អ៊ីរ៉ង់ចោទអ៊ីស្រាអែល និងអាមេរិក ថាបានធ្វើឃាតមន្ត្រីទទួលបន្ទុកកម្មវិធីនុយក្លេអ៊ែរអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៦:២៣
កាលពីថ្ងៃសុក្រទី២៧វិច្ឆិកា មន្ត្រីទទួលបន្ទុកកម្មវិធីនុយក្លេអ៊ែរអ៊ីរ៉ង់ ដ៏សំខាន់ម្នាក់ ឈ្មោះ ម៉ូសេន ហ្វាករីហ្សាដេះ (Mohsen Fakhrizadeh) ត្រូវបានគេសម្លាប់ នៅក្នុងហេតុការណ៍ភេរវកម្មមួយ នៅរដ្ឋធានីតេអេរ៉ង់។ ប្រធានាធិបតីអ៊ីរ៉ង់ បានអះអាងថា អ្នកដែលបានបញ្ជាឲ្យសម្លាប់មនុស្ស ដ៏សំខាន់របស់អ៊ីរ៉ង់នេះ គឺអ៊ីស្រាអែល ដែលជាឃាតករស៊ីឈ្នួល របស់សហរដ្ឋអាេមរិក។ ប្រមុខដឹកនាំអ៊ីរ៉ង់ បានប្រកាសថា នឹងសងសឹងវិញឲ្យចាស់ដៃ។
បិតានុយក្លេអ៊ែរអ៊ីរ៉ង់
លោក ម៉ូសេន ហ្វាករីហ្សាដេះ (Mohsen Fakhrizadeh) បានរងរបួសធ្ងន់ និងបន្ទាប់មកបានស្លាប់ បន្ទាប់ពីបានរងការវាយប្រហារភេរវកម្ម រថយន្តបំផ្ទុះគ្រាប់បែក និងមានការបាញ់តបតគ្នាផង រវាងក្រុមអង្គរក្សរបស់លោក និងក្រុមភេរវកម្ម កាលពីថ្ងៃសុក្រ ទី២៧វិច្ឆិកា។ នេះបើផ្អែក តាមការផ្សព្វផ្សាយ របស់ក្រសួងការពារជាតិអ៊ីរ៉ង់។
លោក ម៉ូសេន ហ្វាករីហ្សាដេះ អាយុ៥៩ឆ្នាំ មានតួនាទី ជាប្រធាននាយកដ្ឋានស្រាវជ្រាវ និងអភិវឌ្ឍន៍ នៃក្រសួងការពារជាតិអ៊ីរ៉ង់។ លោក អាមៀរ ហាតាមី រដ្ឋមន្ត្រីការពារជាតិអ៊ីរ៉ង់ បានបញ្ជាក់ថា លោក ម៉ូសេន ហ្វាករីហ្សាដេះ គឺជាអ្នកវិទ្យាសាស្ត្រអ៊ីរ៉ង់ ដ៏មានសមត្ថភាព នឹងបានដើរតួនាទីយ៉ាងសំខាន់ នៅក្នុងការប្រឹងប្រែងស្រាវជ្រាវ អភិវឌ្ឍន៍កម្មវិធីនុយក្លេអ៊ែររបស់អ៊ីរ៉ង់។
យ៉ាងណាមិញ លោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល ធ្លាប់បានហៅលោក ម៉ូសេន ហ្វាករីហ្សាដេះនេះ ថា « ជាបិតាគ្រាប់បែកនុយក្លេអ៊ែរអ៊ីរ៉ង់ »។ ចំណែក ក្រសួងការបរទេសអាមេរិកវិញ ធ្លាប់បានឲ្យដឹងនៅឆ្នាំ២០០៨ ថា មន្ត្រីអ៊ីរ៉ង់រូបនេះ បានធ្វើសកម្មភាពជួញដូរដោយសំងាត់ ដើម្បីអភិវឌ្ឍន៍ផែនការផលិតគ្រាប់បរមាណូ និងមីស៊ីលនុយក្លេអ៊ែរអ៊ីរ៉ង់។ ដូច្នេះលោក ម៉ូសេន ហ្វាករីហ្សាដេះ មិនមែនជាមន្ត្រីធម្មតាទេ តែគឺជាមនុស្សម្នាក់ដ៏សំខាន់ ដើរតួនាទីធំ ក្នុងកម្មវិធីនុយក្លេអ៊ែរអ៊ីរ៉ង់។
"អ៊ីស្រាអែល ជាឃាតករស៊ីឈ្នួលរបស់អាមេរិក!"
កាលពីថ្ងៃសុក្រ ភ្លាមៗក្រោយដំណឹងថា លោកម៉ូសេន ហ្វាករីហ្សាដេះ បានស្លាប់ក្នុងហេតុការណ៍ភេរវកម្ម លោក ចាវ៉ាត់ ហ្សារីហ្វ ប្រមុខការទូតអ៊ីរ៉ង់ បានសរសើរលើទំព័រ Twitter ថា គេមានដាន ភស្តុតាងមួយចំនួន ដែលអាចបញ្ជាក់បាន ថាគឺក្រុមចារកិច្ចសម្ងាត់របស់អ៊ីស្រាអែល ដែលជាអ្នកធ្វើសកម្មភាពនេះ។
លោក ហាសាន់ រូហានី ប្រធានាធិបតីអ៊ីរ៉ង់ បានចេញលិខិតប្រកាសមួយ ដោយចោទ ដោយចំៗតែម្តង ថា អ៊ីស្រាអែលគឺជាឃាតករ។ បន្ទាប់មក នៅតាមកញ្ចក់ទូរទស្សន៍ផ្សាយផ្ទាល់ លោករូហានី បានប្រើភាសាចោទធ្ងន់ៗ ថាអ៊ីស្រាអែល គឺជាឃាតករស៊ីឈ្នួលរបស់អាេមរិក ដែលប្រទេសទាំង២នេះ មានបាតដៃប្រឡាក់ឈាមដូចគ្នា នៅក្នុងអំពើឃាតកម្មនេះ។ លោករូហានី អះអាងថា សត្រូវរបស់អ៊ីរ៉ង់ កំពុងតែជ្រួលច្រប់ នៅមិនសុខ ចង់ឆក់ឱកាសខ្លួន ដែលនៅសល់តែប៉ុន្មានសប្តាហ៍ទៀត ដើម្បីធ្វើសកម្មភាព បង្កចលាចលនៅអ៊ីរ៉ង់។
សំដីនេះ គឺលោកហាសាន់ រូហានី បានសំដៅទៅលើលោកដូណាល់ ត្រាំ ដែលជាមិត្តស្និទស្នាលបំផុតជាមួយអ៊ីស្រាអែល។ ដូចយើងដឹងហើយ ថា លោកដូណាល់ ត្រាំ មានទំនោរ ស្អប់អ៊ីរ៉ង់ និងរករឿងអ៊ីរ៉ង់ខ្លាំងក្លាណាស់។ គឺលោកដូណាល់ ត្រាំ ដែលបានដកខ្លួនអាមេរិក ចេញពីកិច្ចព្រមព្រៀងនុយក្លេអ៊ែរអ៊ីរ៉ង់ និងបានដាក់ទណ្ឌកម្មសេដ្ឋកិច្ចមកលើអ៊ីរ៉ង់ យ៉ាងពេញទំហឹង។ រដ្ឋាភិបាលលោកដូណាល់ ត្រាំ ក៏ធ្លាប់បានបញ្ជាឲ្យសម្លាប់មេទ័ពអ៊ីរ៉ង់ម្នាក់ដ៏សំខាន់ដែរ គឺលោក ហាសាន់ សូឡីម៉ានី កាលពីឆ្នាំ២០១៩។
ហើយប៉ុន្មានថ្ងៃមុននេះ ក្រោយចាញ់ឆ្នោត លោកដូណាល់ ត្រាំ ថែមទាំងមានបំណង ចង់ឲ្យកងទ័ពអាមេរិក វាយកំទេចទីតាំងនុយក្លេអ៊ែររបស់អ៊ីរ៉ង់ថែមទៀតផង។ តែបំណងនេះ ត្រូវបានក្រសួងការពារជាតិអាមេរិកបដិសេធ ហើយដែលធ្វើឲ្យលោករដ្ឋមន្ត្រី Mark Esper ត្រូវលោកដូណាល់ ត្រាំ ដកចេញពីតំណែង។
ហេតុផលទាំងនេះហើយ ដែលធ្វើឲ្យអ៊ីរ៉ង់គិតថា លោកដូណាល់ ត្រាំ កំពុងតែឆ្លេឆ្លា អន្ទះអន្ទែង ចង់ធ្វើបាបអ៊ីរ៉ង់ឲ្យអស់ចិត្ត មុននឹងគាត់អស់អំណាច។ បើតាមការវិភាគរបស់អ្នកជំនាញ គឺថា លោកដូណាល់ ត្រាំ មានបំណងធ្វើរឿងឲ្យស្មុគស្មាញ បង្ករជម្លោះឲ្យខ្លាំងរវាងអាមេរិក និងអ៊ីរ៉ង់ ដើម្បីធ្វើឲ្យរដ្ឋាភិបាលរបស់លោកចូ បៃដិន ត្រូវឈឺក្បាលដោះស្រាយ។
"ឈាមសងដោយឈាម"
លោកមគុទេសន៍សាសនាកំពូលរបស់អ៊ីរ៉ង់ អាយ៉ាតូឡា អាលីខាមឺណី បានប្រកាសនៅថ្ងៃនេះថា អ៊ីរ៉ង់ត្រូវតែសងសឹក ចំពោះអំពើនេះ។ បណ្តាញផ្សព្វផ្សាយព័ត៌មានអ៊ីរ៉ង់ បានចុះផ្សាយព្រោងព្រាតថា អ៊ីស្រាអែល និងអាមេរិក ត្រូវត្រៀមខ្លួនឲ្យហើយទៅ!
គួរកត់សំគាល់ថា រដ្ឋអំណាចអ៊ីរ៉ង់ មិនមែនជាអ្នកចូលចិត្តបាក់មុខឡើយ។ បើមេដឹកនាំអ៊ីរ៉ង់ហ៊ាននិយាយថាសងសឹក គឺប្រាកដជាមានការសងសឹក ក្នុងរូបភាពណា យើងមិនអាចដឹងបានទេ សម្រាប់ពេលនេះ។ តែកុំភ្លេចថា អ៊ីរ៉ង់មានកូនចៅច្រើនគួរសម នៅក្នុងតំបន់ដើមបូព៌ា តួយ៉ាង ដូចជាក្រុមហេសបូឡាលីបង់ ដែលត្រៀមចាំតែធ្វើសកម្មភាព បើសិនជាមានការបញ្ជាពីតេអេរ៉ង់។
យ៉ាងណាមិញ ការគំរាមនេះ គឺអ៊ីស្រាអែល មិនព្រងើយលេងសើចឡើយ។ នៅថ្ងៃសៅរ៍នេះ យោងតាមការផ្សាយរបស់បណ្តាញព័ត៌មានអ៊ីស្រាអែល បានឲ្យដឹងថា ក្រសួងការបរទេសអ៊ីស្រាអែល បានដាក់ស្ថានទូតខ្លួននៅបរទេស ឲ្យស្ថិតក្នុងការប្រកាសអាសន្ន ដោយត្រូវយាមសន្តិសុខឲ្យម៉ដ្ឋចត់បំផុត ក្រែងមានអំពើភេរវកម្មណាមួយ។
តែយ៉ាងណា ខណៈដែលកាសែតអភិរក្សនិយមអ៊ីរ៉ង់ សរសេរអំពាវនាវ ឲ្យសងសឹក "ឈាមសងដោយឈាម"នេះ មានកាសែតអ៊ីរ៉ង់មួយឈ្មោះ Arman-e Melli បានលើកវិភាគថា តើអ៊ីរ៉ង់គួរសងសឹងឬមិនគួរ។ កាសែតនេះ សរសេរថា អ៊ីរ៉ង់ត្រូវតែប្រយ័ត្ន ព្រោះថាបើធ្វើកាន់តែខ្លាំង គឺប្រៀបដូចជានុយទាក់បញ្ហាមកដាក់ខ្លួនទៅវិញទេ។ អ៊ីរ៉ង់ អាចនឹងជាប់អន្ទាក់អ៊ីស្រាអែល និងអាមេរិក។ សត្រូវអ៊ីរ៉ង់ទាំង២នាក់នេះ នឹងយកលេស ហើយព្រួតគ្នាធ្វើបាបអ៊ីរ៉ង់កាន់តែខ្លាំង ហើយរបបដឹកនាំអ៊ីរ៉ង់សព្វថ្ងៃទៅវិញទេ ដែលអាចនឹងរងគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ