BREXIT៖ ខ្លឹមសារសំខាន់ៗ នៃកិច្ចព្រមព្រៀងទំនាក់ទំនង រវាងអង់គ្លេស និង សហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៨:៤៩
អស់រយៈពេលប្រមាណ៤ឆ្នាំ មកហើយ ដែលអង់គ្លេសបានបោះឆ្នោតប្រជាមតិផ្តាច់ខ្លួន លែងធ្វើជាសមាជិកនៃសហភាពអឺរ៉ុប។ ភាគីទាំង២បានចរចាគ្នា យ៉ាងលំបាកលំបិន ដើម្បីរៀបចំទំនាក់ទំនងរវាងគ្នាគ្រប់វិស័យ ទៅថ្ងៃអនាគត។ នៅតែប៉ុន្មានថ្ងៃ មុននឹងឱសានុវាទមកដល់ ទីបំផុតទៅ ភាគីទាំង២បានសម្រេចបាន កាលពីថ្ងៃទី២៤ធ្នូ នូវកិច្ចព្រមព្រៀងមួយ ដែលកំណត់ពីទំនាក់ទំនង រវាងអង់គ្លេស និងសហភាពអឺរ៉ុប ហើយដែលនឹងត្រូវចូលជាធរមាន ចាប់ពីថ្ងៃទី១មករា ឆ្នាំ២០២១ទៅ។
ចាប់ពីថ្ងៃទី១ មករា ២០២១ទៅ ទំនាក់ទំនងរវាងសហភាពអឺរ៉ុប និងអង់គ្លេស គឺត្រូវធ្វើទៅតាមអ្វីដែលមានកំណត់ នៅក្នុងកិច្ចព្រមព្រៀង ដែលគេបានចុះហត្ថលេខា កាលពីថ្ងៃទី២៤ធ្នូ។ កិច្ចព្រមព្រៀងដែលមានកម្រាស់ ប្រមាណ ១៥០០ទំព័រនេះ គឺជាលទ្ធផល ប្រឹងប្រែងចរចាយ៉ាងត្រដាបត្រដួស លំបាកលំបិនបំផុត ដោយសារតែភាគីទាំងសងខាង មានជំហររឹងរូសរាងខ្លួន។ តែយ៉ាងណាក៏ដោយ ទាំងភាគីអង់គ្លេស ទាំងសហភាពអឺរ៉ុប សុទ្ធតែបានអបអរ ថាវាជាជោគជ័យ ព្រោះថា កិច្ចព្រមព្រៀងនេះ គឺជាការស្រុះស្រួល ធ្វើសម្បទានឲ្យគ្នាទៅវិញទៅមក បានប្រយោជន៍ទាំងអស់គ្នាទៅថ្ងៃអនាគត។
ការនាំចូលទំនិញ ត្រូវធ្វើលិខិតស្នាមប្រកាសពន្ធ តែមិនបង់ពន្ធ
នៅក្នុងផ្នែកទំនាក់ទំនងពាណិជ្ជកម្ម រវាងអឺរ៉ុប និងអង់គ្លេស គឺជាផ្នែកសំខាន់បំផុត ព្រោះថាមួយឆ្នាំៗ ទំនាក់ទំនងរវាងភាគីទាំង២ក្នុងវិស័យនេះ មានតម្លៃដល់ទៅ៧០០ពាន់លានអឺរ៉ូ ជាមធ្យម។ ចាប់ពីថ្ងៃទី១មករា ឆ្នាំ២០២១ទៅ ភាគីទាំង២បានព្រមព្រៀងគ្នា បន្តអនុវត្តការមិនយកពន្ធ លើការ នាំចេញនាំចូលទំនិញទៅវិញទៅមក ហើយក៏មិនកំណត់ចំនួនកូតា នៃការនាំចូលនាំចេញទំនិញដែរ។ ក៏ប៉ុន្តែអ្វីដែលនឹងប្រែប្រួល គឺថា ចាប់ពីឆ្នាំក្រោយនេះទៅ ការនាំចេញនាំចូលទំនិញទាំងអស់ គឺត្រូវតែធ្វើលិខិតប្រកាសជាផ្លូវការ ឲ្យអាជ្ញាធរគយបានដឹង។ ឧទាហរណ៍ ក្នុងករណីទំនិញចំណីអាហារហូបចុក បន្លែត្រីសាច់ សត្វរស់អីជាដើម គឺត្រូវតែធ្វើលិខិតបញ្ជាក់បន្ថែម អំពីក្រិត្យក្រមស្តងដាសុខភាព និងអនាម័យ។ និយាយជារួម គឺត្រូវធ្វើលិខិតស្នាមនាំចេញនាំចូលទៅអាជ្ញាធរគយ តែមិនបង់ពន្ធទេ។
ទាក់ទិននឹងក្រិត្យក្រមស្តង់ដារសុខភាព អនាម័យ សង្គមនិងបរិស្ថាននេះដែរ គឺជារឿងសំខាន់ សម្រាប់ភាគីទាំងពីរ ដើម្បីធានាឲ្យបាននូវការប្រកួតប្រជែងដោយស្មើភាព។ នៅក្នុងចំណុចនេះ ភាគីទាំងពីរ បានព្រមព្រៀងគ្នាថា អង់គ្លេសនឹងបន្តអនុវត្តស្តង់ដាររបស់អឺរ៉ុប ដែលយើងអាចចាត់ទុកបានថា ជាស្តង់ដារខ្ពស់ ក្នុងក្រិត្យក្រមអនាម័យ ការពារបរិស្ថាន និងការពារអត្ថប្រយោជន៍សង្គមដល់បុគ្គលិកជាដើម។ ត្រង់ចំណុចនេះ យើងអាចនិយាយបានថា ភាគីអង់គ្លេស បានសុខចិត្តធ្វើសម្បទាន ព្រោះថាកន្លងមក លោកបូរីស ចនសុន តែងតែអះអាងថា លោកចង់ឲ្យអង់គ្លេសមានសិទ្ធិកំណត់ស្តង់ដារដោយឯករាជ្យ ដោយមិនត្រូវចាំតែធ្វើតាមបទដ្ឋានអឺរ៉ុបទាំងអស់នោះទេ។
តែយ៉ាងណា ភាគីទាំង២បានត្រូវរូវគ្នាថា អង់គ្លេសមិនមានកាតព្វកិច្ច ត្រូវតែធ្វើការតម្រឹមតម្រូវ តាមស្តង់ដារអឺរ៉ុប ដោយស្វ័យប្រវត្តិនោះទេ ក្នុងករណីដែលស្តង់ដារអឺរ៉ុប កែប្រែឲ្យកាន់តែតឹង ឬខ្ពស់ទៅៗ។ មានន័យថា បើអង់គ្លេសមិនសុខចិត្ត មិនយល់ស្របជាមួយស្តង់ដារណាមួយ នោះអង់គ្លេសអាចអនុវត្តស្តង់ដារផ្ទាល់ខ្លួនបាន ទៅលើមុខទំនិញណាមួយដោយចំពោះ។ តែក្នុងករណីនេះ មានន័យថា មុខទំនិញនោះ នឹងត្រូវតែមានការបង់ពន្ធហើយ។
អឺរ៉ុបត្រូវកាត់បន្ថយផលនេសាទ ក្នុងដែនទឹកអង់គ្លេស
បើនិយាយទៅវិស័យនេសាទនេះ វាមានតម្លៃប្រមាណ៦៥០លានអឺរ៉ូទេ ពោលគឺវាស្តួចស្តើងទេ បើប្រៀបធៀបទៅនឹងវិស័យទំនាក់ទំនងពាណិជ្ជកម្មទាំងមូល ដែលមានតម្លៃប្រមាណ៧០០ពាន់លានអឺរ៉ូូ។ ក៏ប៉ុន្តែវិស័យនេសាទនេះ បានធ្វើឲ្យការចរចាកន្លងមកនេះ រវាងភាគីទាំង២ មានការលំបាកជាងគេ តិងតែងជាងគេ ព្រោះថាវាជានិម្មិតរូប។ និម្មិតរូបនៃបូរណៈដែនទឹកដែនដីរបស់អង់គ្លេស និងរបស់ប្រទេសសមាជិកសហភាពអឺរ៉ុប។
ភាគីអង់គ្លេសធ្លាប់បានទាមទារថា សហភាពអឺរ៉ុប ត្រូវតែហាមអ្នកនេសាទ ឲ្យឈប់ចូលទៅនេសាទ នៅក្នុងដែនទឹករបស់អង់គ្លេស ដោយត្រូវប្រគល់តម្លៃនៃផលនេសាទចំនួន៦០% ឲ្យអង់គ្លេសវិញចាប់ពីថ្ងៃទី១មករាទៅ។ តែទីបំផុតទៅ នៅក្នុងកិច្ចព្រមព្រៀង គេបាននិយាយត្រូវគ្នាដោយបង្កើតរយៈពេលអន្តរកាល ពីនេះរហូតដល់ពាក់កណ្តាលឆ្នាំ២០២៦។ ក្នុងរយៈពេលនេះ សហភាពអឺរ៉ុប ត្រូវតែកាត់បន្ថយផលនេសាទ ចំនួន២៥% នៅក្នុងដែនទឹកអង់គ្លេស។ ហើយក្រោយចប់រយៈពេលអន្តរកាលនេះទៅ ការចរចាគ្នាដើម្បីបែងចែកដែនទឹកនេសាទ គឺនឹងត្រូវធ្វើរាល់ឆ្នាំ។
វិស័យនេសាទរបស់បារាំង នឹងរងផលប៉ះពាល់ខ្លាំងជាងគេ។ អ្នកនេសាទ ដាណឺម៉ាក ហូឡង់ ប៊ែលហ្សិក ក៏នឹងប្រឈមនឹងការបាត់បង់ផលនេសាទ និងប្រាក់ចំណូលដែរ។ នៅក្នុងបញ្ហានេះ សហភាពអឺរ៉ុប បានសន្យាថានឹងជួយ ដោយបានត្រៀមថវិកា មួយចំនួន ដើម្បីជួយអ្នកធ្វើការក្នុងវិស័យនេសាទ។ សម្រាប់អ្នកនេសាទបារាំង រដ្ឋាភិបាលបាន សន្យថានឹងជួយ ផ្តល់ជាប្រាក់ដល់៣ម៉ឺនអឺរ៉ូ ដោយយោងទៅលើកម្រិតបាត់បង់ផលនេសាទ ដែលបានមកពីដែនទឹកអង់គ្លេស។
អ្នកដំណើរទៅមក មិនចាំបាច់មានទិដ្ឋាការ សម្រាប់រយៈពេលស្នាក់នៅក្រោម៣ខែ
ជាគោលការណ៍ ចាប់ពីថ្ងៃទី១មករា ទៅ អង់គ្លេសគឺជាប្រទេសដ៏ទៃសុទ្ធសាធ សម្រាប់សហភាពអឺរ៉ុប។ តែយ៉ាងណា ប្រជាជនអឺរ៉ុប អាចបន្តធ្វើដំណើរទៅអង់គ្លេសបាន ដោយមិនចាំបាច់មានទិដ្ឋាការទេ បើទៅក្រោមរយៈពេល៣ខែ។ ដូចគ្នាដែរសម្រាប់ប្រជាជនអង់គ្លេស ដែលចង់មកអឺរ៉ុប។ ឧទាហរណ៍ដូចជា ការធ្វើដំណើរបែបទេសចរណ៍កំសាន្ត ទៅបំពេញបេសកកម្មការងារ ឬចូលរួមសន្និសីទអីជាដើម។ ប៉ុន្តែ ចាប់ពីថ្ងៃទី១មករា ២០២១ទៅ មានន័យថា អាជ្ញាធរទាំងសងខាង អាចនឹងធ្វើការត្រួតពិនិត្យ សួររកលិខិតឆ្លងដែន។ នឹងមានការប្រែប្រួលមួយចំនួនដែរ សម្រាប់អ្នកដែលចង់ធ្វើដំណើរ បើកឡានឆ្លងរវាងបារាំងទៅអង់គ្លេស គឺត្រូវតែមានបណ្ណបើកបរអន្តរជាតិ ហើយត្រូវតែមានធានារ៉ាប់រ៉ង់សុខភាព និងគ្រោះថ្នាក់។
សម្រាប់អ្នកដែលចង់រស់នៅ និងធ្វើការវិញ គឺត្រូវតែសុំបណ្ណធ្វើការ ដោយអនុឡោមទៅតាមបទដ្ឋានច្បាប់ ដែលមានស្រាប់ទាំងសងខាង។ សម្រាប់ប្រជាជនអឺរ៉ុបប្រមាណ៤លាននាក់ ដែលបច្ចុប្បន្នរស់នៅជាលក្ខណៈអចិន្ត្រៃយ៍នៅអង់គ្លេស គឺអាចបន្តរស់នៅបានជាធម្មតា ដោយមានបណ្ណស្នាក់នៅអចិន្ត្រៃយ៍ ចេញដោយអាជ្ញាធរអង់គ្លេស។
អង់គ្លេសចេញពីកម្មវិធី Eurasmus
ចំណុចប្រែប្រួលធំមួយទៀត ចាប់ពីថ្ងៃទី១មករាទៅ គឺទាក់ទិន នឹងកម្មវិធីផ្លាស់ប្តូរនិស្សិតឈ្មោះថា Eurasmus។ កម្មវិធីនេះ គឺជាកម្មវិធីផ្លាស់ប្តូរនិស្សិតថ្នាក់បរិញ្ញាប័ត្រ នៅទូទាំងអឺរ៉ុបតែម្តង ដែលពួកគេអាចជ្រើសរើស ចុះឈ្មោះទៅរៀននៅសាលាក្នុងប្រទេសណាក៏បាន ដោយបង់ថ្លៃដូចនិស្សិតក្នុងស្រុក នឹងដោយអាចបានប្រាក់អាហារូបត្ថម្ភខ្លះផង។ តែចាប់ពីឆ្នាំក្រោយទៅ អង់គ្លេសនឹងលែងចូលរួម ក្នុងកម្មវិធីនេះទៀតហើយ។ ខាងសហភាពអឺរ៉ុប បានសម្តែងការសោកស្តាយដែរ ទាក់ទិននឹងការបាត់បង់នេះ។
លោកនាយករដ្ឋមន្ត្រីអង់គ្លេស បាននិយាយថា លោកក៏ស្តាយដែរ តែរដ្ឋាភិបាលអង់គ្លេស គ្មានជំរើសទេ ព្រោះត្រូវកាត់បន្ថយការចំណាយ។ លោកពន្យល់ថា កន្លងមកនិស្សិតអឺរ៉ុប បានមករៀននៅអង់គ្លេស តាមរយៈកម្មវិធី Eurasmus នេះច្រើនណាស់ ពោលគឺច្រើនជាងនិស្សិតអង់គ្លេស ដែលចេញទៅប្រទេសអឺរ៉ុបផ្សេងទៀត។ ដូច្នេះចំណូលបានមកពីការបង់ប្រាក់ថ្លៃសាលា គឺអង់គ្លេសខាតច្រើន។ ពីមុននិស្សិតអឺរ៉ុបត្រូវបង់ថ្លៃសាលានៅអង់គ្លេស ដូចនិស្សិតអង់គ្លេសដែរ ពោលគឺប្រមាណ១ម៉ឺនអឺរ៉ូ ក្នុងមួយឆ្នាំ។ តែចាប់ពីឆ្នាំ២០២១ទៅ តម្លៃចុះឈ្មោះនឹងឡើងខ្ពស់ខ្លាំង សម្រាប់និស្សិតអឺរ៉ុប ដែលចង់ទៅរៀន នៅតាមសកលវិទ្យាល័យអង់គ្លេស ពោលគឺត្រូវបង់ថ្លៃពេញដូចនិស្សិតបរទេសឯទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ