ អាហ្វហ្កានីស្ថាន រវាងពីឆ្នាំ២០០៧ ដល់ឆ្នាំ២០១៣ បានប្រព្រឹត្តិអំពើឧក្រិដ្ឋ សម្លាប់មនុស្សដោយខុសច្បាប់ ចំនួនយ៉ាងហោច៣៩នាក់។
គឺលោក Augus Campbell អគ្គមេបញ្ជាការកងទ័ពអូស្ត្រាលីតែម្តង ដែលបានចេញមុខ និយាយទទួលស្គាល់ ជាសាធារណៈនៅថ្ងៃនេះ។ លោកបានលើកឡើងថា ដោយផ្អែកលើការសន្និដ្ឋាន របស់របាយការណ៍នេះ គឺក្រុមកងកុម្មង់ដូអូស្ត្រាលីខ្លះ ពិតជាបានធ្វើបំពានច្បាប់ រំលោភវិន័យ ធ្វើសកម្មភាពសម្លាប់មនុស្សស្លូតត្រង់ និងអ្នកទោស ហើយថែមទាំងបានរៀបចំប្រឌិតស្ថានការណ៍ កុហកថ្នាក់លើ ដើម្បីបិទបាំងអំពើឧក្រិដ្ឋរបស់ខ្លួនថែមទៀតផង។
របាយការណ៍បានលើកឡើងជាអាទិ៍ថា ទាហានអូស្ត្រាលីថ្មីៗ ដែលទើបតែទៅដល់អាហ្វហ្កានីស្ថាន ហើយដែលមិនធ្លាប់បាញ់សម្លាប់មនុស្សសោះនោះ ត្រូវបានមេមេ បញ្ជាឲ្យបាញ់ទៅលើអ្នកទោសអាហ្វហ្កានីស្ថាន ដើម្បីហាត់សមបាញ់សម្លាប់មនុស្ស ឲ្យធ្លាប់ដៃ។ ហើយបន្ទាប់មកទេ ទាហានអូស្ត្រាលី ក្មេងៗទាំងនោះ ត្រូវគេបញ្ជា ឲ្យរៀបចំប្រឌិតឆាកល្ខោន ថាមានការផ្ទុះអាវុធ បាញ់តប់តគ្នា រវាងពួកគេ និងក្រុមអ្នកទោសតាលីបង់។
ជាសរុប របាយការណ៍នេះ លើកឡើងថា យ៉ាងហោចមានករណីសម្លាប់ប្រជាជនស្លូតត្រង់ និងអ្នកទោសអាហ្វហ្កានីស្ថាន សរុបទាំងអស់៣៩នាក់ ដែលធ្វើឡើងដោយខុសច្បាប់ទាំងស្រុង ពីសំណាក់កងកុម្មង់ដូអូស្ត្រាលី។ លោកមេបញ្ជាការ Augus Campbell ក៏បានថ្លែងសូមទោសជាសាធារណៈ ទៅកាន់ប្រជាជនអាហ្វហ្កានីស្ថាន ចំពោះអំពើឧក្រិដ្ឋ ដ៏អយុត្តិធម៌នេះ។
រដ្ឋាភិបាលអូស្ត្រាលី ព្យាយាមបិទខ្ទប់កុំឲ្យគេផ្សាយរឿងអាស្រូវ
នៅក្រោយភេរវកម្មថ្ងៃទី១១ កញ្ញា ២០០១ អូស្ត្រាលីបានចូលរួម ជាមួយសហរដ្ឋអាមេរិក ដោយបានបញ្ជូនកងទ័ព ប្រមាណជា២៦០០០នាក់ ទៅអាហ្វហ្កានីស្ថាន មុននឹងដកទ័ពចេញពីអាហ្វហ្កានីស្ថានទាំងអស់ នៅឆ្នាំ២០១៣។ ក៏ប៉ុន្តែ ក្រោយមកមានបែកធ្លាយដំណឹងជាបន្តបន្ទាប់ ស្តីសកម្មភាពឧក្រិដ្ឋមួយចំនួន បង្កឡើងដោយកងកុម្មង់ដូអូស្ត្រាលី។ រដ្ឋាភិបាលអូស្ត្រាលី ក៏ដូចជាកងទ័ព បានទទួលរងសំពាធខ្លាំងណាស់ ប៉ុន្មានឆ្នាំចុងក្រោយនេះ ដោយសារតែមានដំណឹងលេចឮជាបន្តបន្ទាប់ ថាកងទ័ពអូស្ត្រាលី បានធ្វើអំពើខុសឆ្គង ធ្ងន់ធ្ងរ នៅអាហ្វហ្កានីស្ថាន។ ដំណឹងបែកធ្លាយទាំងនោះ បានធ្វើឲ្យប្រជាជនអូស្ត្រាលី ខឹង និងរិះគន់កងទ័ព។
បណ្តាញសារព័ត៌មានស៊ើបអង្កេតអូស្ត្រាលី បានចុះផ្សាយអត្ថបទ និងវីដេអូឯកសារជាច្រើន ស្តីពីរឿងអាស្រូវនេះ។ ឧទាហរណ៍ មានករណី ទាហានអូស្ត្រាលី បានសម្លាប់បុរសជនជាតិអាហ្វហ្កានីស្ថានម្នាក់ ដើម្បីកុំឲ្យលើសចំណុះ ចំនួនមនុស្សនៅលើឧត្ថម្ភាគចក្រ។ និងមានករណីសម្លាប់ កុមារអាហ្វហ្កានីស្ថាន អាយុ៦ឆ្នាំ ក្នុងពេលបើកប្រតិបត្តិការបាញ់រះ ទៅលើផ្ទះប្រជាជន។
តាមពិតដំបូងឡើយ រដ្ឋាភិបាលអូស្ត្រាលី ហាក់បានព្យាយាមបិទខ្ទប់រឿងរ៉ាវទាំងនេះ ដោយបានតាមចាប់ អ្នកដែលទំលាយឯកសារសម្ងាត់ និងបានរារាំងអ្នកកាសែត មិនឲ្យចុះផ្សាយទៀត។ ជាក់ស្តែង នៅឆ្នាំ២០១៧ ទូរទស្សន៍ ABC អូស្ត្រាលី បានផ្សាយវីដេអូឯកសារស៊ើបអង្កេតជាច្រើន ស្តីពីកងទ័ពអូស្ត្រាលី ដែលបានសម្លាប់កុមារ និងមនុស្សគ្មានអាវុធជាប់ខ្លួន នៅអាហ្វហ្កានីស្ថាន។ នគរបានអូស្ត្រាលី បានបើកការស៊ើបអង្កេត ចង់រករឿងអ្នកកាសែត២នាក់ របស់ទូរទស្សន៍ABCនេះ ថាបានលួច និងផ្សព្វផ្សាយឯកសារសំងាត់របស់កងទ័ព។ នគរបាលបានទាំងចុះទៅឆែកឆេរ ដល់ទីស្នាក់ការទូរទស្សន៍នៅក្រុងស៊ីដនីថែមទៀតផង។ តែក្រោយមក ដោយទទួលរងនូវការរិះគន់ ពីមតិសាធារណៈ និង បណ្តាញព័ត៌មានទូទៅ នគរបាលក៏បានបិទការស៊ើបអង្កេតនេះវិញ។ ហើយក្រោយមករដ្ឋាភិបាល ព្រមទាំងកងទ័ពអូស្ត្រាលី បានព្រមទទួលស្គាល់ការពិត ហើយអនុញ្ញាតឲ្យមានការស៊ើបអង្កេតផ្ទៃក្នុងកងទ័ព ស្តីអំពីអំពើឧក្រិដ្ឋទាំងនេះ។
តែងតាំងអ្នកស៊ើបអង្កេតពិសេស ទទួលបន្ទុកបទឧក្រិដ្ឋសង្រ្គាម
របាយការណ៍នេះ បានលើកឡើងពីវិធានការមួយចំនួន ដើម្បីស្វែងរកយុត្តិធម៌ជូនដល់ជនរងគ្រោះ ក៏ដូចជាផ្តន្ទាទោស អ្នកទទួលខុសត្រូវនៃអំពើឧក្រិដ្ឋទាំងនេះ។ ក្នុងន័យនេះ របាយការណ៍បានកំណត់ថា មនុស្សចំនួន១៩នាក់ ក្នុងជួរកងទ័ពអូស្ត្រាលី និងត្រូវបញ្ជូនឈ្មោះទៅកាន់នគរបាលសហព័ន្ធអូស្ត្រាលី ដើម្បីបើកការស៊ើបអង្កេត នឹងឈានទៅផ្តន្ទាទោស។ ចំណែកក្រុមគ្រួសារជនរងគ្រោះអាហ្វហ្កានីស្ថាន នឹងត្រូវទទួលបានសំណងជំងឺចិត្តជាប្រាក់។
ដោយឡែក លោកមេបញ្ជាការ Augus Campbell បានលើកឡើងថា វិធានការនេះ មិនទាន់គ្រប់គ្រាន់ទេ។ គឺត្រូវតែបញ្ជូនអ្នកទទួលខុសត្រូវ ទៅចំពោះមុខការិយាល័យស៊ើបអង្កេតពិសេស ទទួលបន្ទុកបទឧក្រិដ្ឋសង្រ្គាម។ លោក ថែមទាំងបាន ទាមទារឲ្យដកស័ក្តិ ពីស្មាមេបញ្ជាការ មួយចំនួន ដែលទទួលបន្ទុក កងកុម្មង់ពិសេសដូអូស្រ្តាលី នៅអាហ្វហ្កានីស្ថាន ថែមទៀតផង។
យ៉ាងណាមិញ កាលពីសប្តាហ៍មុននេះ លោក Scott Morrison នាយករដ្ឋមន្ត្រីអូស្ត្រាលី បានប្រកាសថា លោកនឹងតែងតាំង មន្ត្រីស៊ើបអង្កេតពិសេសម្នាក់ ដើម្បីទទួលបន្ទុកសំណុំរឿងបទឧក្រិដ្ឋសង្រ្គាម បង្ករឡើងដោយកងទ័ពអូស្ត្រាលី។ តាមការស្មាន គំនិតនេះ គឺដើម្បីបង្ការ ក្រែងទៅថ្ងៃមុខ នឹងមានការដាក់ពាក្យប្តឹងណាមួយ ទៅតុលាការព្រហ្មទណ្ឌអន្តរជាតិក្រុងឡាអេ។ បន្ថែមពីនេះ គណកម្មាធិការឯករាជ្យមួយ នឹងត្រូវបង្កើតឡើង ដើម្បីរៀបចំធ្វើកំណែទម្រង់ស៊ីជំរៅ នៅក្នុងទំលាប់វិន័យរបស់កងទ័ពអូស្ត្រាលី និងនៅក្នុងរបៀបចាត់ចែងការងារ ក្នុងពេលបំពេញបេសកកម្មរបស់កងទ័ព។
ដោយឡែក កាលពីថ្ងៃពុធទី១៨វិច្ឆិកា លោកប្រធានាធិបតីអាហ្វហ្កានីស្ថាន បានសរសេរតាមTwitter ថា លោក Scott Morrison បានទូរស័ព្ទទៅលោក ដើម្បីសំដែងការសោកស្តាយជាពន់ពេក និងបានសុំទោសអាហ្វហ្កានីស្ថាន ចំពោះកំហុសដ៏ធ្ងន់ធ្ងរ របស់កងទ័ពអូស្ត្រាលី។ ក៏ប៉ុន្តែ ភាគីរដ្ឋភិបាលអូស្រ្តាលីបានអះអាងថា លោក Scott Morrison មិនបាននិយាយដូច្នេះទេ។ លោកនាយករដ្ឋមន្ត្រីអូស្ត្រលីគ្រាន់តែបានប្រាប់ទៅ លោកប្រធានាធិបតីអាហ្វហ្កានីស្ថានថា រដ្ឋាភិបាលអូស្ត្រាលី កំពុងផ្តោតការយកចិត្តទុកដាក់ មិនទុកចោលឡើយ នូវរឿងរ៉ាវចោទប្រកាន់ ស្តីពីអំពើឧក្រិដ្ឋដែលកងទ័ពអូស្ត្រាលី បានធ្វើនៅអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ