Brexit៖ អង់គ្លេសនិងអឺរ៉ុបចុះកិច្ចព្រមព្រៀងពាណិជ្ជកម្ម
ចុះផ្សាយនៅថ្ងៃ៖
ស្តាប់ - ០៦:៤១
ក្រោយពីឆ្លងកាត់ការចរចាយ៉ាងតឹងតែងអស់រយៈពេល១០ខែ នៅទីបំផុតទៅ អង់គ្លេស និងសហភាពអឺរ៉ុប បានឈានដល់ការចុះកិច្ចព្រមព្រៀង នៅថ្ងៃព្រហស្បតិ៍នេះ ដើម្បីកំណត់អំពីទំនាក់ទំនងពាណិជ្ជកម្ម ក្រោយពីអង់គ្លេសបានចាកចេញពីសហភាពអឺរ៉ុប។ ការចុះកិច្ចព្រមព្រៀងនេះត្រូវបានធ្វើឡើងតែប្រមាណជាមួយសប្តាហ៍ប៉ុណ្ណោះ មុន ផុតកំណត់រយៈពេលអន្តរកាល នៅថ្ងៃទី៣១ធ្នូខាងមុខ។
៤ឆ្នាំកន្លះ ក្រោយការបោះឆ្នោតប្រជាមតិនៅអង់គ្លេសនៅខែមិថុនាឆ្នាំ២០១៦ និងជាង ១០ខែ ក្រោយពីអង់គ្លេសបានបញ្ចប់សមាជិកភាពពីសហភាពអឺរ៉ុបជាផ្លូវការ នៅថ្ងៃទី៣១ខែមករាឆ្នាំ២០២០ សំណុំរឿង Brexit បានដើរមកដល់ដំណាក់កាលចុងក្រោយដ៏សំខាន់មួយ នៅថ្ងៃព្រហស្បតិ៍នេះ គឺការសម្រេចបាននូវកិច្ចព្រមព្រៀងពាណិជ្ជកម្ម ដើម្បីបញ្ចៀសស្ថានភាព « No Deal » ដែលតម្រូវឲ្យមានការយកពន្ធគយ និងកំណត់កូតា ក្នុងការដោះដូរពាណិជ្ជកម្មនឹងគ្នា។
ថ្លែងនៅក្នុងសន្និសីទសារព័ត៌មាន នៅរសៀលថ្ងៃព្រហស្បតិ៍ លោកស្រី អួរស៊ូឡា វ៉ុនឌែរឡេយែន ប្រធានគណៈកម្មការអឺរ៉ុប បានលើកឡើងថា កិច្ចព្រមព្រៀងដែលសម្រេចបាននេះ ជាកិច្ចព្រមព្រៀងមួយ ដែលមានតុល្យភាព ហើយថា ពេលនេះ គឺល្មមដល់ពេលហើយ ដែលគេត្រូវបិទបញ្ចប់សំណុំរឿង Brexit។
គួរបញ្ជាក់ថា តាមរយៈកិច្ចព្រមព្រៀងពាណិជ្ជកម្មនេះ សហភាពអឺរ៉ុបនឹងបើកចំហទីផ្សារដ៏ធំរបស់ខ្លួន ដែលមានប្រជាជនសរុបរហូតដល់ទៅ ៤៥០លាននាក់ ឲ្យអង់គ្លេសនាំទំនិញចូលដោយមិនកំណត់កូតា និងមិនយកពន្ធគយ ហើយជាថ្នូរមកវិញ ខាងភាគីអង់គ្លេស ក្រៅពីបើកចំហទីផ្សារដល់អឺរ៉ុប ក្រុមហ៊ុនរបស់អង់គ្លេសចាំបាច់ត្រូវតែគោរពទៅតាមវិធានរបស់សហភាពអឺរ៉ុប ទាក់ទងទៅនឹងវិស័យបរិស្ថាន ច្បាប់ការងារ និងច្បាប់សារពើពន្ធ ដើម្បីធានានូវការប្រកួតប្រជែងដោយយុត្តិធម៌ជាមួយនឹងក្រុមហ៊ុនអឺរ៉ុប។
តាំងពីល្ងាចថ្ងៃពុធ ប្រភពចេញពីសហភាពអឺរ៉ុប នៅទីក្រុងព្រុចស៊ែល បានលើកឡើង ពីការជឿនលឿនទៅមុខ ក្នុងការចរចា ហើយថែមទាំងបានប្រាប់ឲ្យមន្រ្តីទូតប្រទេសជាសមាជិកទាំង ២៧ ត្រៀមខ្លួនជាស្រេច ក្នុងករណីត្រូវប្រជុំគ្នាបន្ទាន់ នៅថ្ងៃព្រហស្បតិ៍។ ប្រភពពីខាងរដ្ឋាភិបាលបារាំងក៏បានឲ្យដឹងផងដែរថា នៅក្នុងការចរចារហូតដល់យប់ថ្ងៃពុធនេះ អង់គ្លេសបានធ្វើសម្បទានច្រើន ទាក់ទងនឹងបញ្ហានេសាទ ដែលជាចំណុចខ្ទាស់គ្នាខ្លាំង។ ទោះជាយ៉ាងណា នៅមានចំណុចខ្លះទៀត ដែលភាគីទាំងពីរ នៅមិនទាន់ឯកភាពគ្នា ដោយលោក បូរីស ចនសុន នាយករដ្ឋមន្រ្តីអង់គ្លេស និងលោកស្រី អួរស៊ូឡា វ៉ុនឌែរឡេយែន ប្រធានគណៈកម្មការអឺរ៉ុប បន្តចរចាគ្នាអស់មួយព្រឹកធំទៀត មុននឹងប្រកាសពីសម្រេចបានកិច្ចព្រមព្រៀង នៅរសៀលថ្ងៃព្រហស្បតិ៍នេះ។
ទោះជាយ៉ាងណា កិច្ចព្រមព្រៀងនេះនឹងត្រូវឆ្លងកាត់ដំណាក់កាលសំខាន់ៗមួយចំនួនទៀត ទើបអាចចូលជាធរមានបាន គឺត្រូវឆ្លងកាត់ការអនុម័តដោយសំឡេងឯកច្ឆន្ទដោយប្រទេសជាសមាជិកទាំង ២៧ របស់សហភាពអឺរ៉ុប និងការបោះឆ្នោតផ្តល់សច្ចាប័នពីសំណាក់សភាអឺរ៉ុប ក៏ដូចជាពីសំណាក់សភាអង់គ្លេស។ ដំណើរការផ្តល់សច្ចាប័ននេះ ត្រូវការពេលច្រើន ហើយសភាអឺរ៉ុបបានឲ្យដឹងរួចហើយថា កិច្ចព្រមព្រៀងនេះនឹងមិនអាចឆ្លងកាត់ការបោះឆ្នោតអនុម័តពីសភាអឺរ៉ុប មុនថ្ងៃទី៣១ធ្នូនេះបានទេ។
ជាគោលការណ៍ នៅយប់ថ្ងៃទី៣១ធ្នូ ឈានចូលថ្ងៃទី១មករា រយៈពេលអន្តរកាល រវាងអង់គ្លេស និងសហភាពអឺរ៉ុប នឹងត្រូវបញ្ចប់។ បើសិនជាមិនមានកិច្ចព្រមព្រៀងពាណិជ្ជកម្ម ដែលចូលជាធរមានទាន់ពេលទេ ចាប់ពីថ្ងៃទី១មករាទៅ អង់គ្លេស និងសហភាពអឺរ៉ុប នឹងលែងមានព្រំដែនបើកចំហដូចជាពេលនេះទៀតហើយ ពោលគឺនឹងត្រូវអនុវត្តដូចជាប្រទេសដទៃនឹងគ្នាសុទ្ធសាធ ដោយត្រូវមានការត្រួតពិនិត្យតាមព្រំដែន មានការយកពន្ធ និងការកំណត់កូតាទំនិញ ស្របទៅតាមវិធានរបស់អង្គការពាណិជ្ជកម្មពិភពលោក។
ដើម្បីបញ្ចៀសបញ្ហានេះ សហភាពអឺរ៉ុប និងអង់គ្លេសគ្រោងដាក់ឲ្យកិច្ចព្រមព្រៀងពាណិជ្ជកម្មសេរីចូលជាធរមានបណ្តោះអាសន្ន នៅថ្ងៃទី១មករា នៅក្នុងអំឡុងពេលរង់ចាំនីតិវិធីផ្តល់សច្ចាប័នពីសភា។
កន្លងមកធ្លាប់មានកិច្ចព្រមព្រៀង Brexit មួយរួចហើយ ហេតុអ្វីត្រូវចរចាលើកិច្ចព្រមព្រៀងថ្មីទៀត?
ការចរចារឿង Brexit នេះ ពិតជាអូសបន្លាយពេលយូរ ហើយមានដំណើរការស្មុគស្មាញបន្តិចមែន ក៏ប៉ុន្តែ ដើម្បីសង្ខេបឲ្យងាយយល់ យើងត្រូវចែកជាពីរដំណាក់កាលដាច់ពីគ្នា៖ ដំណាក់កាលទី១ គឺចរចាបញ្ចប់សមាជិកភាពរបស់អង់គ្លេសពីសហភាពអឺរ៉ុប ចំណែក ដំណាក់កាលទី២ គឺចរចាកំណត់អំពីទំនាក់ទំនង រវាងអង់គ្លេស និងសហភាពអឺរ៉ុប ក្រោយបញ្ចប់សមាជិកភាព។
ដំណាក់កាលទី១ចាប់ផ្តើមឡើង នៅក្រោយពេលដែលប្រជាជនអង់គ្លេសបោះឆ្នោតប្រជាមតិសម្រេចចាកចេញពីសហភាពអឺរ៉ុប ហើយរដ្ឋាភិបាលអង់គ្លេសបានស្នើសុំជាផ្លូវការទៅសហភាពអឺរ៉ុប ឲ្យចាប់ផ្តើមចរចាបញ្ចប់សមាជិកភាព ទៅតាមនីតិវិធី កំណត់ក្នុងមាត្រា ៥០ នៃសន្ធិសញ្ញាអឺរ៉ុប។
ការចរចានេះ ធ្លាប់បានចេញជាកិច្ចព្រមព្រៀងម្តង កាលពីខែវិច្ឆិកាឆ្នាំ២០១៨ ក៏ប៉ុន្តែ សភាអង់គ្លេសបដិសេធមិនផ្តល់សច្ចាប័ន ទើបក្រោយមកទៀត ក្រោយពេលដែលលោកបូរីស ចនសុន ឡើងកាន់តំណែងជានាយករដ្ឋមន្រ្តី អង់គ្លេសក៏បានស្នើសុំចរចាឡើងវិញជាមួយសហភាពអឺរ៉ុប។ ការចរចាក៏បានឈានទៅដល់ការចុះកិច្ចព្រមព្រៀង ហើយក្រោយពីសភាអឺរ៉ុប និងសភាអង់គ្លេសផ្តល់សច្ចាប័នលើកិច្ចព្រមព្រៀងថ្មីនេះ អង់គ្លេសក៏ត្រូវបញ្ចប់សមាជិកភាពពីសហភាពអឺរ៉ុបជាផ្លូវការ នៅថ្ងៃទី៣១មកឆ្នាំ២០២០។
មកដល់ត្រឹមនេះ ដំណាក់កាលទី១ត្រូវបញ្ចប់ ដោយអង់គ្លេសត្រូវចេញពីសហភាពអឺរ៉ុប ហើយក្លាយជាប្រទេសដទៃសុទ្ធសាធ ក៏ប៉ុន្តែ គេបានទុករយៈពេលអន្តរកាលមួយ ដោយរក្សាទំនាក់ទំនងរវាងអឺរ៉ុបនិងអង់គ្លេសឲ្យនៅដដែលដូចមុន (បន្តបើកចំហព្រំដែន និងបើកចំហទីផ្សារដូចមុន) រហូតដល់ថ្ងៃទី៣១ធ្នូឆ្នាំ២០២០ ដើម្បីទុកពេលចរចាលើដំណាក់កាលទី២ គឺដំណើរការចរចា ដែលគេបានធ្វើមកទល់នឹងព្រឹកថ្ងៃព្រហស្បតិ៍នេះ ដើម្បីចុះកិច្ចព្រមព្រៀងពាណិជ្ជកម្មសេរី រវាងអង់គ្លេស និងសហភាពអឺរ៉ុប ហើយកំណត់អំពីទំនាក់ទំនងពាណិជ្ជកម្ម ចាប់ពីថ្ងៃ១មករាឆ្នាំ២០២១ ក្រោយផុតរយៈពេលអន្តរកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ